မြစ်ကြီးနား-ရွှေဘို ကားလမ်းနှင့် မီးရထားလမ်းပေါ်ရှိ မဲဇာနှင့် နန့်သဲကျေးရွာများကို တပ်မတော် ပြန်လည်ထိန်းချုပ်

အင်းတော်မြို့ကို ဧပြီလကုန်ပိုင်းတွင် ပြန်လည်ထိန်းချုပ်နိုင်ခဲ့ပြီးနောက် တပ်မတော်စစ်ကြောင်းများသည် အနီးပတ်ဝန်းကျင်ကျေးရွာများရှိ လက်နက်ကိုင်ပူးပေါင်းအဖွဲ့များ၏ ယာယီစခန်းများကို ဆက်လက်ရှင်းလင်းလျက်ရှိရာ ဇူလိုင် ၄ ရက်တွင် မြစ်ကြီးနား-ရွှေဘို လမ်းပိုင်းရှိ အရေးပါသည့် ကျေးရွာနှစ်ရွာကို ထပ်မံပြန်လည်ထိန်းချုပ်နိုင်ခဲ့ကြောင်း သိရသည်။

ပြန်လည်ထိန်းချုပ်နိုင်ခဲ့သည့် နေရာများမှာ မြစ်ကြီးနား-ရွှေဘို မီးရထားလမ်းပေါ်ရှိ မဲဇာကျေးရွာနှင့် မြစ်ကြီးနား-ရွှေဘို ကားလမ်းပေါ်ရှိ နန့်သဲကျေးရွာတို့ဖြစ်ပြီး လမ်းပန်းဆက်သွယ်ရေးအရ အချက်အချာကျသည့် နေရာများဖြစ်ကြောင်း သိရသည်။

တပ်မတော်၏ နယ်မြေလုံခြုံရေးစစ်ကြောင်းများသည် ဇွန် ၂၇ ရက်မှစတင်၍ နတ်မဟုတ်လေး၊ ဆည်ရွာ၊ လယ်နောင်၊ နတ်မဟုတ်ကြီးနှင့် သံဘိုကျေးရွာများအနီးတွင် အဆင့်ဆင့် စစ်ဆင်ရေးများ ဆောင်ရွက်ခဲ့ပြီးနောက် ဇူလိုင် ၄ ရက် ညနေပိုင်းတွင် မဲဇာနှင့် နန့်သဲကျေးရွာတို့ကို အသီးသီး ပြန်လည်ထိန်းချုပ်နိုင်ခဲ့ခြင်းဖြစ်ကြောင်း သိရသည်။

နယ်မြေစိုးမိုးရေးစစ်ဆင်ရေးအတွင်း နှစ်ဖက်ထိတွေ့တိုက်ပွဲကြီးငယ် စုစုပေါင်း ၃၂ ကြိမ် ဖြစ်ပွားခဲ့ပြီး လုံခြုံရေးဘက်၏ ပြောကြားချက်အရ တို-က်ပွဲများအတွင်း လက်နက်ကိုင်အဖွဲ့ဝင် ၇ ဦး၏ အလောင်းများ၊ လေယာဉ်ပ-စ်စက်‌ေ-သနတ်အပါအဝင် လက်နက်မျိုးစုံ ၁၂ လက်၊ မော်တော်ယာဉ် ၂ စီး၊ Drone များနှင့် ခဲယမ်းမီးကျောက်အများအပြားကို သိမ်းဆည်းရမိခဲ့ကြောင်း သိရသည်။

ကျေးရွာများကို ပြန်လည်ထိန်းချုပ်နိုင်ပြီးနောက် တပ်မတော်အနေဖြင့် နယ်မြေလုံခြုံရေးလုပ်ငန်းများကို ဆက်လက်ဆောင်ရွက်သွားမည့်အပြင် ရပ်ဆိုင်းခဲ့ရသည့် ဒေသခံပြည်သူများ၏ ပညာရေး၊ ကျန်းမာရေးနှင့် ဒေသပြန်လည်ထူထောင်ရေးလုပ်ငန်းများကို ဦးစားပေး အကောင်အထည်ဖော်ဆောင်ရွက်သွားရန် စီစဉ်ထားကြောင်း သိရသည်။