ထိုင်း-မြန်မာနယ်စပ် ဘုရားသုံးဆူမြို့တွင် ထိုင်းနိုင်ငံဘက်မှ လျှပ်စစ်မီးဖြတ်တောက်လိုက်ပြီးနောက်ပိုင်း သောက်ရေသန့်စက်ရုံများ မလည်ပတ်နိုင်သဖြင့် သောက်သုံးရေ ပြတ်လပ်မှုများဖြစ်ပွားနေကြောင်း ဒေသခံများထံက သိရသည်။
လျှပ်စစ်မီးအခက်အခဲကြောင့် သောက်ရေသန့်စက်ရုံများ ရေမတင်နိုင်ခြင်း၊ ရေသန့်စက် မလည်ပတ်နိုင်ခြင်းတို့ကြောင့် ဒေသတွင်း ရေသန့်ဖြန့်ဖြူးရောင်းချနိုင်ခြင်း မရှိတော့ခြင်းဖြစ်သည်ဟု လုပ်ငန်းရှင်တစ်ဦးကပြောသည်။
“လျှပ်စစ်မီးရမှ လုပ်နိုင်မယ့် လုပ်ငန်းတွေအားလုံး ရပ်ကုန်တာ။ မဖြစ်မနေ လိုအပ်တဲ့ ထဲမှာ ရေသန့်လုပ်ငန်းတွေလည်း ပါနေတော့ အခု တွင်းရေကိုဘဲ အားပြု သောက်နေရတာပေါ့။ အားလုံးပြတ်နေတာမျိုး မဟုတ်ပေမယ့် ရှားပါးလာတာပေါ။ အခု ဆိုလာမီးနဲ့ လုပ်ဖို့တော့ စီစဉ်နေကြတယ်”ဟု ၎င်းကပြောသည်။
ဘုရားသုံးဆူမြို့အတွက် လျှပ်စစ်မီးဖြန့်ဖြူးပေးနေသည့် မြပန်းကုမ္ပဏီက မီးစက်နှင့် ဆိုလာပြားကို အလှည့်ကျအသုံးပြု၍ ရေသန့်စက်ရုံများလည်ပတ်နိုင်ရေး စီစဉ်နေပြီး၊ လတ် တလော မြို့တွင်း လျှပ်စစ်မီးရရှိရေးအတွက်ကိုမူ မလုပ်ဆောင်သေးဘဲ သီးခြားလုပ်ဆောင်သွားရန်စီစဉ်နေကြောင်း ဆိုသည်။
ထိုင်းနိုင်ငံဘက်မှ လျှပ်စစ်မီးနှင့် လောင်စာဆီ ဖြတ်တောက်ခဲ့ခြင်းကြောင့် ဘုရားသုံးဆူမြို့နေ ပြည်သူများ သောက်သုံးရေအပြင် လျှပ်စစ်မီးပြတ်တောက်မှုနှင့် ဆက်နွယ်သော လူမှုစီးပွားထိခိုက်နစ်နာမှုများ ခံစားနေကြရခြင်းဖြစ်သည်။
လက်ရှိတွင် တရားမဝင် အွန်လိုင်းငွေကြေးလုပ်ငန်များအမြစ် ပြတ်နှိမ်နှင်းရန် ထိုင်းနိုင်ငံဘက်က ပေးထားသည့် လျှပ်စစ်မီး အပါအဝင် စက်သုံးဆီနှင့် အင်တာနက်လိုင်းများကို ဖြတ်တောက်ထားပြီး အဆိုပါ လုပ်ငန်းများပပျောက်ရေးအတွက် ဒီမိုကရေစီအကျိုးပြု ကရင့်တပ်မတော် (DKB A )က ပူးပေါင်းပါဝင်ကာ အရေးယူဖမ်းဆီးခြင်းနှင့် ထိုင်းနိုင်ငံဘက်သို့ ပြန်လည် ပို့ဆောင်ခြင်းများ ဆောင်ရွက်လျှက်ရှိသည်။
ပြီးခဲ့သည့် ရက်ပိုင်းက ကျောက်ခက်ဒေသ ဒီမိုကရေစီအ ကျိုးပြု ကရင့်တပ်မတော် (DKBA) ထိန်းချုပ်နယ်မြေရှိ ကျားဖြန့်လုပ်ငန်းများသို့ ရောက်ရှိနေသည့် နိုင်ငံခြားသား (၂၆၁)ဦးကို ထိုင်းနိုင်ငံသို့ လွှဲပြောင်းပေးအပ်ခဲ့သေးသည်။
ထို့ပြင် ဘုရားသုံးဆူမြို့အတွင်း တရားမဝင် ဝင်ရောက်ကာ စားသောက်ကုန် ရောင်းချခြင်း၊ ကာစီနိုလောင်းကစားရုံလု ပ်ငန်းများနှင့် ဂိမ်းရုံများ လုပ်ကိုင်နေကြသည့် တရုတ်နိုင်ငံ သားများအနေဖြင့် ဖေဖော်ဝါရီလ (၂၈) ရက် မတိုင်မီ အမြန်ဆုံး ထွက်ခွာပေးကြရန်လည်း DKBA က ထုတ်ပြန်ထား သည်။