ပဲခူး၊ စက်တင်ဘာ ၅
ပဲခူးတိုင်းဒေသကြီး၊ ပဲခူးမြို့၌ မိုးသည်းထန်စွာရွာသွန်း၍ ပဲခူးမြစ်ရေ မြင့်တက်လာမှုကြောင့် မြေနိမ့်ပိုင်းရပ်ကွက်များအတွင်း ရေဝင်ရောက်ခဲ့သဖြင့် ရေဘေးသင့်ပြည်သူ ၅၀၀ ခန့်အား ဘေးလွတ်ရာ ယာယီကယ်ဆယ်ရေးစခန်းများသို့ ရွှေ့ပြောင်းနေရာချထားပေးခဲ့ကြောင်း သိရသည်။
မိုးလေဝသနှင့် ဇလဗေဒညွှန်ကြားမှုဦးစီးဌာန၏ တိုင်းတာချက်အရ ပဲခူးမြစ်၏ စိုးရိမ်ရေမှတ်မှာ ၈၈၀ စင်တီမီတာဖြစ်ပြီး စက်တင်ဘာ ၃ ရက် မွန်းလွဲပိုင်းတွင် မြစ်ရေမှာ ၉၂၄ စင်တီမီတာအထိ ရောက်ရှိခဲ့သဖြင့် စိုးရိမ်ရေမှတ်ထက် ၄၄ စင်တီမီတာအထိ ကျော်လွန်ခဲ့သည်။
မြစ်ရေမြင့်တက်မှုကြောင့် ကျွန်းသာယာ၊ ကလျာဏီ၊ ဇိုင်းတောင်နှင့် မဇင်းရပ်ကွက်တို့အတွင်း ရေဝင်ရောက်ခဲ့ရာ အိမ်ထောင်စု ၁၂၆ စုမှ လူဦးရေ ၄၉၄ ဦးကို နီးစပ်ရာ ဘုန်းတော်ကြီးကျောင်းများရှိ ဓမ္မာရုံများနှင့် ကျောင်းဆောင်များသို့ ရွှေ့ပြောင်းပေးခဲ့သည်။
ထိုသို့ ယာယီနေရာချထားရာတွင် ကျွန်းသာယာရပ်ကွက်မှ ၂၁၅ ဦးကို မင်္ဂလာဇေယျုံကျောင်း၌ လည်းကောင်း၊ မဇင်းရပ်ကွက်မှ ၁၂၇ ဦးကို လေးမျက်နှာဘုရားကျောင်းဝင်းနှင့် ဓမ္မိကာရာမကျောင်း၌ လည်းကောင်း၊ ဇိုင်းတောင်ရပ်ကွက်မှ ၉၅ ဦးကို ကျောင်းသစ်ကျောင်းနှင့် ဝင်္ဂဘာကျောင်း၌ လည်းကောင်း၊ ကလျာဏီရပ်ကွက်မှ ၅၇ ဦးကို ကလျာဏီသိမ်ကျောင်း၌ လည်းကောင်း အသီးသီး နေရာချထားပေးခဲ့သည်။
လက်ရှိတွင် ယာယီရွှေ့ပြောင်းနေရာချထားသည့် ရေဘေးသင့်ပြည်သူများအတွက် သက်ဆိုင်ရာ အုပ်ချုပ်ရေးအဖွဲ့အစည်းများ၊ လူမှုကူညီရေးအသင်းအဖွဲ့များနှင့် တာဝန်ရှိသူများက လိုအပ်သည့် ထောက်ပံ့ရေးနှင့် အနီးကပ်စောင့်ရှောက်ရေးလုပ်ငန်းများ ဆောင်ရွက်ပေးလျက်ရှိကြောင်း သိရသည်။