ပင်လောင်း၊ စက်တင်ဘာ ၂
ရှမ်းပြည်နယ်၊ ပင်လောင်းမြို့နယ်၌ ကျပ် ၁ ဒသမ ၇၂ ဘီလီယံ တန်ဖိုးရှိ စိတ်ကြွဆေးပြားများ၊ ကမာရွတ်မြို့နယ်၌လည်း ကျပ် သိန်း ၁၀၀၀ တန်ဖိုးရှိ စိတ်ကြွဆေးပြားများကို ဖမ်းဆီးရမိခဲ့ကြောင်း မြန်မာနိုင်ငံ ရဲတပ်ဖွဲ့မှ သိရသည်။
ဖြစ်စဉ်မှာ ဩဂုတ် ၂၄ ရက်က မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့ ပါဝင်သော ပူးပေါင်းအဖွဲ့သည် သတင်းအရ ပင်လောင်းမြို့နယ်၊ လိန်းလီရွာအနီးတွင် ဇော်ဇော်အောင် (၅၅) နှစ် မောင်းနှင်ပြီး ပိုင်သူကျော် (ခ) ပိုင်သူ (၃၁) နှစ် လိုက်ပါလာသည့် NISSAN DUMP မော်တော်ယာဉ်ကို ရပ်တန့်စစ်ဆေးရာမှ စိတ်ကြွဆေးပြား ၃၄ ဒသမ ၄ သိန်း (ဒေသတန်ဖိုး ငွေကျပ် ၁ ဒသမ ၇၂ ဘီလီယံ) ဖမ်းဆီးရမိခဲ့ခြင်း ဖြစ်သည်။
ထို့ပြင် ဩဂုတ် ၂၉ ရက် ညနေပိုင်းတွင်လည်း ကမာရွတ်မြို့နယ်၊ (၅) ရပ်ကွက်၌ လမ်းလျှောက်လာသူ အောင်မျိုးမင်း (ခ) ကိုမျိုး (၃၈) နှစ်ကို စစ်ဆေးရှာဖွေရာမှ စိတ်ကြွဆေးပြား ၅၀,၀၀၀ (ဒေသတန်ဖိုး ငွေကျပ်သိန်း ၁၀၀၀) ထပ်မံ ဖမ်းဆီးရမိခဲ့သည်။
ယင်းသို့ မူးယစ်ဆေးဝါးများနှင့်အတူ ဖမ်းဆီးရမိသူများကို မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူဆောင်ရွက်လျက်ရှိကြောင်း သိရသည်။