Fort Knox မှ ရွှေများ ရှိ၊ မရှိ စစ်ဆေးလိုကြောင်း ထရန့် ပြောကြား၊ “သူတို့တွေ အများကြီး ခိုးယူနေကြတယ်” ဟုဆို

အမေရိကန်သမ္မတ ဒေါ်နယ်ထရန့်က ၎င်းအနေဖြင့် Fort Knox စစ်အခြေစိုက်စခန်းရှိ လုံခြုံရေးအဆင့်မြင့် အကာအရံများအတွင်းသို့ ကိုယ်တိုင်သွားရောက်ကြည့်ရှုပြီး နိုင်ငံတော်၏ ရွှေအရန်သင့်စုဆောင်းမှုများ အမှန်တကယ် ရှိ၊ မရှိ အတည်ပြုလိုကြောင်း ပြောကြားခဲ့သည်။ ထိုသို့စစ်ဆေးလိုရခြင်းမှာ “သူတို့တွေ အများကြီး ခိုးယူနေကြလို့” ဖြစ်ကြောင်း သူက ဆိုသည်။

ပြီးခဲ့သည့် တနင်္ဂနွေနေ့က သတင်းထောက် Sharyl Attkisson နှင့် ပြုလုပ်ခဲ့သော အင်တာဗျူးတွင် အသက် ၇၉ နှစ်အရွယ် ဘီလျံနာသမ္မတကြီးအား ၂၀၂၅ ခုနှစ် ဖေဖော်ဝါရီလက ပေးခဲ့သော ကတိနှင့်ပတ်သက်၍ မေးမြန်းခဲ့ခြင်းဖြစ်သည်။ ၎င်းကင်တပ်ကီပြည်နယ်ရှိ စစ်ဘက်ဆိုင်ရာ အခြေစိုက်စခန်းတစ်ခုဖြစ်ပြီး အမေရိကန်၏ အရန်ရွှေချောင်းစုဆောင်းမှု အများအပြားကို ထိန်းသိမ်းထားရာနေရာဖြစ်သည်။

သူ၏ ကတိစကားနှင့်ပတ်သက်၍ သတိပေးမေးမြန်းမှုကို ထရန့်က “ကျွန်တော်တို့ အဲဒီကိုသွားပြီး Fort Knox ရဲ့ အလွန်ထူထဲတဲ့ တံခါးကို ခေါက်ကြည့်ချင်တာ။ အထဲမှာ ရွှေတွေ တကယ်ရှိသေးရဲ့လားဆိုတာ သိချင်လို့ပါ” ဟု ပြန်လည်ဖြေကြားခဲ့သည်။

သူက ဆက်လက်၍ “ဒါဟာ စိတ်ဝင်စားစရာကောင်းတဲ့ မေးခွန်းတစ်ခုပါ။ ကျွန်တော်တို့ အဲဒီကိစ္စကို စဉ်းစားခဲ့ကြတယ်။ Fort Knox ထဲမှာ ရွှေတွေ ကျန်သေးရဲ့လားလို့ ကျွန်တော် သံသယဖြစ်မိတယ်၊ ဘာလို့လဲဆိုတော့ သူတို့တွေ အများကြီး ခိုးယူနေကြလို့ပါ” ဟု ပြောကြားခဲ့သော်လည်း ‘သူတို့’ ဟု ဆိုရာတွင် မည်သူ့ကို ရည်ညွှန်းသည်ဆိုသည်ကိုမူ ရှင်းရှင်းလင်းလင်း ပြောဆိုခြင်း မရှိပေ။

အဆိုပါအစီအစဉ်ကို အကောင်အထည်ဖော်ရန် ရည်ရွယ်ချက် ရှိ၊ မရှိ မေးမြန်းရာတွင် ရီပတ်ဘလစ်ကန်သမ္မတက “တစ်ချိန်ချိန်မှာ Fort Knox ကို သွားချင်ပါတယ်။ ရွှေတွေရှိနေလားဆိုတာ ကြည့်ချင်တယ်။ ရှိနေလိမ့်မယ်လို့လည်း ကျွန်တော် ယုံကြည်ပါတယ်” ဟု ဖြေကြားခဲ့ပြန်သည်။

