ရန်ကုန်မြို့ပတ်လမ်းပိုင်းတွင် DEMU ရထားတွဲဆိုင်းအသစ်များဖြင့် ပြေးဆွဲလျက်ရှိရာ ခရီးသည်စီးနင်းမှု များပြားလျက်ရှိကြောင်း မြန်မာ့မီးရထားမှ သိရသည်။
လက်ရှိတွင် ရန်ကုန်မြို့ပတ်ရထားလမ်းပိုင်း၌ ယခင် ဂျပန် RBE ရထားဖြင့် ခေါက်ရေ (၂၀)၊ လေအေးပေးစက်ပါဝင်သည့် DEMU တွဲဆိုင်းသစ်ဖြင့် ခေါက်ရေ (၁၅)ခေါက် စုစုပေါင်း (၃၅) ခေါက် နေ့စဉ်ပြေးဆွဲပေးနေကြောင်း သိရသည်။
မြို့ပတ်ရထားလမ်းပိုင်းအတွက် စပိန်နိုင်ငံထုတ် DEMU တွဲဆိုင်း (၁၁) ဆိုင်းဝယ်ယူထားပြီး (၁၀) ဆိုင်းရောက်ရှိပြီဖြစ်ကာ (၃) ဆိုင်းဖြင့် စတင်ပြေးဆွဲပေးနေပြီဖြစ်သည်။
အဆိုပါ ရထားတွင် ထိုင်စီး (၃၃၂) ဦး၊ မတ်တပ်ရပ်စီး (၅၀၀) ဦးစုစုပေါင်း (၈၃၂) ဦးစီးနင်းနိုင်ပြီး နေ့စဉ်မြို့ပတ်ရထားစီးနင်းသူ (၁၀၀၀၀) ခန့်ရှိကြောင်း သိရသည်။
ဒီဇင်ဘာ (၁) ရက်မှစတင်ပြီး ရန်ကုန်အထိ လမ်းကြောင်း (၇) ခုနှင့် ရန်ကုန်မှ မင်္ဂလာဒုံ၊ အင်းစိန်အထိ လမ်းကြောင်း (၇) ခု စုစုပေါင်း လမ်းကြောင်း (၁၄)ခုအထိ DEMU တွဲဆိုင်းသစ်များဖြင့် ပြေးဆွဲပေးလျက်ရှိပြီး မြို့ပတ်ရထားလက်မှတ်ခနှုန်းထားမှာ (၀) မိုင်မှ (၁၅) မိုင်ထိကို (၅၀၀) ကျပ်၊ မိုင် (၃၀) အထိ (၁၀၀၀) ကျပ်ဖြစ်ကြောင်း သိရသည်။