ဖေဖော်ဝါရီ ၂၇
တရုတ်သည် နိုင်ငံ၏အနောက်တောင်ပိုင်း မြန်မာနယ်စပ်အနီးရှိ ယူနန်ပြည်နယ်တွင် ခေတ်မီ နည်းပညာမြင့်မားသော ရေဒါစနစ်တစ်ခုကို တပ်ဆင်ခဲ့ပြီး ယင်းလှုပ်ရှားမှုသည် အိန္ဒိယ၏ ဒုံးကျည်စနစ်များနှင့် နိုင်ငံတော်လုံခြုံရေးအတွက် သိသိသာသာအကျိုး သက်ရောက်မှုရှိစေမည့် လှုပ်ရှားမှုတစ်ခုဖြစ်သည်။
အသစ်တပ်ဆင်ထားသည့် Large Phased Array Radar (LPAR) သည် တရုတ်နိုင်ငံပေကျင်းမှ အိန္ဒိယသမုဒ္ဒရာ၏ ကျယ်ပြန့်သောဧရိယာများနှင့် အိန္ဒိယပိုင်နက်အတွင်းသို့ စောင့်ကြည့်နိုင်စေမည့် ကီလိုမီတာ ၅,၀၀၀ ကျော် စောင့်ကြည့်ထောက်လှမ်းနိုင်သော အကွာအဝေးကို ပိုင်ဆိုင်ထားကြောင်း သိရသည်။ ဤအဆင့်မြင့်ရေဒါစနစ်သည် အထူးသဖြင့် အိန္ဒိယ၏ ပဲ့ထိန်းဒုံးကျည်စနစ်များနှင့် ဆက်စပ်၍ တရုတ်နိုင်ငံ၏ ထောက်လှမ်းရေးစုဆောင်းနိုင်စွမ်းကို သိသိသာသာ မြှင့်တင်ပေးနိုင်ကြောင်း သတင်းရင်းမြစ်များက India Today TV သို့ ပြောကြားခဲ့သည်။
ကြိုတင်သတိပေးမှုနှင့် စောင့်ကြည့်ခြင်းအတွက် ဒီဇိုင်းထုတ်ထားသည့် LPAR စနစ်သည် ပဲ့ထိန်းဒုံးကျည်ပစ်လွှတ်မှုများကို အချိန်နှင့်တပြေးညီ သိရှိနိုင်ပြီး ခြေရာခံနိုင်စွမ်းရှိသည်။ ၎င်း၏ ကျယ်ပြန့်စွာထောက်လှမ်းနိုင်သော အကွာအဝေးကြောင့် အိန္ဒိယ၏ အရှေ့ဘက်ကမ်းရိုးတန်းရှိ ဒေါက်တာ အေပီဂျေ အဗ်ဒူလ် ကလာမ်ကျွန်း ကဲ့သို့သော အဓိကနေရာများမှ အိန္ဒိယ၏ ဒုံးကျည်စမ်းသပ်မှုများကို ထိရောက်စွာ ခြေရာခံ စောင့်ကြည့်နိုင်သည်။
ဤနေရာများသည် Agni-5 နှင့် K-4 ကဲ့သို့သော အဆင့်မြင့် ဘောလစ်စတစ် ပဲ့ထိန်းဒုံးကျည်များအတွက် အရေးပါသော စမ်းသပ်ကွင်းများဖြစ်သည်။ ဒုံးကျည်ပစ်လွှတ်ရာလမ်းကြောင်း၊
အမြန်နှုန်းနှင့် အကွာအဝေးဆိုင်ရာ အရေးကြီးသော အချက်အလက်များကို ဖမ်းယူခြင်းဖြင့် တရုတ်သည် မဟာကြီးမားသောအားသာချက်ကို ရရှိပြီး အိန္ဒိယ၏ ကြီးထွားလာနေသော ဒုံးကျည်စွမ်းရည်ကို ခွဲခြမ်းစိတ်ဖြာပြီး တန်ပြန်ဆန်းစစ်အရေးယူမှုများ ပြုလုပ်နိုင်စေမည်ဖြစ်သည်။
ယူနန်ပြည်နယ်ရှိ ဤရေဒါစခန်း၏ ဗျူဟာမြောက်နေရာချထားတည်ရှိမှုသည် အထူးအရေးကြီးပါသည်။ ဘင်္ဂလားပင်လယ်အော်နှင့် အရေးကြီးသော အိန္ဒိယသမုဒ္ဒရာ ကုန်သွယ်ရေးလမ်းကြောင်းများနှင့် နီးကပ်စွာတည်ရှိပါသည်။ အိန္ဒိယ၏ အားကောင်းသော ရေတပ်တည်ရှိရာဒေသများ၊ ရေကြောင်းနှင့် စစ်ရေးလှုပ်ရှားမှုများကို တရုတ်ကထိရောက်စွာ ထောက်လှမ်းနိုင်ပါသည်။