BRICS အဖွဲ့ဝင်နိုင်ငံများ၏ ထိပ်သီးအစည်းအဝေးတက်ရောက်ရန် တရုတ်သမ္မတ ရှီကျင့်ဖျင်သည် စနေနေ့တွင် အိန္ဒိယနိုင်ငံ နယူးဒေလီမြို့သို့ ရောက်ရှိလာခဲ့ပြီး ယခုခရီးစဉ်သည် ၂၀၁၉ ခုနှစ်နောက်ပိုင်း ၎င်း၏ ပထမဆုံး အိန္ဒိယခရီးစဉ်ဖြစ်ကြောင်း သိရသည်။
ရှီကျင့်ဖျင်သည် အထူးလေယာဉ်ဖြင့် အိန္ဒိယမြို့တော်သို့ စနေနေ့ မွန်းလွဲပိုင်းတွင် ရောက်ရှိခဲ့ကြောင်း တရုတ်နိုင်ငံပိုင် CCTV က ဖော်ပြသည်။
နိုင်ငံပေါင်း ၁၁ နိုင်ငံ ပါဝင်သည့် BRICS အဖွဲ့၏ နှစ်ရက်ကြာ ထိပ်သီးအစည်းအဝေးတွင် အရှေ့အလယ်ပိုင်းနှင့် ယူကရိန်း၌ ဖြစ်ပွားနေသည့် ပဋိပက္ခများ၊ ကမ္ဘာ့ကုန်သွယ်ရေး မတည်ငြိမ်မှုများနှင့် စွမ်းအင်ဖူလုံရေးဆိုင်ရာ ကိစ္စရပ်များကို အဓိကထား ဆွေးနွေးဖွယ်ရှိသည်။
ရှီကျင့်ဖျင်၏ ယခုခရီးစဉ်သည် ၂၀၁၉ ခုနှစ်နောက်ပိုင်း အိန္ဒိယနိုင်ငံသို့ ပထမဆုံးလာရောက်သည့် ခရီးစဉ်ဖြစ်သည့်အပြင် နယ်စပ်အရေးကြောင့် နှစ်အတန်ကြာ တင်းမာခဲ့သည့် တရုတ်-အိန္ဒိယ ဆက်ဆံရေး ပြန်လည်ကောင်းမွန်လာရေး ကြိုးပမ်းနေချိန်နှင့်လည်း တိုက်ဆိုင်နေသည်။
တရုတ်နိုင်ငံအနေဖြင့် ဆက်သွယ်မှုများ အားကောင်းစေရေး၊ ပူးပေါင်းဆောင်ရွက်မှု တိုးမြှင့်ရေးနှင့် နှစ်နိုင်ငံအကြား သဘောထားကွဲလွဲမှုများကို သင့်လျော်စွာ ကိုင်တွယ်ဖြေရှင်းရေးအတွက် အိန္ဒိယနှင့် လက်တွဲဆောင်ရွက်ရန် အသင့်ရှိကြောင်း ပေကျင်းက သောကြာနေ့တွင် ပြောကြားထားသည်။
ရှီကျင့်ဖျင်သည် စနေနေ့နှောင်းပိုင်းတွင် အိန္ဒိယဝန်ကြီးချုပ် နာရင်ဒြာမိုဒီနှင့် တွေ့ဆုံဆွေးနွေးရန် စီစဉ်ထားပြီး နှစ်နိုင်ငံနယ်စပ်အရေးအပါအဝင် ဆက်ဆံရေးတိုးတက်ကောင်းမွန်လာရေးဆိုင်ရာ ကိစ္စရပ်များကို ဆွေးနွေးဖွယ်ရှိကြောင်း သိရသည်။
Ref: CNA