မြန်မာ-အိန္ဒိယနှစ်နိုင်ငံကြား ပူးပေါင်းဆောင်ရွက်နိုင်သည့်နယ်ပယ်များကို တတ်နိုင်သည့်ဘက်မှ အင်တိုက် အားတိုက်ပါဝင်ဆောင်ရွက်ရန် နိုင်ငံတော်သမ္မတ ဦးမင်းအောင်လှိုင်က ယနေ့ မေ ၃၀ ရက်တွင် အိန္ဒိယနိုင်ငံဆိုင်ရာ သံရုံး၊ စစ်သံရုံး မိသားစုများ၊ ပညာတော်သင် သင်တန်းသားများအား အိန္ဒိယနိုင်ငံဆိုင်ရာ မြန်မာသံရုံး၌တွေ့ဆုံစဥ် မှာကြားခဲ့ခြင်းဖြစ်သည်။
ပြည်ပနိုင်ငံတွင်ရောက်ရှိနေချိန်အတွင်းရရှိသည့် အားလပ်ချိန်များတွင် အင်္ဂလိပ်စာနှင့် ကွန်ပျူတာနည်းပညာ ပိုင်းဆိုင်ရာများကို တစ်ဦးချင်းလေ့လာရန်လိုအပ်ကာ နောင်တစ်ချိန်တွင် တိုင်းပြည်အတွက်စွမ်းဆောင်နိုင်သူများဖြစ်ရန်မျှော်လင့်သည်ဟု ပြောသည်။
ထို့ပြင် မြန်မာ-အိန္ဒိယနှစ်နိုင်ငံကြား ပူးပေါင်းဆောင်ရွက်နိုင်သည့်နယ်ပယ်များကို တတ်နိုင်သည့်ဘက်မှ အင်တိုက် အားတိုက် ပါဝင်ဆောင်ရွက်စေလိုကာ မြန်မာနိုင်ငံဖွံ့ဖြိုးတိုးတက်ရေးအတွက် အိန္ဒိယနိုင်ငံတွင်တာဝန်ထမ်းဆောင်လျက်ရှိသည့် သံရုံး၊ စစ်သံရုံးမိသားစုများအနေဖြင့် တတ်နိုင်သည့်ဘက်မှဝိုင်းဝန်းဆောင်ရွက်ရန်၊ ယခုကဲ့သို့ ပြည်ပတွင်နေထိုင်ရချိန်ကာလအတွင်း နိုင်ငံ့ဝန်ထမ်းများဖြစ်ပြီး နိုင်ငံ့အတွက်ဆောင်ရွက်နေသည့်စိတ်ဖြင့် စည်းစည်းလုံးလုံးနေထိုင်ရန်လည်း မှာကြားသည်။
အိန္ဒိယနိုင်ငံသည် ပူပြင်းသည့်ရာသီဥတုသို့ရောက်ရှိနေပြီဖြစ်၍ တစ်ဦးချင်း၏ ကျန်းမာရေးကို ဂရုစိုက်ရန်မှာကြားပြီးနောက် လိုအပ်ချက်များကို မေးမြန်းဖြည့်ဆည်းပေးပြီး သံရုံး၊ စစ်သံရုံးမိသားစုများ၊ ပညာတော်သင် သင်တန်းသားအရာရှိများအတွက် စားသောက်ဖွယ်ရာများနှင့် ဂုဏ်ပြုချီးမြှင့်ငွေများကိုပေးအပ်ခဲ့သည်။
ထို့နောက် နိုင်ငံတော်သမ္မတသည် အိန္ဒိယနိုင်ငံဆိုင်ရာ မြန်မာနိုင်ငံသံရုံး၊ စစ်သံရုံး မိသားစုများက တည်ခင်းဧည့်ခံသည့် ညစာအား မိသားစုများနှင့်အတူတကွ သုံးဆောင်ခဲ့သည်။