မန္တလေးမြို့တွင် ငလျင်လှုပ်ခတ်မှုဖြစ်ပွားခဲ့ပြီးနောက် တစ်နှစ်ကျော်ကြာမြင့်လာသော်လည်း အထပ်မြင့်အိမ်ရာတိုက်ခန်းများ၏ အရောင်းအဝယ်ဈေးကွက်မှာ ယနေ့အချိန်အထိ အေးစက်နေဆဲဖြစ်ကြောင်း မန္တလေးမြို့အခြေစိုက် အိမ်ခြံမြေအကျိုးဆောင်များထံမှ သိရသည်။
အိမ်ခြံမြေလုပ်ငန်းရှင်များ၏ ပြောကြားချက်အရ ငလျင်လှုပ်ခတ်မှုကြောင့် ဖြစ်ပေါ်ခဲ့သည့် စိုးရိမ်စိတ်များ ဆက်လက်ကျန်ရှိနေသဖြင့် ဝယ်ယူလိုသူများသည် အထပ်မြင့်တိုက်ခန်းများ ဝယ်ယူရာတွင် သတိထားနေကြပြီး ဈေးကွက်ပုံမှန်အခြေအနေသို့ ပြန်လည်ရောက်ရှိရန် အချိန်လိုအပ်နေသေးကြောင်း သိရသည်။
“ငလျင်ဖြစ်ပြီး တစ်နှစ်ကျော်လာပေမယ့် လူတွေရဲ့စိုးရိမ်စိတ်က မလျော့သေးပါဘူး။ အထပ်မြင့်တိုက်ခန်းတွေက ပြင်ပထိခိုက်မှု မများပေမယ့် အဆောက်အအုံအတွင်းပိုင်း ထိခိုက်မှုရှိနိုင်တယ်ဆိုတဲ့ စိုးရိမ်မှုကြောင့် ဝယ်ယူသူတွေက သတိထားနေကြတယ်။ လက်ရှိမှာတော့ အရောင်းထက် အငှားဈေးကွက်က ပိုမိုလှုပ်ရှားနေပါတယ်” ဟု ချမ်းမြသာစည်မြို့နယ်၊ မြရည်နန္ဒာရပ်ကွက်ရှိ အိမ်ခြံမြေအကျိုးဆောင်တစ်ဦးက ပြောကြားသည်။
ငလျင်မတိုင်မီက ရင်းနှီးမြှုပ်နှံသူများ စိတ်ဝင်စားဝယ်ယူခဲ့သည့် မြရည်နန္ဒာအိမ်ရာအပါအဝင် မြို့တွင်းအချက်အချာကျသည့် နေရာများရှိ အထပ်မြင့်တိုက်ခန်းများသည် လက်ရှိတွင် အရောင်းအဝယ်နည်းပါးနေပြီး အငှားဈေးကွက်သာ ပိုမိုလည်ပတ်လျက်ရှိကြောင်း အိမ်ခြံမြေလုပ်ငန်းရှင်များက ဆိုသည်။
ဈေးနှုန်းပိုင်းတွင် သိသာထင်ရှားသည့် အပြောင်းအလဲမရှိသေးဘဲ ငလျင်မတိုင်မီက မြရည်နန္ဒာအိမ်ရာရှိ တိုက်ခန်းတစ်ခန်း၏ ဈေးနှုန်းမှာ အကျယ်အဝန်းနှင့် အထပ်အလိုက် ကျပ်သိန်း ၇၀၀ ဝန်းကျင်ရှိခဲ့ပြီး မြို့တွင်းအထပ်မြင့်တိုက်ခန်းများမှာလည်း တည်နေရာ၊ အခန်းအကျယ်အဝန်းနှင့် အလွှာအလိုက် ကျပ်သိန်း ၇၀၀ ဝန်းကျင်မှ ကျပ်သိန်းသောင်းဂဏန်းအထိ ဈေးနှုန်းရှိခဲ့ကြောင်း သိရသည်။
လက်ရှိတွင် ဈေးနှုန်းများ တည်ငြိမ်နေသော်လည်း ယခင်ကဲ့သို့ အရောင်းအဝယ်မဖြစ်တော့ဘဲ ဝယ်လိုအား ဆက်လက်ကျဆင်းနေဆဲဖြစ်ကြောင်း မန္တလေးမြို့ရှိ အိမ်ခြံမြေလုပ်ငန်းရှင်များက ပြောကြားသည်။