ဒေါ်အောင်ဆန်းစုကြည် နေထိုင်ခဲ့သည့် ရန်ကုန်မြို့၊ တက္ကသိုလ်ရိပ်သာလမ်းရှိ ခြံအမှတ် (၅၄) နေအိမ်ကို လေလံဈေး (၃)ဘီလျံ လျှော့ချကာ (၂၉၇) ဘီလျံဖြင့် ယနေ့ ဖေဖော်ဝါရီ (၅) ရက်၌ လေလံတင်ရောင်းချသော်လည်း ဝယ်ယူသူမရှိခဲ့ကြောင်း သိရသည်။
ယင်းခြံအိမ်ကို နှစ်ကြိမ်တိတိလေလံတင်ရောင်းချခဲ့ပြီးသော်လည်း ဝယ်ယူသူမရှိသည့်အတွက် (၂၉၇) ဘီလျံဖြင့် ဈေးလျှော့ကာ ထပ်မံလေလံတင်ခဲ့ခြင်း ဖြစ်သည်။
အဆိုပါ ခြံအမှတ် (၅၄)ကို ကျပ်ငွေ (၃၁၅) ဘီလီယံဖြင့်တစ်ကြိမ်၊ (၃၀၀) ဘီလီယံဖြင့် တစ်ကြိမ် လေလံတင်ရောင်းချခဲ့ပြီး ယခုတကြိမ်တွင် (၂၉၇)ဘီလျံဖြင့် လေလံတင်ရန် ကမာရွတ်မြို့နယ် တရားရုံးက ၂၀၂၅ ခုနှစ် ဇန်နဝါရီ (၂၅)က အမိန့်ချမှတ်ထားခြင်းဖြစ်ကာ လက်ရှိအချိန်ထိ ဝယ်ယူသူမရှိသေးခြင်း ဖြစ်သည်။
ခြံအမှတ် (၅၄) ၏ ဧရိယာအကျယ်အဝန်းမှာ (၁.၉၂၃) ဧက ကျယ်ဝန်းကြောင်းသိရကာ စတုရန်းပေ (၈၃၇၆၅.၈၈) ပေ ရှိကြောင်းလည်း သိရသည်။