ရန်ကုန် – ဒလ မြစ်ကူးတံတားဖွင့်ပြီးနောက်ပိုင်း သဗ္ဗာန်စီးသူ ဦးရေမှာ ထက်ဝက်ကျော်ကျဆင်းခဲ့ကြောင်း သဗ္ဗာန်သမားများ၏ ပြောပြချက်အရ သိရသည်။
ယခင်က ရန်ကုန်နှင့် ဒလမြို့နယ်အကြား သွားလာရေးအတွက် သဗ္ဗာန်သည် အဓိကအသုံးပြုလာကြသော်လည်း တံတားဖွင့်ပြီးနောက် YBS ယာဉ်များဖြင့် အလွယ်တကူ သွားလာနိုင်လာခြင်းကြောင့် သဗ္ဗာန်လိုင်းများတွင် ခရီးသည် လျော့နည်းသွားခြင်း ဖြစ်သည်။
“အရင်တုန်းက မနက်ပိုင်း၊ ညနေပိုင်းဆို လူများပြည့်နေတယ်။ အခုတော့ ခရီးသည်တွေ တော်တော်လေး လျော့သွားပြီ။ တော်တော်လေးလျော့သွားတယ်။ သုံးပုံကို နှစ်ပုံလောက်လျော့သွားတယ်” ဟု သဗ္ဗာန်မောင်းသူ တစ်ဦးက ပေါ်ပြူလာနယူးစ်သို့ ပြောသည်။
သဗ္ဗာန်လုပ်ငန်းကို အဓိကအသက်မွေးဝမ်းကျောင်းအဖြစ် မူတည်နေသူများအတွက် ယခုကဲ့သို့ ဝင်ငွေကျဆင်းမှုသည် မိသားစုဘဝအပေါ် ထိခိုက်မှုများ ဖြစ်ပေါ်စေကြောင်း သိရသည်။
အချို့သော သဗ္ဗာန်သမားများမှာ လုပ်ငန်းပြောင်းလဲရန် စဉ်းစားနေကြပြီး အခြားအလုပ်အကိုင်များ ရှာဖွေရန် ကြိုးပမ်းနေကြသည်။
ဒေသခံအချို့ကတော့ တံတားဖွင့်လှစ်ခြင်းကြောင့် သွားလာရေး အဆင်ပြေလာခြင်းကို ကြိုဆိုကြသော်လည်း သဗ္ဗာန်လုပ်ငန်းလုပ်ကိုင်သူများအတွက် ထောက်ပံ့မှုများ လိုအပ်နေကြောင်း ထောက်ပြကြသည်။
“တံတားဖွင့်တာက လူတွေအတွက် အကျိုးရှိပါတယ်။ ဒါပေမယ့် သဗ္ဗာန်သမားတွေ အတွက်လည်း အလုပ်အကိုင် အစားထိုးပေးနိုင်မယ့် အစီအစဉ်တွေ ရှိသင့်တယ်” ဟု ဒလမြို့နယ်ရှိ ဒေသခံ တစ်ဦးက ပေါ်ပြူလာနယူးစ်သို့ပြောသည်။
ရန်ကုန် – ဒလ သဗ္ဗာန်ဆိပ်ကမ်းပေါင်း ၁၀ ခုရှိပြီး နေ့စဉ်ခရီးသည်ထောင်ချီသွားလာနေကြခြင်းဖြစ်သည်။