“မြန်မာနှင့် တရုတ်နိုင်ငံတို့သည် အရေးပါသည့် စီးပွားရေးမိတ်ဖက်နိုင်ငံများဖြစ်ပြီး တရုတ်နိုင်ငံသည် မြန်မာနိုင်ငံ၏ အကြီးဆုံးကုန်သွယ်ဖက်နိုင်ငံအဖြစ် ရေရှည်ရပ်တည်လျက်ရှိပါသည်။ မြန်မာနိုင်ငံသည် Belt and Road Initiative (BRI) နှင့် China-Myanmar Economic Corridor (CMEC) စီမံကိန်းများအတွက် မဟာဗျူဟာမြောက် ဝင်ပေါက်တစ်ခုဖြစ်သည့်အပြင် အိန္ဒိယသမုဒ္ဒရာသို့ ဆက်သွယ်နိုင်မည့် အရေးပါသော လမ်းကြောင်းတစ်ခုလည်း ဖြစ်ပါသည်။
မြန်မာနိုင်ငံသည် ကြီးမားသည့်ဈေးကွက်တစ်ခုရှိသကဲ့သို့ အာဆီယံဒေသအတွင်း အချက်အချာကျသည့် ပထဝီအနေအထားကို ပိုင်ဆိုင်ထားပါသည်။ နှစ်နိုင်ငံအကြား ပူးပေါင်းဆောင်ရွက်မှုများ ပိုမိုမြှင့်တင်နိုင်ရေးအတွက် ကျောက်ဖြူအထူးစီးပွားရေးဇုန်နှင့် ရေနက်ဆိပ်ကမ်းစီမံကိန်းတို့ကို အကောင်အထည်ဖော်ဆောင်ရွက်လျက်ရှိပြီး ယင်းစီမံကိန်းများနှင့် ဆက်စပ်သော ရင်းနှီးမြှုပ်နှံမှုအခွင့်အလမ်းကောင်းများစွာ ရှိနေပါသည်။
ရွေးကောက်ခံအစိုးရအနေဖြင့် နိုင်ငံ၏ စီးပွားရေးနှင့် ရင်းနှီးမြှုပ်နှံမှုဝန်းကျင် ပိုမိုကောင်းမွန်လာစေရေးကို အလေးထားဆောင်ရွက်လျက်ရှိပြီး မဟာဗျူဟာမြောက် မိတ်ဖက်နိုင်ငံများနှင့် စီးပွားရေးပူးပေါင်းဆောင်ရွက်မှုများ တိုးမြှင့်နိုင်ရေးကို ဦးစားပေးဖော်ဆောင်လျက်ရှိပါသည်။
ထို့ပြင် နှစ်နိုင်ငံအကြား ကုန်သွယ်မှု ပိုမိုတိုးတက်လွယ်ကူစေရန် ပင်လယ်ရေကြောင်းကုန်သွယ်ရေးသာမက နယ်စပ်ကုန်သွယ်ရေးစခန်းများကိုလည်း အဆင့်မြှင့်တင်ကာ ပြန်လည်ဖွင့်လှစ်နိုင်ရေး ဆောင်ရွက်လျက်ရှိပါသည်။
ငွေပေးချေမှုစနစ်များတွင်လည်း အမေရိကန်ဒေါ်လာအပြင် တရုတ်ယွမ်ငွေဖြင့်ပါ ငွေပေးချေမှုများကို လက်ခံဆောင်ရွက်လျက်ရှိသဖြင့် တရုတ်လုပ်ငန်းရှင်များအနေဖြင့် မြန်မာနိုင်ငံ၌ ရင်းနှီးမြှုပ်နှံမှုများ ပြုလုပ်ရာတွင် ပိုမိုလွယ်ကူအဆင်ပြေစေမည်ဖြစ်ပါသည်” ဟု နိုင်ငံတော်သမ္မတ ဦးမင်းအောင်လှိုင်က ပြောကြားသည်။