ရေရှည်စီမံကိန်းအဖြစ် ချေးငွေနှင့် AEC ဈေးကွက်ဝင်ရောက်ရေး ပြည်တွင်းလုပ်ငန်းရှင်များကို စွမ်းဆောင်ရည်မြှင့်တင်မှုများ ဆက်လက်ဆောင်ရွက်မည်
နေပြည်တော်၊ဇူလိုင်-၁၈
ဘဏ္ဍာရေးဆိုင်ရာပံ့ပိုးမှု (Financial Assistance)အနေဖြင့် MSME ဖွံ့ဖြိုးတိုးတက်ရေးရန်ပုံငွေကို ကျပ်ဘီလီယံ ၁၇၀ ဖြင့် အခိုင်အမာထူထောင်ထားပြီးဖြစ်ကြောင်း ၊ စက်မှုနှင့် အသေးစား၊ အငယ်စား၊ အလတ်စား နှင့် စီးပွားရေးလုပ်ငန်းများဖွံ့ဖြိုးတိုးတက်ရေးဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းက ပြောသည်။
တတိယအကြိမ် ပြည်သူ့လွှတ်တော် ဒုတိယပုံမှန်အစည်းဝေး ၂၅ ရက်မြောက်နေ့တွင် ပြည်ထောင်စုဝန်ကြီး ကပြောကြားခဲ့ခြင်းလည်း ဖြစ်သည်။
အဆိုပါရန်ပုံငွေအနက်မှ ကျပ် ၁၅၀ ဘီလီယံကို ၂၀၂၄ ခုနှစ်၊ အောက်တိုဘာလမှစပြီး MSME ချေးငွေအဖြစ် ထုတ်ချေးပေးလျက်ရှိပြီး ကျန်ရှိသည့် ရန်ပုံငွေ ကျပ်၂၀ ဘီလီယံကို ချေးငွေမဟုတ်သည့် MSME ဖွံ့ဖြိုးတိုးတက်ရေးဆိုင်ရာကိစ္စရပ်များတွင် ထိရောက်စွာ ခွဲဝေကျခံသုံးစွဲလျက်ရှိကြောင်းလည်း ပြည်ထောင်စုဝန်ကြီးက ပြောသည်။
MSME လုပ်ငန်းများနှင့် စက်မှုဇုန်များဖွံ့ဖြိုးတိုးတက်စေရန် ဆောင်ရွက်မည့်အစီအမံများ သိရှိ လိုခြင်းနှင့် စပ်လျဉ်းသည့်မေးခွန်းနှင့် ပတ်သက်ပြီး ဒေါက်တာထိန်ဝင်း(ကျောင်းကုန်းမဲဆန္ဒနယ်) လွှတ်တော်တွင် မေးမြန်းမှုကို ပြန်လည်ဖြေကြားသည့်အချိန် ပြည်ထောင်စုဝန်ကြီး ဒေါက်တာချာလီသန်း က ထည့်သွင်းပြောကြားခဲ့ခြင်းလည်း ဖြစ်သည်။
ရေတိုစီမံကိန်းအဖြစ် ၂၀၂၆ ခုနှစ်၊ မေလအထိ MSME လုပ်ငန်းရှင် ၂၃၆ ဦးသို့ ချေးငွေစုစုပေါင်း ကျပ်သန်း ၈,၉၄၀ ကို ထုတ်ချေးပေးခြင်း၊ ချေးငွေ မဟုတ်သော ရန်ပုံငွေ ကျပ်ဘီလီယံ ၂၀ မှ သုံးစွဲ၍ ပြည်ထောင်စုအဆင့် MSME ထုတ်ကုန်ပြပွဲ၊ ပြိုင်ပွဲနှင့် ဈေးရောင်းပွဲတော်များကို ကျင်းပခြင်းများလုပ်ဆောင်ထားကြောင်း သိရသည်။
ထို့အတူ လုပ်ငန်းရှင်များအတွက် ဈေးကွက် ချိတ်ဆက်မှု များဖော်ဆောင်ပေးခြင်း၊ MSME လုပ်ငန်းများ ဖွံ့ဖြိုးတိုးတက်ရေးအတွက် ဆွေးနွေးပွဲ များ၊ နည်းပညာလွှဲပြောင်းခြင်းများနှင့် လူ့စွမ်းအားအရင်းအမြစ်သင်တန်းများ ဖွင့်လှစ်ပို့ချပေးခြင်းများ ဆောင်ရွက်နိုင်ခဲ့ကြောင်း သိရသည်။
ထိုပြင် ရေရှည်စီမံကိန်းအဖြစ် ချေးငွေများ ဆက်လက်ထုတ်ချေးခြင်း၊ အာဆီယံ MSME ညှိနှိုင်းဆောင်ရွက်ရေးကော်မတီ(ASEAN Coordinating Committee on Micro, Small and Medium Enterprises-ACCMSMES)နှင့်ပူးပေါင်းကာ ဒေသတွင်းဈေးကွက်(ASEAN Economic Community-AEC)သို့ ဝင်ရောက်နိုင်ရန် ပြည်တွင်းလုပ်ငန်းရှင်များကို စွမ်းဆောင်ရည်မြှင့်တင် ပေးခြင်း၊ မဲခေါင်-လန်ချန်းအထူးရန်ပုံငွေဖြင့် ရရှိလာသည့် ရန်ပုံငွေစီမံကိန်းများအရ ပံ့ပိုးပေးခြင်းများကိုလည်း ဆောင်ရွက်ပေးသွားရမည်ဖြစ်ကြောင်း ဒေါက်တာချာလီသန်း ကပြောသည်။
လက်ရှိ MSME ဖွံ့ဖြိုး တိုးတက်ရေးနှင့် ဒေသဖွံ့ဖြိုးရေးဆိုင်ရာ လမ်းညွှန်မှာကြားချက် ၂၄၆ ချက် အနက် ၂၂၅ ချက် ၉၁.၅ ရာခိုင်နှုန်း၊ MSME လုပ်ငန်းရှင်များ၏ တင်ပြချက် ၃၁၁ ချက်အနက် ၂၉၇ ချက် ၉၅.၅ ရာခိုင်နှုန်းကို အကောင် အထည်ဖော်ဆောင်ရွက်ပြီးဖြစ်ကာ ကျန်ရှိသည့်အချက်များကိုလည်း ဆက်လက် ဆောင်ရွက် နေကြောင်း သိရသည်။