ကရင်ပြည်နယ် ထိုင်း-မြန်မာနယ်စပ် မြဝတီမြို့သို့ သွားလာသည့် ဒေါနတောင်တက်လမ်းဟောင်းအပါအဝင် လမ်းပိုင်း (၄)ပိုင်းရှိ ငွေကြေးကောက်ခံသည့် ဂိတ်အများစု ရုတ်သိမ်းသွားပြီဖြစ်ကြောင်း ဒေသခံများထံမှ သိရသည်။
ယခုနှစ်မှစတင်၍ ဒေါနတောင်တက် လမ်းဟောင်း၊ ၁၀၁၈ နယ်ခြားစောင့်တပ်လမ်း၊ ထို့ကော်ကိုးလမ်းနှင့် ကြက်ဥတောင်လမ်းတို့အတွင်း ယခင်ငွေကြေးကောက်ခံလျှက် ဂိတ်အများစု ပိတ်သိမ်းသွားခြင်းဖြစ်သည်ဟု ဆိုသည်။
“ငွေကြေးကောက်ခံတဲ့ ဂိတ်အတော်များများ ရုတ်သိမ်းသွားပြီး ရိုင်းပြတဲ့ဆက်ဆံရေး မရှိတော့ဘူး။ လက်အုပ်ကလေးချီပြီး လမ်းခရီးအဆင်ပြေပါစေလို့ ဆုတောင်းပေးသံကိုပါ ကြားနေရတယ်။အချိုရည် ရေသန့်ကွမ်းယာ ပါလာရင် ချိုချိုသာသာ အကူညီတောင်းခံတာမျိုး ရှိပါတယ်”ဟု ဒေသခံတစ်ဦးက ဆိုသည်။
ပြီးခဲ့သည့် နှစ်အတွင်း အဆိုပါ လမ်းပိုင်းများပေါ်တွင် ငွေကောက်ခံသည့် ဂိတ်များ ပြားခဲ့သည့်အပြင် ရိုင်းပြသည့် ပြုမှုဆက်ဆံမှုများကြုံတွေ့နေရာမှ ယခုနှစ်အတွင်း ပြောင်းလဲခဲ့ခြင်းဖြစ်သည်ဟု ဆိုသည်။
လက်ရှိတွင် မြဝတီမြို့သို့ သွားရာ၌ ဒေါနတောင်ပေါ်လမ်းဟောင်းသည် အဆင်ပြေဆုံးလမ်းဖြစ်သော်လည်း တိုက်ပွဲမကြာခဏ ဖြစ်ပွားမှုကြောင့် အခြေအနေကြည့်၍ သွားလာနေကြရကြောင်း သိရသည်။
ထို့အတူ ၁၀၁၈ နယ်ခြားစောင့်တပ်လမ်းပိုင်သည် ကျောက်သားလမ်းဖြစ်သော်လည်း လမ်းကျယ်ခြင်း၊ အတက်အဆင်း ပြေပြစ်ခြင်းကြောင့် အိမ်စီးကားများ ၊ ယာဉ်အလတ်များနှင့် ဆယ်ဘီးကုန်တင်ကားများ သွားလာမှု အဆင်ပြေကြောင်း သိရသည်။
ထို့ပြင် ထို့ကော်ကိုးလမ်းပိုင်းသည် ကုန်တင်ယာဉ်နှင့် အခြားယာဉ်များသွား နေကျလမ်းဖြစ်သော်လည်း ဖုန်ထူခြင်း၊ အချို့နေရာများ၌ လမ်းကျဉ်းခြင်းတို့ကြောင့် ကုန်တင်ယာဉ်များသာ အဓိက သွားလာနေကြပြီး၊ ကြက်ဥတောင်လမ်းသည် ထို့ကော်ကိုးလမ်းမှ ခွဲထွက်ပြီး သွားရသော်လည်း အတက်အဆင်း မတ်စောက်ခြင်း၊ လမ်းဆိုးရွားခြင်းတို့ကြောင့်အသွားအလာနည်းပါးကြောင်း သိရသည်။
ဓာတ်ပုံ-CJ