ကမ္ဘာ့ကုလသမဂ္ဂ၏ “ဂေဟစနစ်ပြန်လည်ကောင်း မွန်ရှင်သန်ရေး ကုလသမဂ္ဂဆယ်စုနှစ်ကြေညာ ချက်(၂၀၂၁-၂၀၃၀)”နှင့်အညီ မြန်မာနိုင်ငံ၌ သစ် တောပြုန်းတီးမှုလျှော့ချရန် ဆောင်ရွက်လျက်ရှိဟု နစက ဥက္ကဋ္ဌပြော
မြန်မာနိုင်ငံအပါအဝင် ဖွံ့ဖြိုးဆဲနိုင်ငံများ၌ ကြုံ တွေ့နေရသည့် သစ်တောပြုန်းတီးမှုဖြစ်စဥ်များနှင့်ပတ်သက်၍ နစက ဥက္ကဋ္ဌမှပြောကြားခဲ့ခြင်းဖြစ် သည်။
နေပြည်တော်၊ဒက္ခိဏခရိုင်၊ဒက္ခိဏသီရိမြို့နယ်၊မာရဝိဇယဘုရားသွားလမ်းဖြစ်သည့် စံပယ်လမ်း ၌ ဇွန် ၂၆ ရက်နံနက်ပိုင်းကပြုလုပ်သည့် ၂၀၂၂ ခုနှစ် မိုးရာသီသစ်ပင်စိုက်ပျိုးပွဲတွင် ပြောကြားခဲ့ခြင်းဖြစ်သည်။
“မြန်မာနိုင်ငံအပါအဝင် ဖွံ့ဖြိုးဆဲနိုင်ငံတွေမှာ လက်ရှိကြုံတွေ့နေရတဲ့ သစ်တောပြုန်းတီးမှုဖြစ် စဉ်တွေကိုလေ့လာကြည့်ရင် သစ်တောတွေကို စည်းမဲ့ကမ်းမဲ့အလွန်အကျွံ ခုတ်ထွင်ရှင်းလင်းတာ ရွှေ့ပြောင်းတောင်ယာစိုက်ပျိုးတာ ထင်းနဲ့မီးသွေးလောင်စာအလွန်အကျွံထုတ်လုပ်တာ တောမီး လောင်ကျွမ်းတာ မြို့ပြနဲ့ဖွံ့ဖြိုးရေးလုပ်ငန်းတွေ စိုက်ပျိုးမြေနဲ့စက်မှုဖွံ့ဖြိုးရေးလုပ်ငန်းတွေ တိုးချဲ့လုပ်ဆောင်တာတွေကြောင့် သစ်တောမြေတွေကနေ တခြားမြေအသုံးချမှုကို ပြောင်းလဲဖြစ်ပေါ်စေပြီး သဘာဝသစ်တောဂေဟစနစ်တွေ တစ်နေ့ထက်တစ်နေ့ ပျက်စီးယိုယွင်းလာနေတာဖြစ်ပါတယ်”ဟု နစက ဥက္ကဋ္ဌကပြောသည်။
ထို့ပြင် သစ်တောပြုန်းတီးမှုကြောင့် လူသားများအသက်ရှင်ရပ်တည်ရေးအတွက် ကြီးများသည့် ခြိမ်းခြောက်မှုများဖြစ်သည့် ရာသီဥတုပြောင်းလဲဖောက်ပြန်လာခြင်း၊မြစ်ချောင်း၊ကန်များတိမ် ကောလာကာ ရေကြီးရေလျှံမှုများဖြစ်ပေါ်ခြင်းနှင့်ရေများညစ်ညမ်းလာပြီး ရေချိုအရင်းအမြစ်များခမ်းခြောက်ဆုံးရှုံးလာခြင်း၊မြေဆီလွှာများပြုန်းတီးခြင်း၊ဇီဝမျိုးစုံမျိုးကွဲများပျောက်ဆုံးလျော့နည်းလာခြင်းများအား ကြုံတွေ့နေရသည်ဟု ပြောသည်။
“ကမ္ဘာ့ကုလသမဂ္ဂက “ဂေဟစနစ်ပြန်လည်ကောင်းမွန်ရှင်သန်ရေး ကုလသမဂ္ဂဆယ်စုနှစ်ကြေညာချက်(၂၀၂၁-၂၀၃၀)” ကိုထုတ်ပြန်ခဲ့ရာမှာ ရာသီဥတုပြောင်းလဲမှုဆိုင်ရာဘေးအန္တရာယ်တွေ တွန်းလှန်တိုက်ဖျက်နိုင်ရေး၊သန်းပေါင်းများစွာသော မျိုးစိတ်တွေ လျော့ပါးပျောက်ကွယ်လာတာကို တားဆီးကာကွယ်နိုင်ရေးနဲ့အစားအစာဖူ လုံမှု၊ရေထောက်ပံ့မှုနဲ့အသက်မွေးဝမ်းကြောင်းလုပ်ငန်းတွေ သေချာခိုင်မာစေရေးတို့အတွက် ပျက်ဆီးပြုန်းတီးလာတဲ့ ဂေဟစနစ်တွေကို ပြန် လည်ရှင်သန်ကောင်းမွန်လာစေဖို့ တွန်းအားပေးမြှင့်တင်ဆောင်ရွက်နေတာကို လေ့လာတွေ့ရှိရပါတယ်”ဟု နစက ဥက္ကဋ္ဌကပြောသည်။
ထို့ပြင် မြန်မာနိုင်ငံ၌ ၂၀၀၀ ပြည့်နှစ်တွင် သစ် တောဖုံးလွှမ်းမှုသည် နိုင်ငံဧရိယာ၏ ၅၂ ရာခိုင် နှုန်းရှိခဲ့ပြီး ၂၀၂၀ ပြည့်နှစ်တွင် ၄၂ ဒသမ ၁၉ ရာ ခိုင်နှုန်းရှိ၍ သစ်တောဖုံးလွှမ်းမှု ပိုမိုလျော့နည်းမသွားစေရန် သစ်တောပြုန်းတီးမှုလျှော့ချရပ်ဆိုင်းနိုင်ရန် သဘာဝတောများထိန်းသိမ်းရန် သစ်တောများပြန်လည်ထူထောင်ရန် ပူးပေါင်းဆောင်ရွက်ရမည်ဟု နစက ဥက္ကဋ္ဌမှတိုက်တွန်းပြောကြားခဲ့သည်။
“သစ်တောမြေကနေ တခြားမြေအဖြစ်ပြောင်းလဲအသုံးချမှုမရှိစေဖို့ အမြဲတမ်းသစ်တောနယ်မြေအတွင်းသာမကပဲ သစ်တောမြေပြင်ပသဘာဝတောတွေကို ထိရောက်စွာထိန်းသိမ်းနိုင်ဖို့အတွက် သစ်တောမူဝါဒတွေနဲ့အညီ သက်ဆိုင်ရာဝန်ကြီး ဌာနတွေ တိုင်းနဲ့ပြည်နယ်အစိုးရအဖွဲ့တွေ လူမှုအ ဖွဲ့အစည်းတွေနဲ့ နိုင်ငံသားတွေအားလုံးက ပူး ပေါင်းဆောင်ရွက်ပေးကြဖို့ အသိပေးတိုက်တွန်းလိုပါတယ်”ဟု နစက ဥက္ကဋ္ဌကပြောသည်။