The New York Times သတင်းစာက သတင်းရင်းမြစ်တွေကို ကိုးကားပြီး ဖော်ပြချက်အရ အမေရိကန်သမ္မတ ဒေါ်နယ်ထရမ့် အစိုးရဟာ မော်စကိုနဲ့ စေ့စပ်ဆွေးနွေးမယ့် ချဉ်းကပ်မှု အသစ်တစ်ရပ်အနေနဲ့ ယူကရိန်းစစ်ပွဲ မပြီးခင်မှာတောင် ရုရှားနဲ့ စီးပွားရေးဆိုင်ရာ သဘောတူညီချက်တွေ ရယူဖို့ စဉ်းစားနေတယ်လို့ သိရပါတယ်။
အမေရိကန် အရာရှိတစ်ဦးကတော့ ဒီလို သဘောတူညီချက်တွေ လုပ်တာဟာ ရုရှားနဲ့ ဆက်ဆံရေးကို အသစ်ကနေ ပြန်စဖို့ ဝါရှင်တန်ဘက်က တကယ်ကို လေးလေးနက်နက် ရည်ရွယ်ထားတယ်ဆိုတာကို ပြသနိုင်တယ်လို့ သတင်းစာကို ပြောခဲ့ပါတယ်။ ဒီချဉ်းကပ်ပုံက ထရမ့်ရဲ့ အရင်ရပ်တည်ချက်နဲ့ မတူဘူးဆိုတာကိုလည်း သတင်းစာက ထောက်ပြထားပါတယ်။
စေ့စပ်ဆွေးနွေးမှုတွေနဲ့ နီးစပ်သူ နှစ်ဦးကလည်း စစ်ပွဲမပြီးခင်မှာ ရုရှားနဲ့ သဘောတူညီချက်တွေ ရယူနိုင်မယ့် အလားအလာကို ဝါရှင်တန်ဘက်က အခုဆိုရင် လမ်းဖွင့်ပေးလာပြီဖြစ်ကြောင်း သတင်းစာကို ပြောပါတယ်။ သတင်းစာရဲ့ အဆိုအရ အမေရိကန်သမ္မတရဲ့ အထူးကိုယ်စားလှယ် စတိဗ် ဝှစ်ကော့ဖ် နဲ့ သမ္မတရဲ့ သမက်ဖြစ်သူ ဂျရက် ကက်ရှ်နာတို့ဟာ ရုရှားအနေနဲ့ စစ်ပွဲတွေကို အဆုံးသတ်ချင်စိတ် ပေါ်လာအောင် ဆွဲဆောင်နိုင်မယ့် နည်းလမ်းသစ်တွေကို ရှာဖွေနေကြတယ်လို့ သိရပါတယ်။ ဒါပေမဲ့ လောလောဆယ်မှာတော့ ဘယ်လို သဘောတူညီချက်မျိုးတွေကို စဉ်းစားနေလဲဆိုတဲ့ အချက်အလက်တော့ မသိရသေးပါဘူး။