ချင်းရွှေဟော်၊ ဩဂုတ်-၇
တရုတ်-မြန်မာနယ်စပ်ရှိ မွန်တင့်-ချင်းရွှေဟော် နယ်စပ်ဂိတ်မှတစ်ဆင့် မြန်မာနိုင်ငံမှ လတ်ဆတ်သော နာနတ်သီး ၄.၃၂ တန်ကို တရုတ်နိုင်ငံအတွင်းသို့ တင်ပို့ခဲ့ကြောင်း ယူနန်အခြေစိုက်သတင်းဌာန၏ ဖော်ပြချက်အရ သိရသည်။
မြန်မာ့နာနတ်သီးများကို ချင်းရွှေဟော်နယ်စပ်ဂိတ်မှ ပထမဆုံးအကြိမ် တင်ပို့ခြင်းဖြစ်ပြီး ဇူလိုင် ၂၆ ရက်တွင် နာနတ်သီးများ တင်ဆောင်လာသည့် ကုန်တင်ယာဉ်ကို အကောက်ခွန်ရှင်းလင်းရေး အောင်မြင်စွာ ဆောင်ရွက်နိုင်ခဲ့ခြင်းဖြစ်သည်။
အပူပိုင်းဒေသထွက် သစ်သီးများသည် လတ်ဆတ်မှုသက်တမ်း တိုတောင်းပြီး မိုးရာသီတွင် နယ်စပ်ဂိတ်သို့ သွားရောက်သည့် လမ်းခရီး အခြေအနေအမျိုးမျိုး ပြောင်းလဲတတ်သည့်အတွက် အကောက်ခွန်ရှင်းလင်းရေး အချိန်မီဆောင်ရွက်နိုင်ရန် စိန်ခေါ်မှုတစ်ရပ်ဖြစ်ကြောင်း မွန်တင့်အကောက်ခွန်ရုံးက ဆိုသည်။
၂၀၂၅ ခုနှစ် ဒီဇင်ဘာလတွင် သစ်သီးဝလံတင်သွင်းရေး သတ်မှတ်စစ်ဆေးရေးနေရာ စတင်အသုံးပြုခဲ့ပြီးနောက် မွန်တင့်-ချင်းရွှေဟော် နယ်စပ်ဂိတ်မှ တင်ပို့သည့် ပစ္စည်းအမျိုးအစားများကို ဆက်လက်တိုးချဲ့လျက်ရှိသည်။
ဇူလိုင် ၂၆ ရက်အထိ အဆိုပါ နယ်စပ်ဂိတ်မှတစ်ဆင့် သစ်သီးအသုတ် ၅၆ သုတ်၊ စုစုပေါင်း အလေးချိန် ၁,၄၀၇.၅ တန် တင်သွင်းပြီးဖြစ်ကြောင်း မွန်တင့်အကောက်ခွန်ရုံး၏ ထုတ်ပြန်ချက်အရ သိရသည်။