Louisville မြို့အနီးရှိ ထိုစစ်တပ်နယ်မြေသို့ သွားရောက်ရန် ထရန့်တွင် လက်ရှိ၌ အနီးကပ်အစီအစဉ် ရှိ၊ မရှိကိုမူ ရှင်းလင်းစွာ မသိရသေးပေ။ အိမ်ဖြူတော်နှင့် Fort Knox မှ တာဝန်ရှိသူများကလည်း The Independent သတင်းဌာန၏ မှတ်ချက်ပေးရန် တောင်းဆိုမှုများကို ချက်ချင်းတုံ့ပြန်ခြင်း မရှိသေးပါ။

သမ္မတထရန့်သည် သမ္မတရာထူးကို စတင်တာဝန်ယူပြီးနောက် ၂၀၂၅ ခုနှစ် ဖေဖော်ဝါရီလတွင် Elon Musk က အစိုးရအသုံးစရိတ်များကို စိစစ်နေသည့်ကာလ၌ ၎င်းအနေဖြင့် သမ္မတကိုယ်တိုင် စာရင်းစစ်ဆေးမှု ပြုလုပ်လိုကြောင်း ပထမဆုံး အရိပ်အမြွက် ပြောကြားခဲ့ခြင်းဖြစ်သည်။

“အခုအချိန်အထိ ဒေါ်လာ ဘီလျံပေါင်း ရာနဲ့ချီတဲ့ လိမ်လည်မှုတွေကို ကျွန်တော်တို့ ရှာဖွေတွေ့ရှိထားပြီးပါပြီ၊ ဒါဟာ စတင်ရုံပဲ ရှိပါသေးတယ်။ ရွှေတွေ ရှိ၊ မရှိ ကြည့်ဖို့ Fort Knox ကို တကယ်သွားကြမှာပါ။ ဘာလို့လဲဆိုတော့ တစ်စုံတစ်ယောက်က အဲဒီရွှေတွေကို ခိုးသွားတာမျိုး ဖြစ်နိုင်လို့ပါ။ ရွှေတန်ချိန် ပေါင်းများစွာရှိတာပါ” ဟု ထရန့်က ထိုစဉ်က ပြောကြားခဲ့သည်။

Elon Muskကလည်း နိုင်ငံတော်၏ ရွှေအရန်စုဆောင်းမှုများ ခိုးယူခံရနိုင်သည်ဟူသော ကာလရှည်ကြာ အခြေအမြစ်မရှိသည့် ပူးပေါင်းကြံစည်မှု သီအိုရီများကို ထောက်ခံအားပေးခဲ့ကြောင်း NBC News တွင် ဖော်ပြထားသည်။ ထို့အပြင် ကင်တပ်ကီးပြည်နယ်မှ လွှတ်တော်ကိုယ်စားလှယ်များဖြစ်ကြသော Thomas Massie နှင့် Rand Paul တို့ အပါအဝင် အချို့သော ရီပတ်ဘလစ်ကန် လွှတ်တော်အမတ်များကလည်း အရန်ရွှေများကို စစ်ဆေးရန် တောင်းဆိုခဲ့ကြဖူးသည်။

Fort Knox သည် အမေရိကန်နိုင်ငံ၏ ရွှေအရန်စုဆောင်းရာ ဌာနဖြစ်ပြီး နိုင်ငံတော်၏ ရွှေများကို ထိန်းသိမ်းရန် ၁၉၃၆ ခုနှစ်တွင် မြေအောက်ခန်း တည်ဆောက်ခဲ့ခြင်းဖြစ်သည်။ ၎င်းကို “ဖောက်ထွင်း၍မရသော ခံတပ်” ဟု လူသိများပြီး ကမ္ဘာပေါ်တွင် လုံခြုံရေးအကောင်းဆုံးနှင့် အထင်ကရအရှိဆုံး နေရာများအနက် တစ်ခုဖြစ်သည်။ အမေရိကန် ဒင်္ဂါးပြားသွန်းလုပ်ရေးဌာန (U.S. Mint) ၏ အဆိုအရ လက်ရှိတွင် Fort Knox ၌ ရွှေစင် ၁၄၇,၃၄၁,၈၅၈.၃၈၂ အောင်စ သိမ်းဆည်းထားကြောင်း သိရသည်။