ငလျင်ဒဏ်ကြောင့်ပျက်စီးခဲ့ရသည့် မန္တလေးမြို့မှ ဟိုတယ်များ၏ ပျက်စီးဆုံးရှုံးမှုများကို စနစ်တကျစာရင်းပြုစုတင်ပြရန် ဟိုတယ်ခရီးဝန်ကြီးမှာကြား

မန္တလေးငလျင်ကြီးဒဏ်ကြောင့်ပြိုကျပျက်စီးခဲ့သည့် မန္တလေးမြို့မှ ဟိုတယ်များ၏ ပျက်စီးဆုံးရှုံးမှုများကို စနစ်တကျစာရင်းပြုစုတင်ပြရန် ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီးဦးကျော်စိုးဝင်းက မှာကြားသည်။

၎င်းမှ ဧပြီ ၁၀ ရက်နံနက်ပိုင်းက မန္တလေးမြို့၌ပြိုကျပျက်စီးခဲ့သည့် ဟိုတယ်များအားကြည့်ရှုစစ်ဆေးပြီး ဟိုတယ်နှင့် တည်းခိုရိပ်သာလုပ်ငန်းရှင်များအားတွေ့ဆုံစဥ် ပြောကြားခဲ့ခြင်းဖြစ်သည်။

ဟိုတယ်ခရီးဝန်ကြီးမှ ငလျင်ဒဏ်ကြောင့် ဟိုတယ်အဆောက်အအုံများအတွင်းအပြင်ပြိုကျပျက်စီးနေမှု၊ ပျက်စီးမှုများကိုရှင်းလင်းဖယ်ရှားနေမှုများနှင့် ပြန်လည်ပြင်ဆင်ဆောင်ရွက်ရန် စီစဉ်ဆောင်ရွက်နေမှုတို့ကို ကြည့်ရှုစစ်ဆေးပြီး ဟိုတယ်များမှတာဝန်ရှိသူများကိုအားပေးကာ ပြိုကျပျက်စီးသွားသည့် အဆောက်အအုံများကို လမ်းများပိတ်ဆို့မှုမရှိအောင် အမြန်ရှင်းလင်းဖယ်ရှားရန်၊ အပျက်အစီးများကို ဖယ်ရှားခြင်း၊ အဆောက်အအုံများကို ပြုပြင်မွမ်းမံခြင်းလုပ်ငန်းများဆောင်ရွက်ရာ၌ ဘေးအန္တရာယ်ကင်းရှင်းရေးကို ဦးစားပေးဆောင်ရွက်ရန် မှာကြားခဲ့သည်။

ထို့နောက် မန္တလေးမြို့တော်စည်ပင်မှ တာဝန်ရှိသူများ၊ မန္တလေးမြို့ရှိ ဟိုတယ်နှင့်ခရီးသွားဆိုင်ရာ အသင်းအဖွဲ့များမှ တာဝန်ရှိသူများနှင့် လုပ်ငန်းရှင်များ၊ ဟိုတယ်နှင့်တည်းခိုရိပ်သာများမှ တာဝန်ရှိသူများအားတွေ့ဆုံ၍ ဟိုတယ်လုပ်ငန်းရှင်များအနေဖြင့် မိမိတို့ဟိုတယ်အဆောက်အအုံများ၏ ထိခိုက်ပျက်စီးမှုအပေါ်မူတည်ကာ သက်ဆိုင်ရာပညာရှင်များ၏ စစ်ဆေးချက်များရယူပြီး ၎င်းတို့၏ တွေ့ရှိချက်များအတိုင်း လုပ်ငန်းစဉ်လိုက်ပြုပြင်မွမ်းမံကာ အမြန်ဆုံးပြန်လည်ဖွင့်လှစ်နိုင်ရေးနှင့် ပြိုကျပျက်စီးသွားသော ဟိုတယ်အဆောက်အအုံများကိုလည်း အမြန်ဆုံးရှင်းလင်းနိုင်ရေးဆောင်ရွက်ကြစေလိုသည်ဟု မှာကြားသည်။

ထို့ပြင် ပျက်စီးဆုံးရှုံးမှုများကို စနစ်တကျစာရင်းပြုစုတင်ပြပေးစေလိုကာ အာမခံထားရှိသော လုပ်ငန်းရှင်များကို အာမခံကြေးများအမြန်ရရှိအောင် ကူညီဆောင်ရွက်ပေးမည်ဖြစ်ပြီး မန္တလေးငလျင်ကြီးဒဏ်ကြောင့် ထိခိုက်ခံစားခဲ့ရမှုများမှ ပြန်လည်ထူထောင်နိုင်ရန် ဟိုတယ်နှင့်ခရီးသွားဆိုင်ရာအသင်း အဖွဲ့များ၊ ဟိုတယ်နှင့် တည်းခိုရိပ်သာလုပ်ငန်းလုပ်ကိုင်သူများအားလုံး ဝိုင်းဝန်းပူးပေါင်းဆောင်ရွက်ပေးကြစေလိုသည်ဟုလည်း တိုက်တွန်းပြောကြားခဲ့သည်။

ထို့နောက် မန္တလေးငလျင်ကြီးကြောင့် ထိခိုက်ခံစားခဲ့ရသည့် ဟိုတယ်ခရီးဝန်ကြီးဌာနမှ ဝန်ထမ်းများနှင့် မိသားစုဝင်များအတွက် မြန်မာနိုင်ငံဟိုတယ်ဆိုင်ရာလုပ်ငန်းရှင်များအသင်း(ဗဟို)၊ ရန်ကုန်ဇုန်၊ တာချီလိတ်ဇုန်နှင့် ပြည်တွင်း/ပြည်ပမှ အလှူရှင်များက လှူဒါန်းသော ထောက်ပံ့ငွေများနှင့် အစားအသောက်များ၊ တစ်ကိုယ်ရေသုံးပစ္စည်းများကို ဒု-ဝန်ကြီး ဦးဖြိုးဇော်စိုးကလက်ခံရယူပြီး ငလျင်ဒဏ်သင့်ဝန်ထမ်းများထံ လွှဲပြောင်းဖြန့်ဝေပေးခဲ့သည်။