ထိုင်း-မလေးရှား နှစ်နိုင်ငံဆက်ဆံရေး မြှင့်တင်

ထိုင်းနှင့် မလေးရှားတို့သည် ၂၀၂၇ ခုနှစ်တွင် နှစ်နိုင်ငံကုန်သွယ်မှု ကို အမေရိကန်ဒေါ်လာ ၃၀ ဘီလျံ အထိ ရောက်ရှိရန် မျှော်မှန်းထားပြီး ကုန်သွယ်ရေး၊ ရင်းနှီးမြှုပ်နှံမှု၊ နယ်စပ်ဆက်သွယ်ရေးနှင့် ခရီးသွားလုပ်ငန်းစသည့် အဓိကနယ်ပယ်များတွင် စီးပွားရေးပူးပေါင်းဆောင်ရွက်မှုကို တိုးမြှင့်ရန် နှစ်နိုင်ငံ သဘောတူညီခဲ့ကြသည်။

တနင်္လာနေ့တွင် ပြီးဆုံးခဲ့သော ထိုင်းဝန်ကြီးချုပ် ပေတုံတန် ရှင်နာဝပ်ထရာ၏ နှစ်ရက်ကြာ မလေးရှားနိုင်ငံခရီးစဉ်အတွင်း မလေးရှားဝန်ကြီးချုပ် အန်ဝါအီဘရာဟင်နှင့် တွေ့ဆုံဆွေးနွေးခဲ့ရာ၌ အဆိုပါကိစ္စရပ်များကို သဘောတူညီခဲ့ကြသည်။

ခရီးစဉ်အတွင်း မစ္စပေတုံတန်နှင့် မစ္စတာအန်ဝါတို့သည် ၇ ကြိမ်မြောက် နှစ်ပတ်လည် ညှိနှိုင်းဆွေးနွေးပွဲကို ပူးတွဲသဘာပတိအဖြစ် ဆောင်ရွက်ခဲ့ပြီး ယမန်နှစ်က ဆွေးနွေးခဲ့မှုများတွင် သဘောတူညီခဲ့သည့် လုပ်ငန်းစဉ်များကို နှစ်ဖက်စလုံးက ပြန်လည်သုံးသပ်ကာ အဆင့်မြှင့်တင်ခဲ့ကြသည်။

နှစ်ဖက်ဆွေးနွေးခဲ့သည့် အဓိကအကြောင်းအရာများနှင့်ပတ်သက်၍ ထိုင်းအစိုးရအဖွဲ့ ပြောရေးဆိုခွင့်ရှိသူ Sasikam Watthanachan က အကျဉ်းရုံး ရှင်းပြခဲ့သည်။

အခြေခံအဆောက်အဦများ ဖွံ့ဖြိုးတိုးတက်ရေးနှင့် ၂၀၂၇ ခုနှစ် ကုန်သွယ်ရေးရည်မှန်းချက် အမေရိကန်ဒေါ်လာ ဘီလျံ ၃၀ ရောက်ရှိရေးကိုအကောင်အထည်ဖော်ဆောင်ရန် ကုန်သွယ်ရေးနှင့် စီးပွားရေးဆက်ဆံမှုအားကောင်းစေရေး အတွက် တိုးမြှင့်ဆောင်ရွက်ရန် ဝန်ကြီးချုပ်နှစ်ဦးစလုံးက ထပ်လောင်းကတိပြုခဲ့ကြသည်ဟု မစ္စ Sasikam က ပြောဆိုခဲ့သည်။

နှစ်နိုင်ငံကုန်သွယ်မှု၏ ၃၀ ရာခိုင်နှုန်းသည် နယ်စပ်ကုန်သွယ်မှုဖြစ်ပြီး နယ်စပ်ဆက်သွယ်မှုတိုးမြှင့်ရန်နှင့် နယ်စပ်ဖြတ်ကျော် ခရီးသွားလာမှု လွယ်ကူချောမွေ့ရေးမြှင့်တင်ရန် အရေးကြီးကြောင်းကို နှစ်ဖက်စလုံးက သဘောတူခဲ့သည်။

ထို့အပြင် နယ်စပ်ဖြတ်ကျော် ကုန်စည်နှင့် ခရီးသည်ပို့ဆောင်ရေးဆိုင်ရာ နားလည်မှုစာချွန်လွှာနှစ်ခု(MoUs) ကို အရှိန်မြှင့်ဆောင်ရွက်ရန် လိုအပ်ကြောင်းကိုလည်း ခေါင်းဆောင်နှစ်ဦးက အလေးထားခဲ့သည်ဟု သူမက ပြောဆိုခဲ့သည်။

လုံခြုံရေးဆိုင်ရာနှင့်ပတ်သက်၍ မငြိမ်သက်ဖြစ်နေသော ထိုင်းတောင်ပိုင်းအရေးသည် ပြည်တွင်းရေးကိစ္စဖြစ်ကြောင်းနှင့် ယင်းဒေသ၏ ငြိမ်းချမ်းရေးနှင့် သာယာဝပြောရေးအတွက် ထိုင်းနိုင်ငံက အောင်မြင်စွာဆောင်ရွက်နိုင်မည်ဟု ယုံကြည်ကြောင်း မစ္စတာအန်ဝါက ပြောကြားခဲ့သည်။

Ref: ဘန်ကောက်ပို့စ်