နေပြည်တော်၊ စက်တင်ဘာ ၅
ဝမ်းပျက်ဝမ်းလျှောရောဂါ ကာကွယ်ရေးအတွက် ကိုယ်စားလှယ်တည်းခိုရာနှင့် လွှတ်တော်အနီးရှိ စားသောက်ဆိုင်များ၏ အစားအသောက်နှင့် သောက်သုံးရေ သန့်ရှင်းမှုကို အထူးဂရုပြု စစ်ဆေးပေးရန်လိုအပ်ကြောင်း ပြည်ထောင်စုလွှတ်တော်နာယက ဦးအောင်လင်းဒွေး က ပြောကြားလိုက်သည်။
စက်တင်ဘာ ၄ ရက်က ကျင်းပသည့် လွှတ်တော်အစည်းအဝေးများ ကျင်းပရေးဗဟိုကော်မတီနှင့် လုပ်ငန်းကော်မတီများ လုပ်ငန်းညှိနှိုင်းအစည်းအဝေး (၂/၂၀၂၆) တွင် ပြည်ထောင်စုလွှတ်တော်နာယက က ထိုသို့ ထည့်သွင်းပြောကြားခဲ့ခြင်း ဖြစ်သည်။
ထို့ပြင် သယ်ယူပို့ဆောင်ရေးကော်မတီအနေဖြင့် ကိုယ်စားလှယ်များ လာရောက်ရာတွင် အဆင်ပြေစေရေး ဆောင်ရွက်ထားရန်နှင့် တည်းခိုရိပ်သာနှင့် လွှတ်တော်အကြား အသွား/အပြန် သယ်ယူပို့ဆောင်ရေးကို သက်ဆိုင်ရာ ကော်မတီများနှင့် အချိန်မီ ဆက်သွယ်ညှိနှိုင်း ဆောင်ရွက်ရန် လိုအပ်ကြောင်းလည်း ပြောကြားခဲ့သည်။
အလားတူ အခမ်းအနား ပြင်ဆင်ရေးကော်မတီအနေဖြင့် ခန်းမကြီးများ ပြုပြင်ထိန်းသိမ်းမှု၊ ပရဝဏ်သန့်ရှင်းရေး၊ မြို့ပြ၊ ရေသန့်၊ လျှပ်စစ်နှင့် ရုပ်သံပိုင်းဆိုင်ရာ ကောင်းမွန်စေရေးအတွက် ဌာနအချင်းချင်း ပူးပေါင်းဆောင်ရွက်သွားရမည် ဖြစ်သည်။
လာမည့် စက်တင်ဘာ ၂၁ ရက်တွင် တတိယပုံမှန်အစည်းအဝေးများကို စတင်ကျင်းပမည်ဖြစ်ပြီး လွှတ်တော်ကိုယ်စားလှယ်များအနေဖြင့် စက်တင်ဘာ ၁၈ ရက်မှ ၂၀ ရက်အတွင်း နေပြည်တော်သို့ ရောက်ရှိသတင်းပို့ကြရမည်ဖြစ်ကြောင်း သိရသည်။