ထိုင်ဝမ်ကို ဒဗ္ဗလျူအိတ်ခ်ျအို ညီလာခံ တက်ခွင့်မပြု- တရုတ်

လာမည့်သီတင်းပတ်တွင် စတင်မည့် ကမ္ဘာ့ကျန်းမာရေးအဖွဲ့(ဒဗ္ဗလျူအိပ်ချ်အို) ၏ နှစ်ပတ်လည်ညီလာခံတွင် ထိုင်ဝမ်ကို ပါဝင်တက်ရောက်ခွင့်မပြုကြောင်း တရုတ်နိုင်ငံက တနင်္လာနေ့တွင် ပြောကြားခဲ့ သော်လည်းထိုင်ဝမ်ကမူ တရားဝင်အစည်းအဝေး၏ ပြင်ပအစည်းအဝေများအတွက် ကိုယ်စားလှယ်တစ်ဖွဲ့စေလွှတ်သွားမည်ဟု ပြောကြားခဲ့သည်။

 ဒီမိုကရေစီနည်းကျအုပ်ချုပ်သော ကျွန်းကို ၎င်း၏ ပိုင်နက်အဖြစ် သတ်မှတ်သော ပေကျင်း၏ ကန့်ကွက်မှုများကြောင့် ထိုင်ဝမ်သည် နိုင်ငံတကာအဖွဲ့အစည်းအများစုမှ ချန်လှပ်ခံထားရသည်။

တရုတ်နိုင်ငံနှင့် အထင်ကရ ကုန်သွယ်ရေးနှင့် ခရီးသွားလုပ်ငန်းဆိုင်ရာ သဘောတူညီချက်များကို လက်မှတ်ရေးထိုးခဲ့သည့် သမ္မတ မာရင်ကျိုးလက်ထက်တွင်မူ ထိုင်ဝမ်သည် ၂၀၀၉ ခုနှစ်မှ ၂၀၁၆ ခုနှစ်အထိ ဒဗ္ဗလျူအိပ်ချ်အို၏ ကမ္ဘာ့ကျန်းမာရေးညီလာခံ(ဒဗ္ဗလျူအိပ်ချ်အေ) သို့ လေ့လာသူအဖြစ် တက်ရောက်နိုင်ခဲ့သည်။

သို့သော် သမ္မတဟောင်း ဆိုင်အင်းဝမ်လက်ထက်တွင်မူ တရုတ်နှင့် ထိုင်ဝမ်နှစ်ခုစလုံးသည် တရုတ်တစ်နိုင်ငံတည်း၏ အစိတ်အပိုင်းဖြစ်သည်ဟူသော တရုတ်နိုင်ငံ၏ ရပ်တည်ချက်ကို ထိုင်ဝမ်က လက်မခံသောကြောင့် ၂၀၁၇ ခုနှစ်မှစ၍ ထိုင်ဝမ်၏ ပါဝင်တက်ရောက်မှုကို ပေကျင်းက ပိတ်ပင်ခဲ့သည်။ လက်ရှိသမ္မတ လိုင်ချင်းတေသည်လည်း ဆိုင်၏ မူဝါဒကို ဆက်လက်ကိုင်စွဲခဲ့သည်။

တရုတ်ပြည်သူ့သမ္မတနိုင်ငံသည် တစ်နိုင်ငံလုံး၏ တစ်ခုတည်းသော တရားဝင်အစိုးရဖြစ်ကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကော်ကျန်းကွန်းက ပြောကြားခဲ့သည်။

တရုတ်တစ်နိုင်ငံတည်း မူဝါဒကို ထိန်းသိမ်းရန်နှင့် ကုလသမဂ္ဂအထွေထွေညီလာခံနှင့် ဒဗ္ဗလျူအိပ်ချ်အေ၏ သက်ဆိုင်ရာ ဆုံးဖြတ်ချက်များ၏ လေးနက်မှုနှင့် အခွင့်အာဏာကို ကာကွယ်ရန်အတွက် ယခုနှစ် ဒဗ္ဗလျူအိပ်ချ်အေတွင် ထိုင်ဝမ်ဒေသ ပါဝင်ရေးကို တရုတ်နိုင်ငံက သဘောမတူရန် ဆုံးဖြတ်ခဲ့သည် ဟု ၎င်းက ပေကျင်းတွင် ပြောကြားခဲ့သည်။

Ref: အန်တာနာဇီယွန်နား