မြန်မာ့လက်ရွေးစင် ကြက်တောင်အား ကစားမယ် သက်ထားသူဇာသည် ဂျာမနီနိုင်ငံ၌ ကျင်းပခဲ့သည့် Yonex Bonn International 2026 ပြိုင်ပွဲအမျိုးသမီးတစ်ဦးချင်းပြိုင်ပွဲ၌ ဒုတိယဆု (Runner- up) ကို ဆွတ်ခူးရရှိခဲ့ကြောင်းသိရသည်။
အဆိုပါပြိုင်ပွဲကို မေလ (၂၇)ရက်မှ (၃၀) ရက်အထိ ကျင်းပခဲ့ခြင်းဖြစ်ပြီး သက်ထားသူဇာသည် (၃၂)ဦးအဆင့်မှ စတင်ကာ ဗိုလ်လုပွဲအထိ တက်လှမ်းနိုင်ခဲ့ခြင်းဖြစ်သည်။
မြန်မာ့ကြက်တောင်မယ် သက်ထားသူဇာသည်(၃၂) ဦးအဆင့် နှင့် (၁၆) ဦးအဆင့်အတွင်း တရုတ်တိုင်ပေကစားသမားကိုနှစ်ပွဲပြတ်ရလဒ်ဖြင့် အနိုင်ရယူနိုင်ခဲ့သည်။
ထို့နောက်ကွာတားဖိုင်နယ်အဆင့်တွင် အိန္ဒိယကစားသမားကို (၂၁-၁၅၊ ၂၁-၁၅) ဖြင့် ထပ်မံအနိုင်ရရှိခဲ့ကာ ဆီမီးဖိုင်နယ်အဆင့်တွင် အင်္ဂလန်ကစားသမားယှဉ် ပြိုင်ခဲ့ရပြီး (၂-၁) ပွဲရလဒ် (၂၁-၁၇၊ ၁၉-၂၁၊ ၂၁-၈)ဖြင့် ဗိုလ်လုပွဲသို့ တက်ရောက်နိုင်ခဲ့သည်။
ဗိုလ်လုပွဲအဆင့်တွင်သက်ထားသူဇာသည် တရုတ်တိုင်ပေကစားသမားနှင့် ယှဉ်ပြိုင်ကစားခဲ့ရာ (၉-၂၁၊ ၂၁-၁၈၊ ၁၀-၂၁) ရလဒ်ဖြင့် ရှုံးနိမ့်ခဲ့ခြင်းကြောင့် ဒုတိယဆု (ငွေတံဆိပ်)ဖြင့်ကျေနပ်ခဲ့ရသည်။
“သုညကနေ စပြီး တဖြည်းဖြည်းချင်း တစ်လှမ်းချင်းစီ ပြန်လျှောက်နေပါပြီ။
၂၀၂၀ ခုနှစ်နောက်ပိုင်း ပထမဆုံးအကြိမ်အဖြစ် ဗိုလ်လုပွဲတက်ရောက်ပြီး စင်မြင့်ထက်မှာ ဆုပြန်လည်ဆွတ်ခူးနိုင်ခဲ့တဲ့အ တွက် ဝမ်းသာမိပါတယ်။ ဘဝရဲ့ စိန်ခေါ်မှုတွေကြားထဲမှာ အရှုံးမပေးဘဲ ကြိုးစားခဲ့တဲ့ ကိုယ့်ကိုယ်ကိုယ်လည်း ကျေးဇူး တင်သလို ဂုဏ်လည်းယူမိတယ်”ဟု သက်ထားသူဇာက သူမ၏ လူမှုကွန်ရက်တွင် မျှဝေရေးသားထားသည်။