ရန်ကုန်၊ စက်တင်ဘာ ၂၁
မိုဘိုင်းဖုန်း IMEI မှတ်ပုံတင်ခြင်းဆိုင်ရာ လုပ်ငန်းများ ဆောင်ရွက်ပေးနေသည့် CEIR OSS (YGN) ရုံးကို ရန်ကုန်မြို့၊ ပန်းဆိုးတန်းလမ်းနှင့် ကုန်သည်လမ်းထောင့်ရှိ ပြည်တွင်းအခွန်များဦးစီးဌာန E-Service ရုံးသို့ ယနေ့ စက်တင်ဘာ ၂၁ ရက်မှစတင်၍ နေရာပြောင်းရွှေ့ဖွင့်လှစ်ထားကြောင်း သိရသည်။
ယခင်က အကောက်ခွန်ဦးစီးဌာန (ရုံးချုပ်) တွင် ဖွင့်လှစ်ထားသည့် CEIR OSS (YGN) ရုံးကို အမှတ် (၅၉/၆၁)၊ မြေညီထပ်၊ ပန်းဆိုးတန်းလမ်းနှင့် ကုန်သည်လမ်းထောင့်ရှိ E-Service ရုံးသို့ ပြောင်းရွှေ့ဖွင့်လှစ်ခဲ့ခြင်းဖြစ်သည်။
CEIR OSS (YGN) သည် Central Equipment Identity Register One Stop Service ရုံးဖြစ်ပြီး ပြည်ပမှ တရားဝင်တင်သွင်းလာသည့် လက်ကိုင်ဖုန်းများနှင့် ပြည်ပမှ ပြန်လည်ဝင်ရောက်လာသူများ ယူဆောင်လာသည့် လက်ကိုင်ဖုန်းများ၏ IMEI နံပါတ်များကို ကွန်ရက်စနစ်အတွင်း မှတ်ပုံတင်ပေးခြင်းနှင့် သက်ဆိုင်ရာ အကောက်ခွန်ကိစ္စရပ်များကို တစ်နေရာတည်းတွင် ဆောင်ရွက်ပေးလျက်ရှိသည်။
ပြည်ပမှ ဝယ်ယူယူဆောင်လာသည့် လက်ကိုင်ဖုန်းများကို မြန်မာနိုင်ငံရှိ မိုဘိုင်းကွန်ရက် SIM ကတ်များနှင့် ချိတ်ဆက်အသုံးပြုနိုင်ရန် IMEI နံပါတ်မှတ်ပုံတင်ပေးခြင်းအပြင် သတ်မှတ်အရေအတွက်ထက် ပိုမိုယူဆောင်လာသည့် သို့မဟုတ် ကူးသန်းရောင်းဝယ်ရေးအတွက် တင်သွင်းလာသည့် ဖုန်းများအတွက် သက်ဆိုင်ရာ အကောက်ခွန်နှင့် အခွန်အခများကို တွက်ချက်ကောက်ခံပေးခြင်းများလည်း ဆောင်ရွက်ပေးကြောင်း သိရသည်။
ထို့ပြင် IMEI မှတ်ပုံတင်ထားခြင်းမရှိသဖြင့် မိုဘိုင်းကွန်ရက်အသုံးပြု၍ မရသည့် ဖုန်းများကိုလည်း လိုအပ်သလို စိစစ်ကာ သတ်မှတ်ချက်များနှင့် ကိုက်ညီပါက ပြန်လည်အသုံးပြုနိုင်ရေး ဆောင်ရွက်ပေးလျက်ရှိကြောင်း သိရသည်။