MSME လုပ်ငန်းများနှင့် သီလဝါအထူးစီးပွားရေးဇုန် ချိတ်ဆက်ဆောင်ရွက်ကာ ပြည်ပပို့ကုန်တိုးမြှင့်ရန် ဒုတိယသမ္မတ ဦးညိုစော လမ်းညွှန်

မြန်မာအထူးစီးပွားရေးဇုန်ဆိုင်ရာဗဟိုအဖွဲ့ ဥက္ကဋ္ဌ ဒုတိယသမ္မတ ဦးညိုစောက ပြည်ပပို့ကုန်တိုးတက်စေရေးအတွက် ပြည်တွင်း MSME လုပ်ငန်းများနှင့် သီလဝါအထူးစီးပွားရေးဇုန်ရှိ လုပ်ငန်းများကို ချိတ်ဆက်ဆောင်ရွက်ပေးရန် လမ်းညွှန်မှာကြားခဲ့သည်။

ဇူလိုင် ၃ ရက်က ကျင်းပသည့် မြန်မာအထူးစီးပွားရေးဇုန်ဆိုင်ရာဗဟိုအဖွဲ့ ညှိနှိုင်းအစည်းအဝေးတွင် ဒုတိယသမ္မတက လက်ရှိအကောင်အထည်ဖော်နေသည့် အထူးစီးပွားရေးဇုန်များသည် အလုပ်အကိုင်အခွင့်အလမ်းများ ဖန်တီးပေးခြင်း၊ ကုန်ထုတ်လုပ်မှုနှင့် ပြည်ပပို့ကုန်တိုးတက်စေခြင်း၊ နိုင်ငံခြားရင်းနှီးမြှုပ်နှံမှုနှင့် နိုင်ငံခြားဝင်ငွေ တိုးမြှင့်ရရှိစေခြင်းတို့အတွက် အရေးပါကြောင်း ပြောကြားခဲ့သည်။

ထို့ကြောင့် ပြည်တွင်း MSME လုပ်ငန်းများနှင့် သီလဝါအထူးစီးပွားရေးဇုန်ရှိ စက်မှုလုပ်ငန်းများအကြား ချိတ်ဆက်ပူးပေါင်းဆောင်ရွက်နိုင်ရေး အလေးထားဆောင်ရွက်ရန်နှင့် ကျောက်ဖြူအထူးစီးပွားရေးဇုန်၊ ထားဝယ်အထူးစီးပွားရေးဇုန်နှင့် ရေနက်ဆိပ်ကမ်းစီမံကိန်းများကို သတ်မှတ်အချိန်ဇယားအတိုင်း အဆင့်လိုက်တိုးတက်မှုရှိစေရန် အကောင်အထည်ဖော်ဆောင်ရွက်ရန် လမ်းညွှန်ခဲ့သည်။

ထို့ပြင် အထူးစီးပွားရေးဇုန်များ၏ စီမံခန့်ခွဲမှုတွင် အားနည်းချက်များ မဖြစ်ပေါ်စေရေး၊ လုပ်ငန်းများကို သတ်မှတ်ကာလအတွင်း ပြီးမြောက်စေရေးနှင့် ရင်းနှီးမြှုပ်နှံမှုများ ပိုမိုဝင်ရောက်လာစေရန် စည်းရုံးဆွဲဆောင်ရေးလုပ်ငန်းများကိုလည်း အရှိန်အဟုန်မြှင့် ဆောင်ရွက်ကြရန် ဒုတိယသမ္မတ ဦးညိုစောက မှာကြားခဲ့ကြောင်း သိရသည်။