ရှမ်းပြည်နယ်(တောင်ပိုင်း)၊ ကုသရေးဦးစီးဌာန၊ တောင်ကြီးမြို့၊ စဝ်စံထွန်းပြည်သူ့ဆေးရုံကြီး၊ ကင်ဆာဓာတ်ရောင်ခြည်ဌာနတွင် ဓာတ်ရောင်ခြည် ကင်ဆာရောဂါကုသစက်များဖြင့် ကင်ဆာရောဂါများကို ကုသပေးလျက်ရှိကြောင်း ကျန်းမာရေးဝန်ကြီးဌာနမှ သိရသည်။
ထိုသို့ ကုသပေးရာတွင် အပြင်ဓာတ်ရောင်ခြည်ကုသစက် (External Beam Radiation Therapy Machine) (၂)လုံးနှင့် အတွင်းဓာတ်ရောင်ခြည်ကုသစက် (Brachytherapy Machine) တစ်လုံးတပ်ဆင်ထားရှိပြီး ကင်ဆာရောဂါဝေဒနာရှင်များအား ကုသပေးလျက်ရှိကြောင်း သိရသည်။
ထို့ပြင် မျက်နှာ၊ မေးရိုး၊ နား၊ နှာခေါင်း၊ လည်ချောင်းကင်ဆာများ၊ ဦးနှောက်အကြိတ်ကင်ဆာ၊ ရင်သားကင်ဆာ၊ အဆုတ်ကင်ဆာ၊ အစာရေမျိုပြွန်ကင်ဆာ၊ အူမကြီးကင်ဆာ၊ သားအိမ်ကင်ဆာ၊ သားအိမ်ခေါင်းကင်ဆာ၊ ဆီးအိမ်ကင်ဆာ၊ ဆီးကျိတ်ကင်ဆာ၊ အရေပြားကင်ဆာ၊ အရိုးကင်ဆာနှင့် ကြွက်သား၊ အဆီ၊ သွေးကြော၊ အာရုံကြောများတွင်ဖြစ်သော ကင်ဆာ(Sarcoma)အစရှိသည့် ကင်ဆာရောဂါများကို ကုသပေးလျက်ရှိသည်။
ယင်းအပြင် သားအိမ်ကင်ဆာနှင့် သားအိမ်ခေါင်းကင်ဆာရောဂါဝေဒနာရှင်များကို အပြင်ဓာတ်ရောင်ခြည် ကုသခြင်းနှင့် အတွင်းဓာတ်ရောင်ခြည်ကုသခြင်းနှစ်မျိုးလုံးကို တစ်ဆက်တည်း ကုသပေးလျက်ရှိကြောင်း သိရသည်။
Clinac ix IMRT Machine (LA Machine) စက်ဖြင့် အဆင့်မြင့် နည်းပညာများဖြစ်သည့် 3 DCRT (3 Dimensional Conformal Radiation Therapy), IMRT (Intensity Modulated Radiation Therapy ) တို့ဖြင့် ဘေးထွက်ဆိုးကျိုးအနည်းဆုံးဖြင့် တိကျသည့် ကင်ဆာဓာတ်ရောင်ခြည်ကုသပေးလျက်ရှိသည်။
အဆိုပါ စဝ်စံထွန်း ပြည်သူ့ဆေးရုံကြီး၊ ဓာတ်ရောင်ခြည်ဌာနတွင် ကင်ဆာရောဂါပြင်ပလူနာကြည့်ရှုခြင်း (တနင်္လာမှ သောကြာအထိ)၊ ဓာတ်ရောင်ခြည်ကုသမှုများပေးခြင်း (တနင်္လာမှ စနေ အထိ)၊ ဓာတ်အပ်စိုက်ကုသပေးခြင်း (အင်္ဂါမှ သောကြာအထိ) နှင့် ကင်ဆာဆေးသွင်းကုသမှုများ (Day Care Chemotherapy) ကို (တနင်္လာမှ သောကြာအထိ) ဆောင်ရွက်ပေးလျက်ရှိကြောင်း သိရသည်။