မေလ ၁၁ ရက်
အင်ဒိုနီးရှားနိုင်ငံ၊ မြောက်မာလူကူပြည်နယ်ရှိ မီးတောင်များသို့ သွားရောက်ခဲ့သည့် ၁၁ ရက်ကြာ ခရီးစဉ်သည် လေ့ကျင့်မှုအချို့ လိုအပ်သော်လည်း လူသစ်တန်းအဆင့်သာဖြစ်သည်ဟု ခရီးသွားအေဂျင်စီဖြစ်သော The Outside က ကြော်ငြာခဲ့ကြောင်း သိရသည်။
၂၀၂၅ ခုနှစ်နှောင်းပိုင်းက အင်စတာဂရမ်တွင် တင်ခဲ့သော ပို့စ်တစ်ခုအရ ဧပြီလ ၃၀ ရက် နေ့မှ မေ ၁၀ ရက်ေန့အထိ အဆိုပါပြည်နယ်ရှိ မီးတောင် ၃ ခုသို့ တက်ရောက်မည်ဖြစ်ပြီး ယင်းတို့အနက် ၂ ခုမှာ အမြဲတစေ ပေါက်ကွဲနေသော မီးတောင်များဖြစ်ကြောင်း ဖော်ပြထားသည်။ အဆိုပါပို့စ်ကို မေလ ၁၁ ရက် နေ့တွင် ပြန်လည်ဖြုတ်ချခဲ့သော်လည်း ဟာမာဟီရာကျွန်းပေါ်ရှိ ဒူကိုနိုမီးတောင်သည် မေလ ၈ ရက်နေ့တွင် ပေါက်ကွဲခဲ့ပြီး စင်ကာပူနိုင်ငံသား ၂ ဦးနှင့် အင်ဒိုနီးရှားနိုင်ငံသား ၁ ဦး၊ စုစုပေါင်း ၃ ဦး သေဆုံးခဲ့သည်။
သေဆုံးသူများမှာ အသက် ၂၈ နှစ်အရွယ် အင်ဒိုနီးရှားအမျိုးသမီး အိန်ဂျယ် ခရစ်ရှယ်လာ ပရာဒီတာ ၊ အေဂျင်စီပိုင်ရှင် အသက် ၃၀ အရွယ် စင်ကာပူနိုင်ငံသား တီမိုသီ ဟင် နှင့် အသက် ၂၇ နှစ်အရွယ် ရှာဟင် မူရက်ဇ် အဗ္ဒူလ် ဟာမစ်ဒ် တို့ ဖြစ်ကြသည်။ ၎င်းတို့၏ ရုပ်အလောင်းများကို မီးတောင်ထိပ်ဝနှင့် မီတာ ၅၀ အကွာရှိ အပျက်အစီးများအောက်တွင် တွဲလျက်သား ရှာဖွေတွေ့ရှိခဲ့ခြင်း ဖြစ်သည်။ ၎င်းတို့သည် ခရီးသည် ၂၀ ဦးပါဝင်သော အဖွဲ့မှဖြစ်ပြီး အသက်ရှင်ကျန်ရစ်သည့် စင်ကာပူနိုင်ငံသား ၇ ဦးမှာ မေလ ၁၀ ရက်နေ့တွင် နေရပ်သို့ ပြန်လည်ရောက်ရှိခဲ့သည်။
ဒူကိုနိုမီးတောင်သည် ၁၉၃၃ ခုနှစ်ကတည်းက အစဉ်တစိုက် ပေါက်ကွဲနေသော “မီးတောင်ရှင်” ဖြစ်သည်။ မတ်လ ၂၉ ရက်ေန့ကတည်းက ဒုတိယအဆင့် (Level 2) သတိပေးချက် ထုတ်ပြန်ထားပြီး မီးတောင်ထိပ်ဝ၏ ၄ ကီလိုမီတာ ပတ်လည်အတွင်း မည်သည့်လှုပ်ရှားမှုမှ မပြုလုပ်ရန် တားမြစ်ထားခဲ့သည်။ ဒေသဆိုင်ရာ အာဏာပိုင်များက ဧပြီလ ၁၇ ရက် နေ့တွင် စတင်ပိတ်ထားခဲ့ပြီး မေ လ၈ ရက်နေ့တွင် မီးတောင်သို့ တက်ရောက်သည့် လမ်းကြောင်းအားလုံးကို အပြီးတိုင်ပိတ်သိမ်းရန်နှင့် မည်သူ့ကိုမျှ တက်ရောက်ခွင့်မပြုရန် အမိန့်ထုတ်ပြန်ခဲ့သော်လည်း ယခုခရီးစဉ်မှာ ဆက်လက်လုပ်ဆောင်ခဲ့ခြင်း ဖြစ်သည်။
The Outside အေဂျင်စီသည် စွန့်စားခန်းခရီးစဉ်များကို အဓိကထား လုပ်ဆောင်ခဲ့ပြီး သေဆုံးသူ မစ္စတာ ဟင်းသည် ဤခရီးစဉ်များကို ကိုယ်တိုင်ဦးဆောင်လေ့ရှိသည်။ ၎င်းသည် ယခုခရီးစဉ်အပြီးတွင် အိန္ဒိယနိုင်ငံ၊ လာဒတ်ခ်ရှိ ပေ ၂၀,၀၀၀ ကျော်မြင့်သော ကန်ယတ်စီ တောင်သို့ ခရီးသည်များကို ပို့ဆောင်ရန် စီစဉ်ထားခဲ့ကြောင်း သိရသည်။
Ref: သယ်စရိတ်တိုင်းမ်စ်