USDP ပါတီညီလာခံကျင်းပမည်
ပြည်ထောင်စုကြံခိုင်ရေးနှင့် ဖွံ့ဖြိုးရေးပါတီ(USDP)၏ ပါတီညီလာခံတစ်ရပ်ကို အမြန်ဆုံးကျင်းပသွားရန်ရှိကြောင်း ယင်းပါတီ၏ ပြောရေးဆိုခွင့်ရပုဂ္ဂိုလ် ဒေါက်တာနန္ဒာလှမြင့်က ပြောသည်။
လက်ရှိတွင် ကိုဗစ်၁၉ ကူးစက်မြန်ရောဂါကြောင့် နိုင်ငံတော်က လူဦးရေ ၄၀၀နှင့်အထက်စုဝေးခွင့်မပြုကြောင်း ကန့်သတ်ထားသည့်အတွက် ယင်းအပေါ် လက်တလောဆောင်နိုင်ခြင်းမရှိသည့်အတွက် ပါတီဗဟိုအလုပ်အမှုဆောင် အစည်းအဝေးကို ကနဦးကျင်းပပြီးစီးခဲ့ပြီဖြစ်ကြောင်းဆိုသည်။
” ညီလာခံကျင်းပရင် လူထောင်ချီတက်ရောက်မှာဖြစ်တဲ့အတွက် လက်ရှိအစိုးရက ကိုဗစ် ၁၉ ရောဂါကြောင့် လူဦးရေ ၄၀၀နဲ့အထက်စုဝေးခွင့်မပြုတာကြောင့် မကျင်းပနိုင်သေးတာပါ။ ပါတီညီလာခံကို အမြန်ဆုံးကျင်းပနိုင်ဖို့ ဆောင်ရွက်နေပါတယ်။ ဒါဟာ ပါတီရဲ့ဖွဲ့စည်းပုံအရ ငါးနှစ်တစ်ကြိမ်လုပ်ရမယ့် ညီလာခံပါ။” ဟု ဆိုသည်။
ပြီးခဲ့သော ဇွန်၈ ရက်နှင့်၉ ရက်တို့တွင်ပါတီဗဟိုကော်မတီအစည်းအဝေးကိုကျင်းပခဲ့ပြီး၊ အဆိုပါအစည်းအဝေးမှတစ်ဆင့် မိမိဆန္ဒအရ ဖြစ်စေ၊ ကျန်းမာရေးအခြေအနေအရဖြစ်စေနှုတ်ထွက်စာတင်ခဲ့သည့် ဗဟိုကော်မတီဝင်များရှိကြောင်းဆိုသည်။
“ပါတီ ထိပ်ပိုင်းခေါင်းဆောင်တွေတော့အပြောင်းအလဲမရှိပါဘူး။ ဗဟိုကော်မတီဝင်ထဲက မိမိဆန္ဒအရ ၊ ကျန်းမာရေးအခြေအနေအရနှုတ်ထွက်တဲ့သူတွေရဲ့လစ်လပ်နေရာမှာတော့ အစားထိုးပြောင်းလဲတာရှိပါတယ်။”ဟု ဆိုသည်။
ထို့အပြင် ပါတီဗဟိုကော်မတီအစည်းအဝေးမှ ပါတီ၏ရှေ့လုပ်ငန်းစဥ် ၅ ချက်ကိုလည်းချမှတ်နိုင်ခဲ့ပြီး၊ ပါတီတည်ဆောက်ရေး၊ နိုင်ငံတော် တည်ဆောက်ရေးနှင့် ပြည်သူလူထုခံစားနေရသော အခက်အခဲများအတွက် ကူညီဆောင်ရွက်ပေးရန်ဆိုသည့် ရှေ့လုပ်ငန်းစဥ်များဆွေးနွေးခဲ့ကြကြောင်းသိရသည်။
ယင်းအပြင် ပါတီထိပ်ပိုင်းခေါင်းဆောင်များ အပြောင်းအလဲဖြစ်မည်ဆိုသည့်အကြောင်းအပါအဝင် ပါတီအတွင်းပြိုကွဲစေရန်ရည်ရွယ်ချက်ဖြင့် လှုံဆော်နေမှုများသည်အထောက်အထားမရှိ ပြုလုပ်နေခြင်းများဖြစ်ပြီး၊ ယင်းသည် လုပ်ကြံဖန်တီးထားသော သတင်းများလည်းဖြစ်ကြောင်း ဒေါက်တာနန္ဒာလှမြင့်က ဆိုသည်။
ပြီးခဲ့သော ဇွန် ၈ ရက်နှင့် ၉ရက် နှစ်ရက်ကြာ ကျင်းပခဲ့သည့်ပါတီဗဟိုကော်မတီအစည်းအဝေးတွင် ပါတီ ဥက္ကဋ္ဌ ဦးသန်းဌေးနှင့်အတူ ဒုတိယဥက္ကဋ္ဌများဖြစ်သော ဦးမြတ်ဟိန်း၊ ဦးလှထွန်း၊ အထွေထွေအတွင်းရေးမှူး ဦးသက်နိုင်ဝင်းနှင့် ဖိတ်ကြားထားသော ပါတီဗဟိုအတိုင်ပင်ခံများ၊ ဗဟိုအလုပ်အမှုဆောင်ကော်မတီဝင်များ၊ တိုင်းဒေသကြီး/ပြည်နယ်အသီးသီးမှ ဗဟိုကော်မတီဝင်များ တက်ရောက်ခဲ့ကြောင်း သိရသည်။
