နောက်တက်လာမည့် အစိုးရအနေဖြင့် NCA လက်မှတ်ရေးထိုးစဉ်ကရှိခဲ့သော ကတိကဝတ်များကိုဆက်လက်အကောင်အထည်ဖော်နိုင်ကြလိမ့်မည်ဟုယုံကြည်ကြောင်း တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် NCA (၁၀)နှစ်ပြည့် နှစ်ပတ်လည်နေ့အခမ်းအနား၌ NCA တွင်ပါဝင်လက်မှတ်ရေးထိုးခဲ့သူ ဦးအောင်မင်းက ပြောသည်။
NCA ကိုအကောင်အထည်ဖော်နိုင်ခြင်းဖြင့် ဒီမိုကရေစီအကူးအပြောင်းကို တည်တည်ငြိမ်ငြိမ်နှင့်လျှောက်လှမ်းနိုင်မည်ဖြစ်ကာ ပြည်သူလူထုလိုလားတောင့်တနေသော ငြိမ်းချမ်းရေးကိုလည်း ယူဆောင်ပေးနိုင်လိမ့်မည်၍ ရွေးကောက်ပွဲအပြီးတက်လာသည့် အစိုးရမှ ယင်းတာဝန်ကိုလက်ဆင့်ကမ်း ဆက်လက်ထမ်းဆောင်ရမည်ဟု ပြောသည်။
NCA စာချုပ်အားလက်မှတ်ရေးထိုးထားသည့် အစုအဖွဲ့များရှိနေသရွေ့ စာချုပ်အသက်ဝင်နေဦးမည်ဖြစ်ကာ စာချုပ်ချိုးဖောက်သူများရှိသော်လည်း ပျက်ပြယ်သွားတာမဟုတ်၍ စာချုပ်ကိုပြန်လည်လိုက်နာကြရန် အား လုံး၌တာဝန်ရှိပြီး စာချုပ်၏ဦးတည်ချက်ဖြစ်သော ဒီမိုကရေစီနှင့် ဖယ်ဒရယ်နိုင်ငံထူထောင်ရန်မှာ စာချုပ်တွင်လက်မှတ်ရေးထိုးထားသူများ၏ သမိုင်းပေးတာဝန်ဖြစ်သည်ဟု ပြောသည်။
” NCA ဆိုတာ ပစ်ခတ်တိုက်ခိုက်မှုရပ်စဲရေးစာချုပ်သက်သက်မဟုတ်ပါဘူး။ ဒီမိုကရေစီအကူးအပြောင်းကို တည်တည်ငြိမ်ငြိမ်နဲ့ အကောင်အထည်ဖော်နိုင်ဖို့ ရည်ရွယ်ထားတဲ့ လက်နက်ကိုင်တိုက်နေတဲ့ အင်အားစုတွေကြားက သဘောတူညီမှုတစ်ခုဖြစ်ပါတယ်။ ဒါကြောင့် NCA ကိုပစ်ပယ်ပြီး နောက်ထပ်သဘောတူညီချက်တစ်ခုရေးဆွဲမယ်ဆိုရင်တောင် NCA လောက်ပြည့်စုံဖို့မလွယ်ပါဘူး။ NCA ထဲက အနည်းဆုံး ၉၀ ရာခိုင်နူန်းကို အချက်အလက်အရမယူဘဲ နောက်ထပ်စာချုပ်တစ်ခုမဖြစ်နိုင်ပါဘူး”ဟု ဦးအောင်မင်းက ပြောသည်။
ထို့ကြောင့် NCA အား ဆက်လက်အကောင်အထည်ဖော်ရန် ရွေးကောက်ပွဲအပြီးတက်လာသည့်အစိုးရအတွက် မိမိတို့၏ မျှော်လင့်ချက်များ၊ ကတိကဝတ်များကို ဆက်လက်အကောင်အထည်ဖော်ရန် အကြံပြုချက်(၅)ချက်ကိုလည်း ဦးအောင်မင်းက အကြုံပြုပြောကြားခဲ့သည်။