အကြမ်းဖက်သမားများသည် မူးယ-စ်ဆေးဝါးထုတ်လုပ်ခြင်းမှရရှိသော အရင်းအမြစ်များဖြင့် အကြမ်းဖက်လုပ်ရပ်များကိုလုပ်ဆောင်နေခြင်းဖြစ်၍ မူး-ယစ်ဆေးဝါးနှင့်ပတ်သက်လာပါက ပြတ်ပြတ်သားသားနှိမ်နှင်းရန် နစက ဥက္ကဋ္ဌ၊ တပ်မတော်ကာကွယ်ရေးဦးစီးချုပ်၊ ဗိုလ်ချုပ်မှူးကြီးမင်းအောင်လှိုင်က မှာကြားသည်။
၎င်းမှ ဖေဖော်ဝါရီ ၂၁ ရက်မွန်းလွဲပိုင်းက အရှေ့ပိုင်းတိုင်းစစ်ဌာနချုပ်၊ တပ်မတော် (ကြည်း)တိုက်ခိုက်ရေးကျောင်း(ဗထူး)မှ နည်းပြများနှင့် သင်တန်းသားအရာရှိများအားတွေ့ဆုံ၍ အမှာစကားပြောကြားစဥ် ထည့်သွင်းမှာကြားခဲ့ခြင်းဖြစ်သည်။
မူးယ-စ်ဆေးဝါးနှင့် ပတ်သက်၍ ထုတ်လုပ်ခြင်း၊ သိုလှောင်ခြင်း၊ သယ်ဆောင်ဖြန့်ဖြူးခြင်းတို့၏ ကွင်းဆက်များကို ဖိဖိစီးစီးဖြင့်ဖော်ထုတ်နှိမ်နှင်းသွားရမည်ဖြစ်ကာ ရှမ်းပြည်နယ်အတွင်း မူးယ-စ်ဆေးဝါးများထုတ်လုပ်ခြင်းမရှိစေရန် သက်ဆိုင်ရာနယ်မြေအလိုက်တာဝန်ရှိသူများက အလေးထားကြပ်မတ်ဆောင်ရွက်ရမည်ဟု မှာကြားသည်။
” အကြမ်းဖက်သမားတွေအနေနဲ့ မူး-ယစ်ဆေးဝါးထုတ်လုပ်တာကနေရရှိလာတဲ့ အရင်းအမြစ်တွေနဲ့ အကြမ်းဖက်လုပ်ရပ်တွေကို လုပ်ဆောင်နေကြတာကြောင့် မူး-ယစ်ဆေးဝါးနဲ့ပတ်သက်ရင် ပြတ်ပြတ်သားသားနှိမ်နှင်းရပါမယ်”ဟု ဗိုလ်ချုပ်မှူးကြီးမင်းအောင်လှိုင်က မှာကြားသည်။
ထို့ပြင် နယ်မြေခံတပ်များအနေဖြင့် လုံခြုံရေးနှင့်ပတ်သက်ပါက အရပ်ဘက်အုပ်ချုပ်ရေးအဖွဲ့အစည်းများနှင့် ပူးပေါင်းဆောင်ရွက်ရမည်ဖြစ်ကာ လုံခြုံရေးအသိ၊ လုံခြုံရေးသတိဖြင့် ဆောင်ရွက်ရမည်ဖြစ်ပြီး မိမိတို့တာဝန်ထမ်းဆောင်ရသည့်နယ်မြေဒေသအလိုက် ဒေသနှင့်ဒေသခံများ၏ အကျိုးစီးပွားများမထိခိုက်အောင် အထူးဂရုပြုဆောင်ရွက်ရမည်ဟု မှာကြားသည်။
ထို့အတူ လုံခြုံရေးသည် တစ်ဦးချင်းဆောင်ရွက်၍ရနိုင်သည့်ကိစ္စရပ်ဖြစ်ပြီး ကာကွယ်ရေးသည် ကြီးကြပ်ကွပ်ကဲသူများက ရေရှည်စီမံချက်များ၊ ကြိုတင်မျှော်တွေးခြင်းများ၊ ပေါင်းစပ်ညှိနှိုင်းခြင်းများဖြင့်ဆောင်ရွက်ရသည့်ကိစ္စဖြစ်ရာ မိမိတို့တာဝန်ထမ်းဆောင်ရသည့် ဒေသတွင်းလုံခြုံရေးနှင့်ကာကွယ်ရေးတာဝန်များကို ထမ်းဆောင်ရာတွင် အမျိုးသားအကျိုးစီးပွားကိုထိခိုက်စေနိုင်သည်မှန်သမျှကို ကာကွယ်နိုင်ရေးအမြင်ကျယ်ကျယ်ဖြင့်ဆောင်ရွက်ရမည်ဟုလည်း မှာကြားခဲ့သည်။
ထို့နောက် နစက ဥက္ကဋ္ဌသည် ဗထူးတပ်နယ်အ တွင်းရှိ တပ်မတော်(ကြည်း)တိုက်ခိုက်ရေးကျောင်း(ဗထူး)၌ သင်တန်းသားရေကူးကန်နှင့် ဗထူးစမ်းထိန်းသိမ်းထားရှိမှုတို့ကို ကြည့်ရှုစစ် ဆေးခဲ့သည်။