EU သည် ရာသီဥတုပြောင်းလဲမှု တို-က်ဖျ-က်ရေးဆီသို့ ပြန်လည်ဦးလှည့်လာမည်လား

စက်တင်ဘာ ၉ ရက်

လွန်ခဲ့သည့် နှစ်နှစ်အတွင်း သဘာဝပတ်ဝန်းကျင်ဆိုင်ရာ မူဝါဒများကို သိသိသာသာ လျှော့ချခဲ့သည်ဟု ဝေဖန်ခံနေရချိန်တွင် ကမ္ဘာကြီးပူနွေးလာမှုကို တို-က်ဖျ-က်ရေး လုပ်ငန်းစဉ်သည် ယခုလအတွင်း ပြုလုပ်မည့် EU အကြီးအကဲ အာဇူလာဖွန်ဒဲလိုင်ယန်၏ အဓိက မူဝါဒဆိုင်ရာ မိန့်ခွန်းတွင် အဓိက ပါဝင်လာလိမ့်မည်ဟု မျှော်လင့်ရသည်။
ဥရောပသည် ပူပြင်းလှသော နွေရာသီမှ မကြာသေးမီကမှ ရုန်းထွက်နိုင်ခဲ့ခြင်းဖြစ်ရာ လာမည့် ၁၂ လအတွက် နိုင်ငံရေး ဦးစားပေးများကို သတ်မှတ်ပေးမည့် “ဥရောပသမဂ္ဂ၏ အခြေအနေ မိန့်ခွန်း” တွင် ရာသီဥတုဆိုင်ရာ ကိစ္စရပ်များကို လျစ်လျူရှုထားရန် ခက်ခဲလိမ့်မည် ဖြစ်သည်။

EU ၏ အဓိက ဦးဆောင် မူဝါဒအဖြစ် နှစ်ပေါင်းများစွာ ရှိခဲ့ပြီးနောက် လွန်ခဲ့သည့် နှစ်အနည်းငယ်အတွင်း သဘာဝပတ်ဝန်းကျင် ထိန်းသိမ်းရေးသမားများကို စိတ်ပျက်စေခဲ့သည့် ရာသီဥတုဆိုင်ရာ စိုးရိမ်ပူပန်မှုများသည် ကာကွယ်ရေးနှင့် စက်မှုလုပ်ငန်းဆိုင်ရာ ရည်မှန်းချက်များ၏ နောက်သို့ ရောက်ရှိသွားခဲ့သည်။

EU အဖွဲ့သည် စီးပွားရေးလုပ်ငန်းများအတွက် သဘာဝပတ်ဝန်းကျင် စည်းမျဉ်းအသစ်များကို သိသိသာသာ လျှော့ချခဲ့ပြီး ၂၀၃၅ ခုနှစ်တွင် စက်သုံးဆီကို သုံးရသော မော်တော်ယာဉ်သစ်များကိုရောင်းချမှု ကို ပိတ်ပင်မည့် အစီအစဉ်ကိုလည်း ရုပ်သိမ်းရန် အဆိုပြုခဲ့သည်။

သို့သော်အချို့က စက်တင်ဘာလ ၁၆ ရက်တွင် ပြောကြားမည့် မိန့်ခွန်းသည် ဘရပ်ဆဲလ်၏ ဦးစားပေးမှုများကို ပြန်လည် ညီမျှသွားစေမည့် အချက်ပြတစ်ခု ဖြစ်လာနိုင်သည်ဟု မျှော်လင့်နေကြသည်။

ဩဂုတ်လအတွင်း သဘာဝပတ်ဝန်းကျင် ထိန်းသိမ်းရေး အဖွဲ့ပေါင်း ၂၀၀ ခန့်က နိုင်ငံ ပေါင်း ၂၇ နိုင်ငံပါဝင်သော အဆိုပါအဖွဲ့အစည်းကို ရုပ်ကြွင်းလောင်စာများ သုံးစွဲမှုမှ ခွာစစ်ဆင်ရန် ခိုင်မာသော အစီအစဉ်များကို ထိုမိန့်ခွန်းတွင် ထည့်သွင်း ဖော်ပြပေးပါရန် ဖွန်ဒဲလိုင်ယန်ထံ စာရေးသား တောင်းဆိုခဲ့ကြသည်။

EU ကော်မရှင်နာမင်းကြီး ၂၇ ဦးတို့သည် သောကြာနေ့တွင် ဘရပ်ဆဲလ်၌ ကျင်းပမည့် နွေရာသီအလွန် ဆွေးနွေးပွဲတွင် ဆွီဒင် ရာသီဥတုဗေဒပညာရှင် ဂျိုဟန်ရော့စတုန်း နှင့် တွေ့ဆုံရန် အစီအစဉ်ဆွဲထားသည်။

