ထိုင်းက ရေနံတင်ပို့မှု ပိတ်ပင်ချက်ကို ရုပ်သိမ်းဖို့ စဉ်းစားနေ

အရန်ရေနံသိုလှောင်ထားနိုင်မှုနှင့် သိုလှောင်မှုများပြားလာခြင်းတို့ကြောင့် သန့်စင်ပြီးရေနံတင်ပို့မှုအပေါ် ပိတ်ပင်ထားမှုကို အာဏာပိုင်များက ရုပ်သိမ်းရန် စဉ်းစားနေကြောင်း ထိုင်းနိုင်ငံ စွမ်းအင်လုပ်ငန်းဌာန(ဒီအိုအီးဘီ) ညွှန်ကြားရေးမှူးချုပ် ဆာရာဝပ် ကောထာသစ်က ပြောကြားခဲ့သည်။
      
ပြည်တွင်းရေနံချက်စက်ရုံ ခြောက်ရုံသည် သိုလှောင်ရုံများ၏ သိုလှောင်နိုင်စွမ်းထက်ဝက်နီးပါးကို ဖြည့်သွင်းပြီး လည်ပတ်လျက်ရှိသည်။
       
ဆက်လက်၍ ပိတ်ပင်ထားပါက ပိုလျှံနေသော သိုလှောင်မှုအတွက်ကုန်ကျစရိတ်များ မြင့်တက်လာနိုင်ကြောင်း မစ္စတာ ဆာရာဝပ်က သတိပေးခဲ့သည်။
       
ဒီအိုအီးဘီသည် ဂျက်လေယာဉ်လောင်စာဆီတင်ပို့မှုကို ကနဦးခွင့်ပြုသွားမည်ဟု မျှော်လင့်ရသည်။ ခရီးသွားလုပ်ငန်းကျဆင်းခြင်းကြောင့် ကမ္ဘာတစ်ဝန်း လေယာဉ်လောင်စာဆီဝယ်လိုအား နှေးကွေးသွားသော်လည်း သန့်စင်မှုစွမ်းရည်ပိုင်းတွင် အကန့်အသတ်ရှိသောကြောင့် နိုင်ငံများစွာသည် ပြတ်လပ်မှုများနှင့် ရင်ဆိုင်နေရဆဲဖြစ်သည်။
      
လောင်စာဆီပြတ်လပ်မှုအပေါ် လူထု၏စိုးရိမ်မှုများကြောင့် မတ်လ ၆ ရက်နေ့တွင် ဝန်ကြီးချုပ် အနူတင် ချန်ဗီရာကူလ်က ပို့ကုန်ပိတ်ပင်မှုကို စတင်ခဲ့သည်။ အမိန့်အရ ဓာတ်ဆီ၊ ဓာတ်ငွေ့၊ ဒီဇယ်၊ ဂျက်လေယာဉ် A-1 လောင်စာဆီနှင့် သဘာဝဓာတ်ငွေ့ရည် တင်ပို့မှုကို ယာယီရပ်ဆိုင်းခဲ့သည်။
     
ထိုပိတ်ပင်ချက်တွင် လာအိုနှင့် မြန်မာနိုင်ငံတို့ကို ခြွင်းချက်ထားခဲ့ပြီး အိမ်နီးချင်းနိုင်ငံများနှင့် ထိုင်းနိုင်ငံ၏ စွမ်းအင် ကို အမှီသဟဲပြုမှု အထူးသဖြင့် လာအိုရေအားလျှပ်စစ်အပေါ် မှီခိုအားထားမှုကို ထင်ဟပ်စေခဲ့သည်။
      
မေလ ၅ ရက်နေ့အထိ ထိုင်းနိုင်ငံ၏ သိုလှောင်မှုများသည် တရားဝင်ခွင့်ပြုထားသော သိုလှောင်မှု ၂၅ ရက်စာ၊ စီးပွားဖြစ် သိုလှောင်မှု ၂၃ ရက်စာ၊ သယ်ယူပို့ဆောင်မှုတွင် ရေနံ ၃၉ ရက်စာနှင့် ကုန်သည်များထံမှ အတည်ပြုဝယ်ယူထားမှု ၁၇ ရက်စာ အပါအဝင် ၁၀၄ ရက်စာ သုံးစွဲမှု အတွက် လုံလောက်ကြောင်း စွမ်းအင်ဝန်ကြီးဌာန၏ အဆိုအရ သိရသည်။
          
နိုင်ငံသည် မေလ ၁ ရက် နေ့မှ ၃ ရက် နေ့အတွင်း နေ့စဉ် ဒီဇယ်လီတာ ၇၄ ဒဿမ ၁ သန်း ထုတ်လုပ်ခဲ့ပြီး ပြည်တွင်းသို့ လီတာ ၅၅ ဒဿမ ၆ သန်း နေ့စဉ် ရောင်းချပေးနေကြောင်း သိရသည်။

Ref: ဘန်ကောက်ပို့စ်