ရန်ကုန်၊ စက်တင်ဘာ ၂၀
နိုင်ငံတော်ဩဝါဒါစရိယ၊ အဘိဓဇအဂ္ဂမဟာသဒ္ဓမ္မဇောတိက၊ အဂ္ဂမဟာကမ္မဋ္ဌာနာစရိယ ချမ်းမြေ့ဆရာတော်ဘုရားကြီးအား ရည်စူး၍ စက်တင်ဘာ ၂၀ ရက်မှ ၂၄ ရက်အထိ ငါးရက်တိုင် ညစဉ် တရားပွဲများ ကျင်းပသွားမည်ဖြစ်ကြောင်း အန္တိမအဂ္ဂိဈာပန သာဓုကီဠနပူဇော်ပွဲ ကျင်းပရေးအစီအစဉ်အရ သိရသည်။
အဆိုပါ တရားပွဲများကို ညစဉ် ၇ နာရီတွင် ကျင်းပမည်ဖြစ်ပြီး စက်တင်ဘာ ၂၀ ရက်တွင် ရွှေမင်းဝံဆရာတော် ဒေါက်တာဘဒ္ဒန္တသောဘန၊ စက်တင်ဘာ ၂၁ ရက်တွင် တိပိဋကယောဆရာတော် ဘဒ္ဒန္တသိရိန္ဒာဘိဝံသ၊ စက်တင်ဘာ ၂၂ ရက်တွင် အဝေရာရာမ ရန်ကင်းဆရာတော် ဘဒ္ဒန္တဩဒါတသိရီဘိဝံသ၊ စက်တင်ဘာ ၂၃ ရက်တွင် ပညာဘူမိတက္ကသိုလ် အဓိပတိဆရာတော် ဒေါက်တာဘဒ္ဒန္တနန္ဒမာလာဘိဝံသနှင့် စက်တင်ဘာ ၂၄ ရက်တွင် သီတဂူဆရာတော် ဒေါက်တာဘဒ္ဒန္တဉာဏိဿရတို့က တရားတော်များ အသီးသီး ဟောကြားချီးမြှင့်မည်ဖြစ်သည်။
ချမ်းမြေ့ဆရာတော်ဘုရားကြီးသည် ၁၃၈၈ ခုနှစ်၊ တော်သလင်းလဆန်း ၈ ရက်၊ စက်တင်ဘာ ၁၉ ရက် စနေနေ့ နံနက် ၁၁ နာရီ ၁၁ မိနစ်တွင် ရန်ကုန်မြို့ရှိ ဂရင်းဟံသာဆေးရုံကြီး၌ တစ်ဘဝခန္ဓာချုပ်ငြိမ်း ပျံလွန်တော်မူခဲ့ခြင်းဖြစ်သည်။
ဆရာတော်ဘုရားကြီး၏ အန္တိမအဂ္ဂိဈာပန သာဓုကီဠနပူဇော်ပွဲ ကို စက်တင်ဘာ ၂၅ ရက် သောကြာနေ့ မွန်းတည့် ၁၂ နာရီခွဲတွင် ချမ်းမြေ့ရိပ်သာကျောင်းတိုက်၌ စတင်ကျင်းပမည်ဖြစ်ပြီး မွန်းလွဲ ၂ နာရီတွင် ဥတုဇရုပ်ကလာပ်တော်ကို ပင့်ဆောင်မည်ဖြစ်သည်။
ထို့နောက် ညနေ ၃ နာရီခွဲတွင် ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်၊ သံသုမာလမ်းပေါ်ရှိ သုဝဏ္ဏဘူမိ EVENT Park သို့ ပင့်ဆောင်၍ သံဃာတော်များနှင့် ဒါယကာ၊ ဒါယိကာမများက နောက်ဆုံးပူဇော်ကြမည်ဖြစ်ကာ ညနေ ၄ နာရီခွဲတွင် အန္တိမအဂ္ဂိဈာပနသဘင် ကျင်းပမည်ဖြစ်ကြောင်း သိရသည်။
အန္တိမအဂ္ဂိဈာပန အခမ်းအနားတွင် ဆရာတော်ဘုရားကြီး၏ သက်တော်နှင့်အညီ ပင့်သံဃာတော် ဆရာတော်ဘုရားကြီး အပါး ၁၀၀ ပင့်ဖိတ်ပူဇော်သွားမည်ဖြစ်ကြောင်း သိရသည်။