မလေးရှားလေကြောင်းလိုင်း၏ ကြမ္မာဆိုးကြုံခဲ့သော MH370 လေယာဉ် ရှာဖွေမှုကို အိန္ဒိယသမုဒ္ဒရာတွင် စတင်နေပြီဖြစ်ပြီး လွန်ခဲ့သည့် ၁၁ နှစ်က ပျောက်ဆုံးသွားခဲ့သည့် လေယာဉ်ကို တွေ့ရှိရေး နောက်ဆုံးကြိုးပမ်းမှု ဖြစ်လာဖွယ်ရှိသည်။
အမေရိကနှင့် ဗြိတိန်အခြေစိုက် ပုဂ္ဂလိက ရေကြောင်းရှာဖွေရေးကုမ္ပဏီ Ocean Infinity ၏ ရေနက်ပိုင်း ထောက်ပံ့ရေးသင်္ဘော Armada 7806 သည် ပါ့သ်မြို့ကမ်းလွန် ၁၅,ဝဝ၀ စတုရန်းကီလိုမီတာခန့်ရှိ ရှာဖွေရေးဇုန်အသစ်သို့ သီတင်းပတ်ကုန်ပိုင်းတွင် ရောက်ရှိလာခဲ့သည်ဟု သြစတြေးလျနှင့် ဗြိတိသျှ မီဒီယာများက ဖေဖော်ဝါရီ ၂၅ ရက်တွင် ဖော်ပြခဲ့သည်။
ရှာဖွေရေးဇုန်သို့ ရောက်ရှိပြီး နာရီပိုင်းအကြာတွင်ပင် သင်္ဘောပေါ်မှ အလိုအလျောက် ထိန်းကျောင်းမောင်းနှင်သော ရေအောက်ယာဉ်များ ဖြန့်ကျက်ခဲ့ကာ သမုဒ္ဒရာကြမ်းပြင်ကို အသေးစိတ်ရှာဖွေမှုများ စတင်နေသည်ဟု ဗြိတိသျှ သတင်းစာ သည်တယ်လီဂရပ်ဖ်က ဖော်ပြခဲ့သည်။
Armada သည် ဘိုးရင်း ၇၇၇ လေယာဉ်၏ အကြွင်းအကျန်များ တည်ရှိနိုင်ကြောင်း သုတေသီအချို့က အကြံပြုထားသည့် အရေးကြီးနေရာလေးခုကို အဓိကထား၍ စတုရန်းကီလိုမီတာ ၁၅,၀၀၀ ရှိ ရေပြင်ဧရိယာတွင် သီတင်းခြောက်ပတ်ကြာ ရှာဖွေမှုလုပ်သွားမည်ဖြစ်ကြောင်း သြစတြေးလျ 9NEWS သတင်းကလည်း ဖော်ပြခဲ့သည်။
သမုဒ္ဒရာကြမ်းပြင်၏ မြေမျက်နှာသွင်ပြင်နှင့် ရာသီဥတုကြောင့် ရှာဖွေမှုသည် ရှုပ်ထွေးမည်ဟု မျှော်လင့်ရသည်။
လေယာဉ်ပျက်အတွက် ရေအောက်ရှာဖွေမှုများ ပြန်လည်စတင်ရန် Ocean Infinity ကို တာဝန်ပေးထားသည်ဟု မလေးရှား သယ်ယူပို့ဆောင်ရေးဝန်ကြီး Anthony Loke က ၂၀၂၄ ခုနှစ် ဒီဇင်ဘာလအတွင်းက ပြောဆိုထားသည်။
လုပ်ငန်းသဘောတူညီချက်အရ ရှာမတွေ့လျှင် အခကြေးပေးစရာမလိုဟူသော မူကို အခြေခံထားပြီး မည်သည့်အရာမျှ ရှာမတွေ့ပါက အစိုးရသည် အခကြေးငွေ ပေးချေရမည်မဟုတ်ပေ။
လေယာဉ်အပျက်အစီးကို ရှာတွေ့ခဲ့ပါက Ocean Infinity သည် ၂၀၁၈ ခုနှစ်က အလားတူ အဆိုပြုခဲ့သည့်အတိုင်း ဝန်ဆောင်ခအမေရိ ကန်ဒေါ်လာ သန်း ၇၀ ရရှိမည်ဖြစ်သည်။
၂၀၁၄ ခုနှစ် မတ်လ ၈ ရက်နေ့က ခရီးသည် ၂၂၇ ဦးနှင့် လေယာဉ်အမှုထမ်း ၁၂ ဦး လိုက်ပါခဲ့သော ဘိုးရင်း ၇၇၇ လေယာဉ်သည် ကွာလာလမ်ပူမှ ပေကျင်းသို့ ထွက်ခွာသွားခဲ့ခြင်းဖြစ်သည်။ သို့ရာတွင် နောက်ပိုင်းတွင် လေယာဉ်သည် ပျောက်ဆုံးသွားခဲ့ပြီး ယခုအချိန်အထိ အစအန ပျောက်နေခဲ့ခြင်းဖြစ်သည်။
Ref: သည်စထရိတ်တိုင်းမ်စ်