မလေးရှားရှိ ကမ္ဘာ့ဒုတိယအမြင့်ဆုံး အဆောက်အအုံ၏ ထိပ်ဆုံးပေါ်သို တက်ပြခဲ့သည့် ရုရှား အလွတ်တန်းတောင်တက်သမားနှစ်ဦး

ရုရှားနိုင်ငံမှ အလွတ်တန်း တောင်တက်သမားတစ်ဦးသည် မလေးရှားနိုင်ငံရှိ ကမ္ဘာ့ဒုတိယအမြင့်ဆုံး အဆောက်အအုံ၏ ထိပ်ဆုံးပေါ်သို့ တက်ရောက်ခဲ့သည့် သူ၏ ဓာတ်ပုံများအား ဆိုရှယ်မီဒီယာပေါ်သို့တင်ကာ လူအများ အံ့ဩမှင်သက်စေခဲ့သည်။

အသက် ၂၉ နှစ်အရွယ် အန်ဂျလာ နီကိုလောင် သည် မလေးရှားနိုင်ငံ ကွာလာလမ်ပူမြို့ရှိ ၂၂၂၇ ပေမြင့်သော မာဒစ်ကာ မိုးမျှော်တိုက်ပေါ်သို့ သူ၏ ချစ်သူကောင်လေး အီဗန်ဘာခပ်နှင့် အတူတက်ရောက်ခဲ့ခြင်းဖြစ်သည်။

မာဒစ်ကာသည် သူသွားရောက်ဖူးသမျှ မိုးမျှော်တိုက်များထဲတွင် အလှပဆုံးဖြစ်သည်ဟု နီကိုလောင်က ချီးကျူးရေးသားထားသည်။

ရိုက်ကူးခဲ့သော ဗီဒီယိုတစ်ခုအတွင်း အနီရောင်ဝတ်စုံ ဝတ်ဆင်ထားသော နီကိုလောင်သည် အဆောက်အအုံ၏ ဘေးတစ်ဖက်တစ်ချက်တွင် ခြေထောက်နှစ်ဖက် တွဲလွဲချ၍ပင် နေရောင်ခံပြခဲ့သေးသည်။

နီကိုလောင်နှင့် ဘာခပ်တို့သည် ကမ္ဘာတစ်ဝန်းရှိ အထပ်မြင့် အဆောက်အုံများပေါ်သို့ တက်ကာ ထိုပေါ်မှ ဆယ်ဖီဓာတ်ပုံများ ရိုက်၍ ဆိုရှယ်မီဒီယာများသို့ ပြန်လည် မျှဝေလေ့ရှိသောကြောင့် လူသိများသူများ ဖြစ်သည်။

နီကိုလောင်က မာဒစ်ကာပေါ်သို့ မတက်ခင် ထိုအဆောက်အအုံရှိ မြင်ကွင်းကောင်းသော တိုက်ခန်းတစ်ခန်းတွင် ငှားနေ၍ မိုးမျှော်တိုက်နှင့် ပတ်သတ်သော အသေးစိတ် အချက်အလက်များကို အပတ်ပေါင်းများစွာ လေ့လာခဲ့ရကြောင်းနှင့် ပထမ ၃၂ ထပ်ကို ပြေးတက်ခဲ့သောကြောင့် အပူလွန်ကဲ၍ ခတ္တခဏ အနားယူခဲ့ရကြောင်း တွစ်တာပေါ်တွင် ရေးသားလာခဲ့သည်။

မာဒစ်ကာ မိုးမျှော်တိုက်သည် အထပ် ၁၁၈ ထပ်ရှိပြီး ၂၀၂၃ နှစ်လယ်ပိုင်းမှသာ ဆောက်လုပ်ပြီးစီးမည်ဟု သိရသည်။

Source: Daily Mail