ရှမ်းပြည်နယ်တောင်ပိုင်း၊ မိုင်းပန်မြို့နယ် ၊ နားဆာလဲကျေးရွာရှိ ငြိမ်းချမ်းရေးကွင်းအတွင်း တည်ဆောက်ထားသည့် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) အထိမ်းအမှတ် ကျောက်တိုင်ဖွင့်ပွဲသို့ ယနေ့ ဖေဖော်ဝါရီ (၆)ရက် နံနက်ပိုင်းတွင် ရှမ်းပြည်ပြန်လည်ထူထောင်ရေးကောင်စီ(RCSS/SSA) ဥက္ကဋ္ဌ ဗိုလ်ချုပ်ကြီး ယွက်ဆစ်တက်ရောက်ဖွင့်လှစ်ပေးခဲ့ကြောင်း သိရသည်။
အဆိုပါ ကျောက်တိုင်ဖွင့်ပွဲနှင့် တဆက်တည်း (၇၈)နှစ် မြောက် ရှမ်းပြည်အမျိုးသားနေ့ ဖွင့်ပွဲအခမ်းအနားကိုလည်း ဖွင့်လှစ်ပေးခဲ့ကြောင်း သိရသည်။
အခမ်းအနားဖွင့်ပွဲသို့ ကုလသမဂ္ဂ အထူးအကြံပေး ပုဂ္ဂိုလ် Mr.Vijay Nambiar မြန်မာနိုင်ငံဆိုင်ရာ ဥရောပသမဂ္ဂသံအမတ်ကြီး Mr. Roland Kobia၊ တရုတ်ပြည်သူ့သမ္မတနိုင်ငံ အာရှရေးရာ အထူးသံတမန် Mr.Sun Guoxiang ၊ ပြည်ထောင်စုသမ္မတ မြန်မာနိုင်ငံတော်ဆိုင်ရာ အိန္ဒိယသမ္မတနိုင်ငံ သံအမတ်ကြီး မစ္စတာ ဂေါတမ် မူခပဒယာ၊ ထိုင်းနိုင်ငံ နိုင်ငံခြားရေး ဝန်ကြီး၏ အထူးကိုယ်စားလှယ် Mr.Apichart Chinwanno၊ မြန်မာနိုင်ငံ အမျိုးသားပြန်လည်သင့်မြတ်ရေး ဂျပန်အစိုးရ အထူးကိုယ်စားလှယ် Mr.Yohei Sasa kawa တို့က သဝဏ်လွှာများပေးပို့ခဲ့ကြောင်း သိရသည်။
ထို့အပြင် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့ (၇)ဖွဲ့တို့ ကလည်း သဝဏ်လွှာများ ပေးပို့ခဲ့ကြကြောင်း သိရသည်။
(၇၈)နှစ်မြောက် ရှမ်းပြည်အမျိုးသားနေ့ အခမ်းအနားအား ဖေဖော်ဝါရီ (၇)ရက်မှ (၈)ရက်အထိ ကျင်းပပြုလုပ်မည်ဖြစ်ပြီး၊ ပွဲတော်အတွင်း နာမည်ကြီးအဆိုတော်များ ၊ သီ ပေါမြို့ ရှမ်းအမျိုးသားယဉ်ကျေးမှု ဇတ်သဘင်လည်း ပါဝင်ဖျော်ဖြေသွားမည်ဖြစ်ကြောင်း သိရသည်။
Photo – Tai Freedom