တိုင်းရင်းသားစည်းလုံးညီညွတ်မှုသည် နိုင်ငံတစ်နိုင်ငံ အေးချမ်းတည်ငြိမ်မှုနှင့် အချုပ်အခြာအာဏာတည်တံ့ခိုင်မြဲနေစေရေးအတွက် အသက်တမျှအရေးကြီးဟု နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်မှ ယနေ့ ဖေဖော်ဝါရီ ၇ ရက်တွင်ကျရောက်သည့် (၇၈)နှစ် မြောက် ရှမ်းပြည်နယ်နေ့အခမ်းအနားသို့ သဝဏ်လွှာပေးပို့၍ ပြောကြားခဲ့ခြင်းဖြစ်သည်။
ထို့ပြင် နိုင်ငံတစ်နိုင်ငံတိုးတက်ရေးအတွက် ကြီးမားသောမောင်းနှင်အားတစ်ရပ်ဖြစ်၍ တိုင်းရင်းသားညီအစ်ကိုများကြား သံသယများဖယ်ရှားကာ ဆွေးနွေးညှိနှိုင်းခြင်းဖြင့် ထာဝရငြိမ်းချမ်းရေးရရှိအောင် တည်ဆောက်သွားကြရမည်ဟု ပြောသည်။
” လက်နက်ကိုင်အဖွဲ့အစည်းတွေရှိတဲ့ နယ်မြေဒေသတွေက ဒေသခံပြည်သူတွေဟာ နိုင်ငံနဲ့ပြည်သူတို့ရဲ့ အကျိုးစီးပွားကိုထိခိုက်စေမယ့် အကြမ်းဖက်မှုတွေ တိုက်ခိုက်မှုတွေကို စိတ်ကုန်မုန်းတီးနေကြပါပြီ။ မိမိတို့ရဲ့ လူမှုဘဝဖွံ့ဖြိုးတိုးတက်ရေး၊ လုံခြုံအေးချမ်းစွာနေထိုင်နိုင်ရေးတွေကို များစွာတောင့်တနေကြတဲ့ ပြည်သူအားလုံးရဲ့ဆန္ဒကို ထည့်သွင်းစဉ်းစားကြဖို့ အသိပေးလိုပါတယ်”ဟု နစက ဥက္ကဋ္ဌက ပြောသည်။
နစက အနေဖြင့် တည်ငြိမ်အေးချမ်းရေးနှင့် ဒီမိုကရေစီအသွင်ကူးပြောင်းရေးအတွက် လွတ်လပ်ပြီးတရားမျှတသော ပါတီစုံဒီမိုကရေစီအထွေ ထွေရွေးကောက်ပွဲကျင်းပနိုင်ရန်ပြင်ဆင်လျက်ရှိ၍ ငြိမ်းချမ်းရေးလုပ်ငန်းစဉ်ကို နိုင်ငံတော်ဘက်မှ စဉ်ဆက်မပြတ်ကြိုးပမ်းဆောင်ရွက်လျက်ရှိသည်ဟု ပြောသည်။
ထို့ကြောင့် တိုင်းရင်းသားလက်နက်ကိုင်များအနေဖြင့် မိမိတို့၏ဆန္ဒနှင့် မိမိအဖွဲ့အစည်းအကျိုး စီးပွားထက် ဖြစ်သင့်ဖြစ်ထိုက်သည့် ပြည်ထောင်စုနှင့် တိုင်းရင်းသားပြည်သူအားလုံး၏ အကျိုးစီးပွားကို စိတ်ရင်းစေတနာမွန်ဖြင့် ရှုမြင်သုံးသပ်ကာ ပြည်ထောင်စုငြိမ်းချမ်းရေးကို ရှေးရှုတွေးမြင်လုပ်ဆောင်ကြရန်လိုအပ်သည်ဟု ပြော သည်။
” နိုင်ငံဖွံ့ဖြိုးရေးအတွက် တည်ဆောက်ထားတဲ့ အခြေခံအဆောက်အအုံတွေ ပျက်စီးခဲ့တဲ့အတွက် တိုင်းရင်းသားပြည်သူတွေ ဆင်းရဲဒုက္ခ ရောက်ကြရသလို နိုင်ငံတိုးတက်ရေးအတွက် အရေးပါတဲ့ လူ့စွမ်းအားအရင်းအမြစ်တွေကို အဓိပ္ပာယ်မဲ့ပြုန်းတီးနေတာဟာ နိုင်ငံအင်အားလျော့နည်းလာခြင်းဘဲဖြစ်ပါတယ်”ဟု နစက ဥက္ကဋ္ဌက ပြောသည်။
ထို့ကြောင့် တိုင်းရင်းသားပြည်သူတစ်ရပ်လုံးအနေဖြင့် တည်ငြိမ်အေးချမ်းရေးနှင့် ထာဝရငြိမ်းချမ်းရေးအတွက်ဆောင်ရွက်ရာတွင် လေးလေးနက်နက်နားလည်သဘောပေါက်ပြီး ပူးပေါင်းဆောင်ရွက်ကြရန်လည်း နစက ဥက္ကဋ္ဌကတိုက်တွန်းပြောကြားခဲ့သည်။