မန္တလေးတိုင်းဒေသကြီးအတွင်း တစ်ပိုင်တစ်နိုင်နှင့် မိသားစုစီးပွားရေးလုပ်ငန်း ၃,၆၆၄ ခုကို လုပ်ငန်းမှတ်ပုံတင် စီစစ်ခွင့်ပြုထုတ်ပေးထားကြောင်း တိုင်းဒေသကြီး အသေးစားစက်မှုလက်မှုလုပ်ငန်းဦးစီးဌာနမှ သိရသည်။
ထုတ်ကုန်ပစ္စည်းများကို ဈေးကွက်အတွင်း တင်သွင်းရောင်းချနိုင်ရန်၊ လုံခြုံစိတ်ချမှုရှိစေရန်၊ ပြည်ပသွင်းကုန်အစားထိုး ကုန်ပစ္စည်းများ ပေါ်ထွက်လာစေရန်၊ ကုန်ကြမ်းမှ တန်ဖိုးမြင့်ထုတ်ကုန်များ ထုတ်လုပ်လာနိုင်စေရန် စသည့် ရည်ရွယ်ချက်များဖြင့် လုပ်ငန်းမှတ်ပုံတင် ခွင့်ပြုပေးခြင်းဖြစ်ဟု တိုင်းဦးစီးမှူး ဦးဝင်းဗိုလ်က ပြောသည်။
“မှတ်ပုံတင်လာရောက်လျှောက်ထားတဲ့ လုပ်ငန်းရှင်တွေအနေနဲ့ သူတို့ရဲ့ ထုတ်လုပ်မှုလုပ်ငန်းပိုင်းတွေမှာ နည်းပညာပိုင်းဆိုင်ရာ အခက်အခဲတွေ ရှိရင် အသေးစားစက်မှုလက်မှုလုပ်ငန်းဦးစီးဌာနကနေ လုပ်ငန်းတွေ အောင်မြင်အောင် နည်းပညာပိုင်းမှာလည်း ပံ့ပိုးပေးလျက်ရှိပါတယ်”ဟု ဆိုသ ည်။
ထို့အပြင် မှတ်ပုံတင်လုပ်ငန်းရှင်များ၏ ထုတ်ကုန်ပစ္စည်းများကို ဈေးကွက်အတွင်း အောင်မြင်စွာ ရောင်းချနိုင်ရန်အတွက် City Mart ၊ Junction ၊ Ocean စသည့် Shopping Centre များနှင့် ချိတ်ဆက်ကာ ဈေးကွက်ရရှိရေး ဆောင်ရွက်ပေးနေသလို ပြည်တွင်း၊ ပြည်ပကုန်စည်ပြပွဲများတွင် ပြသနိုင်ရေးအတွက် ချိတ်ဆက်ပေးလျက်ရှိကြောင်း သိရသည်။
“အဲ့လိုဆောင်ရွက်ပေးနိုင်ဖို့အတွက် လုပ်ငန်းရှင်တွေကို တရားဝင်ဖြစ်အောင် လုပ်ငန်းမှတ်ပုံတင်တွေ ပြုလုပ်ပေးခြင်း ဖြစ်ပါတယ်”ဟု တိုင်းဦးစီးမှူးက ဆိုသည်။
မန္တလေးတိုင်းဒေသကြီးတွင် စားသောက်ကုန်လုပ်ငန်းများ၊ နေထိုင်ရေးလုပ်ငန်းများ၊ လူသုံးကုန်လုပ်ငန်းများ၊ စိုက်ပျိုးရေးဆိုင်ရာ လုပ်ငန်းများ၊ လျှပ်စစ်ပစ္စည်းဆိုင်ရာ လုပ်ငန်းများနှင့် သစ်အခြေခံနှင့် ပရိဘောဂလုပ်ငန်းကဲ့သို့ အထွေထွေလုပ်ငန်းများ အများဆုံး မှတ်ပုံတင်ပြုလုပ်လျက်ရှိကြောင်း သိရသည်။
“City Mart တို့၊ Ocean တို့မှာ သူတို့ရဲ့ စားသောက်ကုန်တွေအနေနဲ့ တင်သွင်းရောင်းချမယ်ဆိုရင် အသေးစားစက်မှုလက်မှုလုပ်ငန်းဦးစီးဌာနရဲ့ လုပ်ငန်းမှတ်ပုံတင်တို့၊ ဓာတ်ခွဲစမ်းသပ်စစ်ဆေးထားတဲ့ အဖြေတို့ ပါရှိမှသာ သူတို့က လက်ခံတာဖြစ်တဲ့အတွက်ကြောင့် လုပ်ငန်းရှင်တွေအနေနဲ့ သူတို့ရဲ့ ထုတ်ကုန်ပစ္စည်းတွေအနေနဲ့ လုံခြုံစိတ်ချစွာနဲ့ ဈေးကွက်မှာ ဖြန့်ဖြူးတင်ပို့ရောင်းချနိုင်မှာ ဖြစ်ပါတယ်”ဟု ဦးဝင်းဗိုလ်က ဆက်လက်ပြောကြားသည်။
လုပ်ငန်းမှတ်ပုံတင် တစ်ခု၏ သက်တမ်းမှာ (၂) နှစ်ဖြစ်ပြီး (၂) နှစ်တစ်ကြိမ် သက်တမ်းတိုး ဆောင်ရွက်ရမည်ဖြစ်သည်။