ရန်ကုန်၊ စက်တင်ဘာ ၂
မြန်မာနိုင်ငံ ဘောလုံးအဖွဲ့ချုပ်၊ ဖူဆယ်နှင့် သဲသောင်ပြင်ကော်မတီက ဦးစီးကျင်းပမည့် Fire Dragon International Futsal Cup 2026 ပြိုင်ပွဲတွင် အင်ဒိုနီးရှား၊ ထိုင်းနှင့် ကမ္ဘောဒီးယားနိုင်ငံတို့မှ ပြည်ပဖူဆယ်ကလပ် ၃ သင်း ဝင်ရောက်ယှဉ်ပြိုင်မည်ဖြစ်သည်။
အဆိုပါပြိုင်ပွဲကို စက်တင်ဘာ ၆ ရက်မှ ၁၂ ရက်အထိ ရန်ကုန်မြို့ရှိ MFF Futsal Indoor Stadium ၌ ကျင်းပသွားမည်ဖြစ်သည်။ ပြိုင်ပွဲတွင် အင်ဒိုနီးရှားနိုင်ငံမှ Black Steel Papua FC၊ ထိုင်းနိုင်ငံမှ Black Pearl United FC နှင့် ကမ္ဘောဒီးယားနိုင်ငံမှ Lucky FC တို့ ပါဝင်ယှဉ်ပြိုင်ကြမည်ဖြစ်သည်။
အင်ဒိုနီးရှား ထိပ်တန်းကလပ် Black Steel Papua FC သည် ဘရာဇီးကစားသမား ၃ ဦး ပါဝင်ပြီး အင်ဒိုနီးရှားဖူဆယ်လိဂ် ချန်ပီယံဆုကို နှစ်ကြိမ် ရရှိထားသည့် အသင်းဖြစ်သည်။ ထိုင်းဖူဆယ်လိဂ် ထိပ်တန်းကလပ် Black Pearl United FC တွင် ဘရာဇီးကစားသမား ၂ ဦး ပါဝင်ကာ ၂၀၂၆ ရာသီ၌ အဆင့် ၄ နေရာတွင် ရပ်တည်နေသည်။ ကမ္ဘောဒီးယားဖူဆယ်လောက၏ အင်အားကြီးအသင်း Lucky FC အတွက်မူ ယခုပြိုင်ပွဲသည် ပထမဆုံး ဝင်ရောက်ယှဉ်ပြိုင်သည့် နိုင်ငံတကာပြိုင်ပွဲ ဖြစ်သည်။
အုပ်စုမဲခွဲမှုများအရ အင်ဒိုနီးရှားမှ Black Steel Papua FC နှင့် ကမ္ဘောဒီးယားမှ Lucky FC တို့သည် အုပ်စု (က) တွင် ကျရောက်နေပြီး ထိုင်းနိုင်ငံမှ Black Pearl United FC က အုပ်စု (ခ) တွင် ပါဝင်ယှဉ်ပြိုင်ရမည်ကြောင်း သိရသည်။