သို့သော် အခြားသော အထောက်အထားများကမူ တခြားသော ဦးတည်ချက်ကို ညွှန်ပြနေသည်။

EU သတင်းမြစ်များ၏ အဆိုအရ ဖွန်ဒဲလိုင်ယန် သည် ရာသီဥတုဒဏ်ကို ခံနိုင်ရည်ရှိရေး နှင့် သဘာဝ ပတ်ဝန်းကျင်ကို မထိခိာက်သော အစိမ်းရောင် စက်မှုလုပ်ငန်းများ၏ စီးပွားရေးဆိုင်ရာ အလားအလာများအပေါ် အဓိကထား ပြောကြားမည် ဖြစ်ကြောင်း သိရသည်။

နောက်ဆုံးဖော်ပြခဲ့သည့် အချက်သည် ဖွန်ဒဲလိုင်ယန် ၏ ၇ နှစ်တာ တာဝန်ထမ်းဆောင်ချိန်အတွင်း အမြဲတမ်းလိုလို ပြောကြားလေ့ရှိသည့် အချက်ဖြစ်ပြီး ရာသီဥတုဒ-ဏ် ခံနိုင်ရည်ရှိရေးဆိုင်ရာ ဥပဒေပြုရေးသည်လည်း ယခုနှစ်မကုန်မီ ထွက်ရှိရန် သတ်မှတ်ထားပြီးဖြစ်သည်။

ဖွန်ဒဲလိုင်ယန်၏ ပထမ ၅ နှစ်တာ တာဝန်ထမ်းဆောင်ချိန်ကို ပုံဖော်ပေးခဲ့သော Green Deal (အစိမ်းရောင် သဘောတူညီချက်) ဟုလူသိများသည့် ရည်မှန်းချက်ကြီးမားသော ရာသီဥတုဆိုင်ရာ ဥပဒေပြဋ္ဌာန်းရေးသည် ယခုရက်ပိုင်း ဘရပ်ဆဲလ်တွင် လှုံ့ဆော်ရန် ခက်ခဲသော အရာတစ်ခုဖြစ်နေသည်။

၂၀၂၄ ဥရောပ ရွေးကောက်ပွဲတွင် Green Party များ ရှုံးနိမ့်ခဲ့ပြီး စီးပွားရေး ကို လိုလားသော ဗဟိုလက်ယာယိမ်းအုပ်စုသည် လက်ယာစွန်း ရာသီဥတု သံသယဝါဒီများ ပိုမိုဩဇာညောင်းလာသည့် ဥရောပပါလီမန်တွင် လွှမ်းမိုးထားသည်။

ဦးစားပေးရမည့်အချက်မှာ “ဥရောပသားများက အပြောင်းအလဲလုပ်ရန် တောင်းဆိုထားသည့် ဥပဒေများကို ပြန်လည်ပြင်ဆင်မည့်အစား အစိမ်းရောင်ကို ဟန်ပြ ပြန်ဆိုးရန် မဟုတ်ပါ” ဟု လက်ယာယိမ်း ပါလီမန်အမတ် ဆယ်လင်အိုင်မတ်က ပြောကြားခဲ့သည်။

ကော်မရှင်အတွင်း၌လည်း သဘောထားကွဲလွဲမှုများ ရှိနေဆဲဖြစ်သည်။

ဥပမာအားဖြင့် လွန်ခဲ့သည့် လများအတွင်း အစိမ်းရောင်သမားများနှင့် စီးပွားရေးလိုလားသော လုပ်ဖော်ကိုင်ဖက်များအကြား လေကြောင်းနှင့် ရေကြောင်း သယ်ယူပို့ဆောင်ရေး ကဏ္ဍများအပေါ် ကာဗွန်ဈေးကွက် ပြုပြင်ပြောင်းလဲမှုက ထိခိုက်‌စေမှု များနှင့် ပတ်သက်၍ အငြင်းပွားမှုများ ရှိခဲ့သည်။

တစ်ချိန်တည်းမှာပင် EU နိုင်ငံများသည် အဖွဲ့၏ နောက်ထပ် ရေရှည်ဘတ်ဂျက်အရ ခွဲဝေပေးမည့် ကန့်သတ်ထားသော သယံဇာတများကို မည်သို့ခွဲဝေမည်ဆိုသည်ကို အခြေအတင် ဆွေးနွေးနေကြသည်။

“ဒါဟာ ခက်ခဲတဲ့ ရုန်းကန်မှုတစ်ခု ဖြစ်လာတော့မယ်” ဟု Green ပါတီခေါင်းဆောင် တယ်ရီရိန်ဂီက ပြောကြားခဲ့သည်။

သို့သော်လည်း သူ၏ အဖွဲ့သည် ဖွန်ဒဲလိုင်ယန် ကို သူ၏ မိန့်ခွန်းတွင် ခိုင်မာသော ရာသီဥတုဆိုင်ရာ အရေးယူဆောင်ရွက်ချက်များကို ထည့်သွင်းပြောကြားရန် အပြင်းအထန် တွန်းအားပေးသွားမည် ဖြစ်သည်။

“ကျွန်မတို့ဟာ ရပ်တည်ရှင်သန်ရေးနဲ့ ဆိုင်တဲ့ အခြေအနေတွေအကြောင်း ပြောနေကြတာပါ” ဟု သူက ပြောကြားခဲ့သည်။

Ref: ခမာတိုင်းမ်စ်