တရုတ်နိုင်ငံသည် ဉာဏ်ရည်တု (AI) နှင့် အနာဂတ်နည်းပညာကဏ္ဍများ၏ လိုအပ်ချက်များနှင့် ကိုက်ညီစေရန် အဆင့်မြင့်ပညာရေးစနစ်ကို အရှိန်အဟုန်ဖြင့် ပြုပြင်ပြောင်းလဲလျက်ရှိပြီး ခေတ်မမီတော့သည့် ဘွဲ့ဒီဂရီအစီအစဉ်များကို လျှော့ချကာ နည်းပညာအခြေပြု ဘာသာရပ်အသစ်များကို တိုးချဲ့ဖွင့်လှစ်လျက်ရှိကြောင်း သိရသည်။
တရုတ်ပညာရေးဝန်ကြီးဌာန၏ အချက်အလက်များကို ကိုးကား၍ ရှင်းဟွာသတင်းဌာန၏ ဖော်ပြချက်အရ ၂၀၂၁ ခုနှစ်မှ ၂၀၂၅ ခုနှစ်အတွင်း တရုတ်တက္ကသိုလ်များသည် ဘွဲ့ကြိုနှင့် ဘွဲ့လွန်အစီအစဉ် ၁၂,၂၀၀ ခုကို ဆိုင်းငံ့ထားပြီး ဘွဲ့ဒီဂရီအစီအစဉ် ၁၀,၂၀၀ ခုကို ဖျက်သိမ်းခဲ့ရာ တက္ကသိုလ်ဘာသာရပ်များ၏ ၃၀ ရာခိုင်နှုန်းကျော်ကို ပြန်လည်ဖွဲ့စည်းခဲ့ကြောင်း သိရသည်။
ပြုပြင်ပြောင်းလဲမှုများတွင် အနုပညာ၊ ယဉ်ကျေးမှု၊ လူမှုသိပ္ပံ၊ နိုင်ငံခြားဘာသာစကားနှင့် စီမံခန့်ခွဲမှုပိုင်းဆိုင်ရာ ဘာသာရပ်များကို အဓိကလျှော့ချခဲ့ပြီး AI နည်းပညာကြောင့် အလုပ်အကိုင်ဈေးကွက် အလျင်အမြန်ပြောင်းလဲလာမှုနှင့် လူငယ်အလုပ်လက်မဲ့နှုန်း မြင့်တက်နေမှုတို့ကို ထည့်သွင်းစဉ်းစား၍ ဆောင်ရွက်ခဲ့ခြင်းဖြစ်ကြောင်း သိရသည်။
တစ်ဖက်တွင်လည်း AI၊ ဉာဏ်ရည်မြင့်စက်ရုပ်စနစ်၊ ဒစ်ဂျစ်တယ်နည်းပညာနှင့် အနာဂတ်စက်မှုလုပ်ငန်းများနှင့် သက်ဆိုင်သည့် ဘာသာရပ်အသစ်များကို တိုးချဲ့ဖွင့်လှစ်လျက်ရှိပြီး တက္ကသိုလ်ကိုးခုတွင် AI နည်းပညာကို စက်မှုကဏ္ဍများ၌ ပေါင်းစပ်အသုံးချနိုင်ရေးအတွက် သီးသန့်အထူးပြုဘာသာရပ်များကို စတင်သင်ကြားပေးလျက်ရှိကြောင်း သိရသည်။
ဘွဲ့ရဦးရေ စံချိန်တင်မြင့်တက်လာမှုနှင့်အတူ အလုပ်အကိုင်ဈေးကွက်၏ လိုအပ်ချက်များ လျင်မြန်စွာ ပြောင်းလဲလာခြင်းကြောင့် တက္ကသိုလ်များအနေဖြင့် သင်ရိုးညွှန်းတမ်းများကို စီးပွားရေးဖွံ့ဖြိုးတိုးတက်မှုနှင့် နည်းပညာတိုးတက်မှုတို့နှင့် ကိုက်ညီစေရန် ပြန်လည်ပြင်ဆင်နေရကြောင်း သိရသည်။
Ref: South China Morning Post