ပေကျင်း၊ ဇွန် ၁၆
တရုတ်နိုင်ငံခြားရေးဝန်ကြီး ဝမ်ယိနှင့် နီပေါနိုင်ငံခြားရေးဝန်ကြီး အာဇူ ရာနာ ဒေဥဘာ (Arzu Rana Deuba) တို့သည် ပေကျင်းမြို့တွင် တွေ့ဆုံဆွေးနွေးခဲ့ကြပြီး နှစ်နိုင်ငံဆက်ဆံရေး မြှင့်တင်ရေးနှင့် ရပ်ဝန်းနှင့်လမ်းမ (BRI) ပူးပေါင်းဆောင်ရွက်မှု တိုးချဲ့ရေးကိစ္စရပ်များကို ဆွေးနွေးခဲ့ကြကြောင်း သိရသည်။
တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဗျူရိုအဖွဲ့ဝင်လည်းဖြစ်သည့် ဝမ်ယိက တရုတ်နိုင်ငံအနေဖြင့် နီပေါနိုင်ငံနှင့် ဆက်ဆံရေးကို အိမ်နီးချင်းသံတမန်ရေးမူဝါဒတွင် အရေးပါသည့်နေရာ၌ အမြဲထားရှိခဲ့ကြောင်း ပြောကြားသည်။
ထို့ပြင် တရုတ်နိုင်ငံသည် နီပေါ၏ အချုပ်အခြာအာဏာ၊ လွတ်လပ်ရေးနှင့် နယ်မြေပိုင်ဆိုင်မှုကို အစဉ်တစိုက် ထောက်ခံသွားမည်ဖြစ်ကြောင်းနှင့် နီပေါနိုင်ငံ၏ အခြေအနေနှင့် ကိုက်ညီသည့် ဖွံ့ဖြိုးတိုးတက်ရေးလမ်းကြောင်းကို ရွေးချယ်ဆောင်ရွက်ခွင့်ကို လေးစားကြောင်း ပြောကြားခဲ့သည်။
ဝမ်ယိက နှစ်နိုင်ငံအနေဖြင့် အရည်အသွေးမြင့် BRI ပူးပေါင်းဆောင်ရွက်မှုကို မြှင့်တင်သွားရန်၊ ဓာတ်အားလိုင်းများ၊ အဝေးပြေးလမ်းများ၊ နယ်စပ်ဆိပ်ကမ်းများနှင့် လေကြောင်းပို့ဆောင်ရေးကဏ္ဍများတွင် ပူးပေါင်းဆောင်ရွက်မှု တိုးမြှင့်သွားရန် ဆန္ဒရှိကြောင်း ပြောကြားခဲ့သည်။ ထို့အပြင် နီပေါနိုင်ငံကို “ကုန်းတွင်းပိတ်နိုင်ငံ” မှ “ကုန်းတွင်းချိတ်ဆက်နိုင်ငံ” အဖြစ် ပြောင်းလဲတိုးတက်လာစေရေးကိုလည်း ထောက်ခံသွားမည်ဖြစ်ကြောင်း ၎င်းက ဆိုသည်။
တစ်ဖက်တွင် နီပေါနိုင်ငံခြားရေးဝန်ကြီးက နီပေါ၏ ဖွံ့ဖြိုးတိုးတက်ရေးနှင့် ပြည်သူများ၏ လူမှုစီးပွားဘဝ မြှင့်တင်ရေးအတွက် တရုတ်နိုင်ငံ၏ ရေရှည်ထောက်ခံမှုအပေါ် ကျေးဇူးတင်ကြောင်း ပြောကြားခဲ့သည်။
နီပေါနိုင်ငံသည် “တရုတ်တစ်နိုင်ငံတည်း” မူဝါဒကို ခိုင်မာစွာ လိုက်နာကြောင်း၊ တရုတ်နိုင်ငံ၏ အမျိုးသားပြန်လည်ပေါင်းစည်းရေး ကြိုးပမ်းမှုများကို ထောက်ခံကြောင်းနှင့် နီပေါနယ်မြေကို အသုံးပြု၍ တရုတ်နိုင်ငံ၏ အကျိုးစီးပွားကို ထိခိုက်စေမည့် မည်သည့်လုပ်ရပ်မျိုးကိုမျှ ခွင့်ပြုမည်မဟုတ်ကြောင်း ၎င်းက ပြောကြားခဲ့သည်။
ထို့ပြင် နီပေါနိုင်ငံအနေဖြင့် လူသားမျိုးနွယ်အတွက် ဘုံအနာဂတ်ရှိသော အသိုက်အဝန်းတည်ဆောက်ရေး ရည်မှန်းချက်နှင့် တရုတ်နိုင်ငံက အဆိုပြုထားသည့် ကမ္ဘာလုံးဆိုင်ရာ ဖွံ့ဖြိုးတိုးတက်ရေးနှင့် လုံခြုံရေးဆိုင်ရာ အစီအစဉ်များကို ဆက်လက်ထောက်ခံသွားမည်ဖြစ်ကြောင်းလည်း ပြောကြားခဲ့သည်။
Ref: CCTV