မြန်မာနိုင်ငံဆိုင်ရာ ဗြိတိန်သံအမတ်ဟောင်းနှင့် ခင်ပွန်းဖြစ်သူ ပန်းချီထိန်လင်းတို့ ထိန်းသိမ်းခံရ
မြန်မာနိုင်ငံဆိုင်ရာ ဗြိတိန်သံအမတ်ဟောင်း မစ္စ ဗစ်ကီဘိုးမန်းနှင့် ခင်ပွန်းဖြစ်သူ ပန်းချီဆရာ ထိန်လင်းတို့ကို စစ်ဆေးမေးမြန်းစရာရှိသည်ဟုဆိုကာ စစ်တပ်က ထိန်း သိမ်းထားကြောင်း နီးစပ်သူများထံမှ သိရသည်။
ယမန်နေ့ သြဂုတ် (၂၄) ရက် ညပိုင်းက ရန်ကုန်မြို့ရှိ ၄င်းတို့၏ နေအိမ်တွင် လာရောက် ခေါ်ဆောင်သွားခြင်းဖြစ်ကြောင်း ပန်းချီထိန်လင်း၏ မိတ်ဆွေဖြစ်သည့် ရန်ကုန်မြို့မှ ပန်း ချီဆရာတစ်ဦးက ပေါ်ပြူလာနယူး(စ်)သို့ အတည်ပြုသည်။
“ဟုတ်ပါတယ်။ မနေ့ညပိုင်းက လာခေါ်သွားတာပေါ့နော်။ ဖမ်းတာတော့ သူ့မိန်းမကို လာ ခေါ်တာပေါ့။ အဲဒီမှာ ဆရာထိန်ကပါ လိုက်သွားတာလို့ ပြောတယ်။ ပြောတာတော့ သူ့မိန်းမရဲ့ ဗီဇာ ကိစ္စ စစ်ဆေးမေးမြန်းစရာ ရှိတယ်ဆိုပြီး လာခေါ်တယ်လို့ပြောတယ်။အခုနောက်ဆုံးအခြေအနေကတော့ ဘယ်မှာ ရှိတယ် ၊ ဘာတွေ ဖြစ်နေတယ်ဆိုတာ မသိရသေးဘူး” ဟု အဆိုပါ ပန်းချီဆရာက ပြောသည်။
မစ္စဗစ်ကီဘိုးမန်းသည် မြန်မာနိုင်ငံဆိုင်ရာ ဗြိတိန်သံအ မတ်အဖြစ်မှ အငြိမ်းစားယူထားသည်မှာ ဆယ်စုနှစ် တစ်ခုကြာမြင့်ပြီဖြစ်ပြီး မြန်မာနိုင်ငံတွင် ခင်ပွန်းဖြစ်သူနှင့် အခြေချနေထိုင်နေသူ တစ်ဦး ဖြစ်သည်။
၎င်း၏ ခင်ပွန်း ဖြစ်သူ ပန်းချီထိန်လင်းသည် ABSDF တပ်ဖွဲ့ဝင်ဟောင်း တစ်ဦးဖြစ်ပြီး နိုင်ငံရေး ပုဒ်မများဖြင့် နှစ်ရှည်ထောင်ဒဏ် ကျခံခဲ့ရဖူးသူဖြစ်ပြီး မြန်မာနိုင်ငံ၏ ပန်းချီလောကတွင် လူသိများသည့်ပညာရှင် တစ်ဦးလည်း ဖြစ်သည်။
ဗြိတိန် သံအမတ်ဟောင်း မစ္စဗစ်ကီဘိုးမန်းသည် မြန်မာ နိုင်ငံတွင် အခြေချနေထိုင်နေစဉ်အတွင်း ၂၀၁၄ ခုနှစ်၌ မြန်မာ့စီးပွားရေးကဏ္ဍ တာဝန်ယူမှုရှိရေး အထောက်အ ကူပြုဌာန (Myanmar Centre for Responsible Business – MCRB) ကို ဦးဆောင်တည်ထောင်ကာ ဦးစီးလုပ် ဆောင်နေသူ တစ်ဦး ဖြစ်သည်။
မြန်မာနိုင်ငံနှင့် ဗြိတိန်နိုင်ငံတို့အကြား သံတမန်ရေး တင်း မာမှုများရှိနေချိန်တွင် သံတမန်ဟောင်းတစ်ဦးလည်းဖြစ် ဗြိတိန်နိုင်ငံသူ တစ်ဦးလည်းဖြစ်သည့် မစ္စဗစ်ကီဘိုးမန်း ဖမ်းဆီးခံရမှုအပေါ် စိုးရိမ်မှုများရှိကြောင်းလည်း ဗြိတိန်သံရုံးအသိုင်းအဝိုင်းက နိုင်ငံတကာ မီဒီယာတစ်ခုကို ဖြေ ကြားထားသည်။