မြို့နယ်ပေါင်း ၆၀ ၌ ကြေညာထားသည့် စစ်အုပ်ချုပ်ရေးအမိန့်ကို သက်တမ်းတိုးရန်အတွက် နိုင်ငံတော်သမ္မတ ကိုယ်စား ဥပဒေရေးရာဝန်ကြီးနှင့် ရှေ့နေချုပ် ဒေါက်တာသီတာဦးက ပြည်ထောင်စုလွှတ်တော်ကို တင်ပြခဲ့သည်။
ယမန်နေ့က ပြုလုပ်သည့် ပြည်ထောင်စုလွှတ်တော်၌ အဆိုတင်သွင်းတင်ပြခဲ့ခြင်း ဖြစ်သည်။
တင်ပြမှု၌ တချို့ဒေသများသည် တရားဥပဒေစိုးမိုးရေး၊ နယ်မြေတည်ငြိမ်အေးချမ်းရေး ဆက်လုပ်ရန် လိုအပ်နေသေးသည်ဟု ဆိုသည်။
ကြေညာထားသည့် မြို့နယ် ၆၀ကို နိုင်ငံတော် သမ္မတက ဧပြီ ၂၃ ရက်၌ အရေးပေါ်အခြေအနေကြေညာထားခြင်း ဖြစ်သည်။
ထို့ကြောင့် ယင်းမြို့နယ်များ၏ အုပ်ချုပ်ရေးနှင့် တရားစီရင်ရေးကို တပ်မတော်ကာကွယ်ရေးဦးစီးချုပ် ဗိုလ်ချုပ်ကြီးရဲဝင်းဦးကို ပေးအပ်ထားခြင်းလည်း ဖြစ်သည်။
အရေးပေါ်အခြေအနေကြေညာထားသည့် မြို့များသည် ရှမ်းပြည်နယိမှ ၁၅ မြို့နယ်၊ ရခိုင်ပြည်နယ်မှ ၁၄ မြို့နယ်၊ စစ်ကိုင်းတိုင်းမှ ၈ မြို့နယ်၊ ချင်းပြည်နယ်မှ ၇ မြို့နယ်၊ ကချင်ပြည်နယ်မှ ၅ မြို့နယ်၊ မကွေးတိုင်းမှ ၅ မြို့နယ်၊ ကယားပြည်နယ်မှ ၃ မြို့နယ်၊ ကရင်ပြည်နယ်မှ ၂ မြို့နယ်နှင့်မန္တလေးတိုင်းက ၁ မြို့နယ်တို့ ပါဝင်သည်။