မြန်မာ့သနပ်ခါးယဉ်ကျေးမှုဓလေ့ကို ၂၀၂၅ ခုနှစ်၊ မတ် ၃၁ ရက်မတိုင်မီ UNESCO တင်သွင်းမည်ဟု မြန်မာနိုင်ငံ အမျိုးသားဒြပ်မဲ့ယဉ်ကျေးမှုအမွေအနှစ်ထိန်းသိမ်းမြှင့်တင်ရေးကော်မတီ ဥက္ကဋ္ဌ၊ သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီးဦးတင်ဦးလွင်ကပြောသည်။
ဖေဖော်ဝါရီ ၅ ရက်နံနက် ၁၀ နာရီကကျင်းပသည့် မြန်မာ့သနပ်ခါးယဉ်ကျေးမှုဓလေ့နှင့်ပတ်သက်၍ ကမ္ဘာ့ဒြပ်မဲ့ယဉ်ကျေးမှုအမွေအနှစ်စာရင်းတင်သွင်းမည့် အချက်အလက်များကို အမျိုးသားဒြပ်မဲ့ ယဉ်ကျေးမှုအမွေအနှစ်ပညာရှင်အဖွဲ့ဝင်များနှင့်ညှိနှိုင်းဆွေးနွေးစဉ် ပြောကြားခဲ့ခြင်းဖြစ်သည်။
၂၀၂၅ ခုနှစ်တွင် မြန်မာနိုင်ငံမှ မြန်မာ့သနပ်ခါး ယဉ်ကျေးမှုဓလေ့ကို ကမ္ဘာ့ဒြပ်မဲ့ယဉ်ကျေးမှု အမွေအနှစ်စာရင်းတင်သွင်းရာ၌ ဘက်စုံထောင့်စုံ ပြည့်ပြည့်စုံစုံဖြင့် ဟာကွက်မရှိအောင်ရေးသား ပြုစုတင်သွင်းရမည်ဟု မှာကြားသည်။
” ဒြပ်ရှိယဉ်ကျေးမှုအမွေအနှစ်ဖြစ်တဲ့ ရှေးဟောင်းအဆောက်အအုံတွေ၊ ရှေးဟောင်းဝတ္ထု ပစ္စည်းတွေကို ရေရှည်တည်တံ့အောင် နည်းပညာတွေနဲ့ ထိန်းသိမ်းစောင့်ရှောက်နိုင်ပေမယ့် ဒြပ်မဲ့ယဉ်ကျေးမှုအမွေအနှစ်တွေကိုတော့ မိမိတို့ကိုယ်တိုင်အလေးထားရမှာဖြစ်တဲ့အပြင် လူငယ်တွေကိုပါ လက်ဆင့်ကမ်းတန်ဖိုးထားတတ်စေမှသာ ရေရှည်တည်တံ့မှာဖြစ်ပါတယ်။ အဲဒီလိုထိန်းသိမ်းဖို့က နိုင်ငံသားတိုင်းရဲ့သမိုင်းပေးတာဝန် ဖြစ်ပါတယ်”ဟု ပြည်ထောင်စုဝန်ကြီးဦးတင်ဦးလွင်က ပြောသည်။
ထို့ပြင် မြန်မာနိုင်ငံသူ၊ နိုင်ငံသားများနှစ်သက်ခုံမင်စွာ ရှေးနှစ်ပေါင်းများစွာကပင် အစဉ်အဆက် သုံးစွဲလာခဲ့သည့် မြန်မာ့သနပ်ခါးယဉ်ကျေးမှုဓလေ့ကို ၂၀၂၅ ခုနှစ်တွင် UNESCO တင်သွင်းသွားမည်ဖြစ်ကာ သနပ်ခါးကို မြန်မာတိုင်းရင်းသားများသာမက မြန်မာနိုင်ငံ၌ မှီတင်းနေထိုင်သော အခြားလူမျိုးများပါနှစ်ခြိုက်စွာအသုံးပြုကြသည်ဟု ပြောသည်။
” နိုင်ငံအတွက်တန်ဖိုးမဖြတ်နိုင်တဲ့ ဒြပ်မဲ့ယဉ်ကျေးမှုအမွေအနှစ်တွေကို ထိန်းသိမ်းတဲ့အနေနဲ့ နိုင်ငံတော်အစိုးရက နှစ်စဉ်တပို့တွဲလပြည့်နေ့ကို “မြန်မာ့သနပ်ခါးနေ့”အဖြစ် သတ်မှတ်ခဲ့ပါတယ် “ဟု ပြည်ထောင်စုဝန်ကြီးဦးတင်ဦးလွင်က ပြောသည်။
ထို့ကြောင့် ကမ္ဘာ့ဒြပ်မဲ့ယဉ်ကျေးမှုအမွေအနှစ်စာရင်းတင်သွင်းမည့် “မြန်မာ့သနပ်ခါးယဉ်ကျေးမှုဓလေ့ကို မြန်မာ့ရိုးရာအတာသင်္ကြန်ကဲ့သို့ အောင်မြင်စွာတင်သွင်းနိုင်ရေးအတွက် လစ်ဟာမှုမရှိရအောင်ကြိုးပမ်းဆောင်ရွက်သွားရမည်ဟုလည်း ပြည်ထောင်စုဝန်ကြီးဦးတင်ဦးလွင်က မှာကြားခဲ့သည်။