တစ်ပိဿာ ကျပ် ၃၅,၀၀၀ မှ ၃၈,၀၀၀ အထိ ပေါက်ဈေးရှိ
ရှမ်းပြည်နယ်(တောင်ပိုင်း)တွင် စိုက်ပျိုးထွက်ရှိသည့် ကုလားအော်ငရုတ်သီးများမှာ ပြည်တွင်းဈေးကွက်အပြင် ထိုင်း၊ တရုတ်နှင့် အိန္ဒိယနိုင်ငံများမှ ဝယ်လိုအား မြင့်တက်လာခြင်းကြောင့် ယခုနှစ်အတွင်း ဈေးကောင်းရရှိလျက်ရှိကြောင်း စားသုံးသူရေးရာဦးစီးဌာနထံမှ သိရသည်။
လက်ရှိတွင် ကုလားအော်ငရုတ်သီး တစ်ပိဿာလျှင် ကျပ် ၃၅,၀၀၀ မှ ၃၈,၀၀၀ အထိ ပေါက်ဈေးရှိနေပြီး စိုက်ပျိုးထုတ်လုပ်သူများအတွက် အကျိုးအမြတ်ကောင်းများ ရရှိနေကြောင်း သိရသည်။
အောင်ပန်းဒေသသည် စိုက်ပျိုးရေးကို အခြေခံသည့်ဒေသတစ်ခုဖြစ်ပြီး သီးနှံမျိုးစုံ စိုက်ပျိုးထုတ်လုပ်လျက်ရှိရာ ကုလားအော်ငရုတ်သီးမှာ တန်ဖိုးမြင့် ဟင်းခတ်အမွှေးအကြိုင်သီးနှံတစ်မျိုးဖြစ်သည့်အတွက် ပြည်တွင်းနှင့် ပြည်ပဈေးကွက်များတွင် ဝယ်လိုအား အစဉ်ကောင်းမွန်လျက်ရှိကြောင်း သိရသည်။
အဆိုပါ သီးနှံကို အေးမြ၍ မိုးရေချိန်လုံလောက်သည့် တောင်တန်းဒေသများဖြစ်သော အောင်ပန်း၊ ဟဲဟိုး၊ ပင်းတယ၊ ရွာငံနှင့် တောင်ကြီးပတ်ဝန်းကျင်ဒေသများတွင် အများအပြား စိုက်ပျိုးကြပြီး အရိပ်အာဝါသကောင်းမွန်သည့် ပတ်ဝန်းကျင်ကို နှစ်သက်သဖြင့် သစ်တောအနီးရှိ ဒေသများတွင် စိုက်ပျိုးလေ့ရှိကြောင်း သိရသည်။
ကုလားအော်ငရုတ်သီးကို အခြောက်လှန်း၍ ဟင်းခတ်အမွှေးအကြိုင်အဖြစ် အသုံးပြုကြသည့်အပြင် အစားအသောက်ထုတ်လုပ်ရေးလုပ်ငန်းများနှင့် ဆေးဝါးထုတ်လုပ်ရေးလုပ်ငန်းများတွင်လည်း အသုံးပြုမှုများပြားလာသဖြင့် ဝယ်လိုအားမှာ နှစ်စဉ်မြင့်တက်လျက်ရှိကြောင်း သိရသည်။
ထို့ကြောင့် ကုလားအော်ငရုတ်သီးသည် ပြည်တွင်းစားသုံးမှုနှင့် ပြည်ပတင်ပို့မှုအတွက် အလားအလာကောင်းမွန်သည့် စီးပွားဖြစ် ဟင်းခတ်အမွှေးအကြိုင်သီးနှံတစ်မျိုးအဖြစ် ရပ်တည်လျက်ရှိကြောင်း စားသုံးသူရေးရာဦးစီးဌာနက ထုတ်ပြန်ထားသည်။