ယာဉ်တို-က်မှုဖြစ်သည့် ကုန်တင်ယာဉ်ပေါ်မှ တရားမဝင် မြန်မာရွှေ့ပြောင်းလုပ်သား ၅၃ ဦးကို တွေ့

ထိုင်းနိုင်ငံ Na Bon ခရိုင်တွင် သောကြာနေ့က ယာဉ်တို-က်မှုဖြစ်ပွားခဲ့ပြီးနောက် ယာဉ်မောင်းဖြစ်သူ ထွက်ပြေး စွန့်ခွါသွားခဲ့သည့် ကုန်တင်ယာဉ်ပေါ်မှ မလေးရှားသို့ သွားရောက်ကြမည့် တရားမဝင် မြန်မာရွှေ့ပြောင်းလုပ်သား ၅၃ ဦးကို တွေ့ရှိခဲ့ပြီး ၎င်းတို့အနက် တစ်ဦးသည် ခြေထောက်ကျိူးဒဏ်ရာရခဲ့သည်ဟု သိရသည်။

အဆိုပါယာဉ်တို-က်မှုသည် Thung Song-Surat Thani လမ်းကြောင်းပေါ်ရှိ အမှတ် ၄၁ အာရှအဝေးပြေးလမ်းမကြီးတွင် ဖြစ်ပွားခဲ့ခြင်း ဖြစ်သည် ဟု Na Bon ရဲစခန်းမှ ဒုတိယ ရဲမှူးကြီး Phanuwat Rattanaphan က ပြောကြားခဲ့သည်။

အခင်းဖြစ်ပွားရာသို့ ရဲတပ်ဖွဲ့နှင့် ကယ်ဆယ်ရေးလုပ်သားများ ရောက်ရှိခဲ့ပြီး ဓါတ်တိုင်ကို တို-က်မိကာ မြောင်းထဲကျခဲ့သည့် ကုန်တင်ယာဉ် ခေါင်းပိုင်းသည် ဆိုးဆိုးဝါးဝါး ပျက်စီးခဲ့သည်ကို တွေ့ရှိခဲ့သည်။

ရဲတပ်ဖွဲ့က ကုန်တင်ကားပေါ်ဖုံးထားသော တာပေါ်လင်ကို ဖယ်ရှားလိုက်ချိန်တွင် မြန်မာနိုင်ငံသား အမျိုးသား၊ အမျိုးသမီး ၅၃ ဦးကို အပြည့်အသိပ်တင်ဆောင်ထားသည်ကို တွေ့ရှိခဲ့သည်။ ၎င်းတို့ထဲမှ အချို့သည် ဒဏ်ရာအနည်းငယ်သာရရှိခဲ့သော်လည်း တစ်ဦးသည် ခြေထောက်ကျိုးသွားခဲ့သည်။ အားလုံးသည် ပင်ပန်းနွမ်းနယ်နေပုံရပြီး ထိုင်းစကားပြောတတ်သူ တစ်ယောက်မှ မပါဝင်ဟုလည်း ဆိုသည်။

စစ်ဆေးမေးမြန်းခဲ့ရာ မလေးရှားနိုင်ငံသို့ သွားရောက်ကြမည့် ၎င်းတို့ကို မြန်မာနယ်စပ်တွင် ကုန်တင်ယာဉ်ဖြင့် လာရောက်ခေါ်ဆောင်ခြင်းဖြစ်ကြောင်း ထွက်ဆိုခဲ့ ကြ သည်။ ၎င်းတို့သည် ထိုင်းအလုပ်ပွဲစားကို တစ်ဦးလျှင် ဘတ် ၅၀,၀၀၀ စီ ပေးခဲ့ရသည်ဟု ပြောကြသည်။

ထိုင်းအာဏာပိုင်များက ထွက်ပြေးသွားသည့် ယာဉ်မောင်းကို လိုက်လံရှာဖွေနေကာ ဥပဒေအရအရေးယူဆောင်ရွက်မည်ဖြစ်ပြီး ရွှေ့ပြောင်းလုပ်သားများကိုမူ မြန်မာနိုင်ငံသို့ ပြန်လွှဲပေးသွားမည်ဟု သိရသည်။

Ref: ဘန်ကောက်ပို့စ်