ရန်ကုန်၊ စက်တင်ဘာ ၁၂
ရန်ကုန်တိုင်းဒေသကြီး၊ ထန်းတပင်မြို့နယ်ရှိ Teng Hui (Myanmar) Knitting Co., Ltd (သိုးမွှေးစက်ရုံ) ယာယီပိတ်သိမ်းမည့်အခြေအနေကြောင့် အလုပ်လက်မဲ့မဖြစ်စေရေးနှင့် အလုပ်သမားဥပဒေပါ ရပိုင်ခွင့်များ မဆုံးရှုံးစေရေးအတွက် အလုပ်ပြောင်းရွှေ့လုပ်ကိုင်လိုသည့် အလုပ်သမား ၂,၃၅၅ ဦးကို လုပ်သားလိုအပ်နေသည့် အခြားစက်ရုံများနှင့် ချိတ်ဆက်ပေးခဲ့ကြောင်း အလုပ်သမားဝန်ကြီးဌာနမှ သိရသည်။
အဆိုပါစက်ရုံတွင် လုပ်သားအင်အား ၂,၆၁၀ ဦးဖြင့် လည်ပတ်နေခြင်းဖြစ်ပြီး အော်ဒါမှာယူမှု နည်းပါးလာခြင်းကြောင့် ယာယီပိတ်သိမ်းရန် စီစဉ်ထားခြင်းဖြစ်သည်။
အလုပ်သမားဝန်ကြီးဌာန ပြည်ထောင်စုဝန်ကြီး ဦးခင်မောင်စိုးသည် တာဝန်ရှိသူများနှင့်အတူ စက်တင်ဘာ ၁၂ ရက် နံနက်ပိုင်းတွင် Teng Hui စက်ရုံသို့ သွားရောက်ခဲ့ပြီး စက်ရုံတာဝန်ရှိသူများနှင့် အလုပ်သမားများကို တွေ့ဆုံခဲ့သည်။
တွေ့ဆုံစဉ် အလုပ်ရှင်နှင့် အလုပ်သမားများအနေဖြင့် အပြန်အလှန်ယုံကြည်မှု၊ နားလည်မှုများဖြင့် တည်ဆဲအလုပ်သမားဥပဒေများကို လေးစားလိုက်နာကြရန် ပြည်ထောင်စုဝန်ကြီးက မှာကြားခဲ့သည်။
ထို့အပြင် အလုပ်ပြောင်းရွှေ့လုပ်ကိုင်လိုသည့် အလုပ်သမား ၂,၃၅၅ ဦး အလုပ်အကိုင် ဆက်လက်ရရှိနိုင်ရေးအတွက် လုပ်သားလိုအပ်နေသည့် အခြားစက်ရုံများနှင့် ချိတ်ဆက်ပေးကာ ပြောင်းရွှေ့လုပ်ကိုင်နိုင်ရေး ကူညီဆောင်ရွက်ပေးခဲ့ကြောင်း သိရသည်။
ဆက်လက်၍ ပြည်ထောင်စုဝန်ကြီးနှင့်အဖွဲ့သည် လှိုင်သာယာ(အနောက်ပိုင်း)မြို့နယ်ရှိ Apex Plus Garment Co., Ltd နှင့် Tri-Win Leather Co., Ltd အထည်ချုပ်စက်ရုံများသို့ သွားရောက်ခဲ့ပြီး လုပ်ငန်းခွင်ဘေးအန္တရာယ်ကင်းရှင်းရေးနှင့် ကျန်းမာရေးကော်မတီ၊ အလုပ်သမားရေးရာလုပ်ငန်း ညှိနှိုင်းရေးကော်မတီအဖွဲ့ဝင်များ၊ အလုပ်သမားများနှင့် တွေ့ဆုံခဲ့သည်။
ယင်းသို့တွေ့ဆုံရာတွင် အလုပ်သမားရေးရာကိစ္စရပ်များကို ရှင်းလင်းပြောကြားပြီး လိုအပ်သည်များကို သက်ဆိုင်ရာတာဝန်ရှိသူများနှင့် ညှိနှိုင်းဆောင်ရွက်ပေးခဲ့သည်။
အဆိုပါစက်ရုံ ၂ ရုံမှ လူမှုဖူလုံရေးအာမခံ အကျုံးဝင်အလုပ်သမား ၂,၁၂၂ ဦးအတွက်လည်း အလုပ်သမားဆေးရုံကြီးများမှ အထူးကုဆရာဝန်များ ပါဝင်သည့် ရွေ့လျားဆေးကုသယာဉ်နှင့် ဆေးကုသရေးအဖွဲ့များက လုပ်ငန်းခွင်အရောက် ဆေးကုသမှုနှင့် ဆေးဝါးများ ပံ့ပိုးပေးခဲ့သည်။
ထို့ပြင် ဓာတ်ခွဲစမ်းသပ်စစ်ဆေးခြင်း၊ ECG ဖြင့် နှလုံးစစ်ဆေးခြင်းနှင့် မျက်စိစစ်ဆေးခြင်းများကိုလည်း ဆောင်ရွက်ပေးခဲ့ကြောင်း သိရသည်။
ရန်ကုန်တိုင်းဒေသကြီးတွင် လူမှုဖူလုံရေးအကျုံးဝင် အာမခံအလုပ်သမား ၁,၀၃၂,၂၇၁ ဦး၏ ကျန်းမာရေးစောင့်ရှောက်မှုအတွက် မြို့နယ်လူမှုဖူလုံရေးဆေးခန်း ၂၃ ခန်း၊ Fee for Service စာချုပ်ဆေးခန်း ၅၂ ခန်း၊ ဌာနကြီးဆေးခန်း ၂၁ ခန်းနှင့် ရွေ့လျားဆေးကုသယာဉ်များဖြင့် ဆေးကုသမှုဝန်ဆောင်မှုများ ပေးလျက်ရှိကြောင်း သိရသည်။
ထို့အပြင် ရန်ကုန်တိုင်းဒေသကြီးရှိ အာမခံအလုပ်သမားများအတွက် စိုက်ထုတ်ကုန်ကျခဲ့သည့် ဆေးဖိုးကုန်ကျစရိတ်များကို ၂၀၂၅-၂၀၂၆ ဘဏ္ဍာနှစ်တွင် ကျပ်သန်း ၇,၉၇၄ ဒသမ ၃၉၆ နှင့် ၂၀၂၆ ခုနှစ် ဧပြီလမှ ဇူလိုင်လအထိ ကျပ်သန်း ၁,၅၄၀ ဒသမ ၈၈၂ ပေးအမ်းခဲ့ကြောင်း သိရသည်။