မကွေးတိုင်း၊ ချောက်မြို့၊ အမှတ်(၅)ရပ်ကွက်၌ ဘာသာ သာသနာထွန်းကားနိုင်ရေး၊ သက်ကြီးရွယ်အိုများအပူရှောင်နားနေနိုင်ရေးတို့အတွက် ရည်ရွယ်၍ ဉာဏ်တော်(၈၁)ပေရှိ စွယ်တော်မြတ်စေတီတော်အား တည်ထားကိုးကွယ်တော်မူသွားမည်ဖြစ်ကြောင်း သိရသည်။
ထိုသို့ တည်ထားကိုးကွယ်တော်မူရန် ပထမအကြိမ်အလှူတော်ငွေပေးအပ်ပွဲအခမ်းအနားအား ဖေဖော်ဝါရီ ၂၇ ရက်နံနက် ၁၀ နာရီက မကွေးမြို့၊ မြို့တော်ခန်းမ၌ကျင်းပရာ ချောက်မြို့စွယ်တော်မြတ်စေတီတော်တည်ဆောက်ရေးဦးစီးကော်မတီဥက္ကဋ္ဌ၊ မကွေးတိုင်းဝန်ကြီးချုပ်ဦးတင့်လွင် တက်ရောက်ခဲ့ကြောင်း သိရသည်။
အခမ်းအနားတွင် မကွေးတိုင်းဝန်ကြီးချုပ်မှ ချောက်မြို့သည်ကမ္ဘာတွင် အပူဆုံးမြို့အဖြစ်စံချိန်တင်ခံခဲ့ရသည့်မြို့ဖြစ်၍ ဘာသာ သာသနာ ထွန်းကားနိုင်ရေးနှင့် သက်ကြီးရွယ်အိုများအပူရှောင်နားနေနိုင်ရေးတို့အတွက် စွယ်တော်မြတ်စေတီတော်အား တည်ထားကိုးကွယ်ရန်ကြိုးပမ်းဆောင်ရွက်ခြင်းဖြစ်ပြီး လက်ရှိအချိန်တွင် မြေနေရာပြုပြင်ထားရှိမှု ရာနှုန်းပြည့်ပြီးစီးပြီဟု ပြောသည်။
ထို့ပြင် စွယ်တော်မြတ်စေတီတော်မြတ်ကြီးတည်ထားကိုးကွယ်တော်မူနိုင်ရန် တိုင်းအစိုးရအဖွဲ့အနေဖြင့် ငွေကျပ်(၁ ဒသမ ၅)ဘီလီယံထည့်ဝင်လှူဒါန်းသွားမည်ဟုလည်း မကွေးတိုင်းဝန်ကြီးချုပ်ဦးတင့်လွင်က ပြောကြားခဲ့သည်။
ထို့နောက် မကွေးတိုင်းဝန်ကြီးချုပ်နှင့်တာဝန်ရှိသူများက တိုင်းအစိုးရအဖွဲ့မှဦးဆောင်ကာ တိုင်းအတွင်းရှိ ဌာနဆိုင်ရာများ၊ ခရိုင်များအတွင်းရှိ ဒေသခံများ၊ အလှူရှင်များကပေးအပ်လှူဒါန်းသည့် အလှူတော်ငွေကျပ်သိန်း(၁၁၀၀၀)ကျော်အားလက်ခံရယူ၍ ဂုဏ်ပြုမှတ်တမ်းလွှာများပြန်လည်ပေးအပ်ခဲ့ကြကြောင်း သိရသည်။
အဆိုပါ ဉာဏ်တော်(၈၁)ပေရှိ စွယ်တော်မြတ်စေတီတော်အား ချောက်မြို့၊ အမှတ်(၅)ရပ်ကွက်၊ ကွင်းအမှတ်(၂၂၉၃)၊ ညောင်ဖြူပင်ကွင်း၊ ဦးပိုင်အမှတ်( ၁၊ ၂ )အတွင်း၊ မြေဧရိယာ(၂၀ ဒသမ ၀၈)ဧကပေါ်တွင် တည်ထားကိုးကွယ်တော်မူသွားမည်ဖြစ်ပြီး ရရှိလာသည့် အလှူငွေများအား မကွေးမြို့၊ မြန်မာ့စီးပွားရေးဘဏ်တွင် “ချောက်မြို့ စွယ်တော်မြတ်စေတီအလှူငွေစာရင်း” အမည်ဖြင့် Account ဖွင့်လှစ်ထားကြောင်း သိရသည်။