ပြုံယမ်းဘက်သို့ ဆိုးလ်စစ်တပ်က အသံချဲ့စက်ဖြင့် အော်ခြင်းကိုရပ်ဆိုင်း

ကိုရီးယားနှစ်နိုင်ငံ နယ်စပ်တလျှောက် မြောက်ကိုရီးယားကိုဆန့်ကျင်သော ဝါဒဖြန့်အသံချဲ့စက် ထုတ်လွှင့်မှုများကို တောင်ကိုရီးယားစစ်တပ်က ပိ-တ်လိုက်ပြီဖြစ်ပြီး စစ်ကြောင့်ကွဲကွာသွားသည့် ပြိုင်ဘက်နှစ်နိုင်ငံအကြား တင်းမာမှုကိုဖြေလျှော့ရန် ရည်မှန်းသော လစ်ဘရယ်အစိုးရသစ်၏ ခိုင်မာသော ပထမဆုံးခြေလှမ်းတစ်ရပ် ဖြစ်သည်။
         
စိတ်ဓါတ်စစ်ဆင်ရေး အစီအစဉ်တစ်ရပ်အနေဖြင့် မြောက်ကိုရီးယားသည် တောင်ကိုရီးယားဘက်သို့ အမှိုက်သရိုက်များ ချိတ်ဆွဲထားသည့် မိုးပျံပူဖောင်းများ စေလွှတ်မှုကို လက်တုန့်ပြန်သောအားဖြင့် နှစ်အတန်ကြာ ရပ်ဆိုင်းထားခဲ့သည့် အသံချဲ့စက်ထုတ်လွှင့်မှုများကို ပြီးခဲ့သည့်နှစ် ဇွန်လတွင် တောင်ကိုရီးယားက ပြန်လည်စတင်ခဲ့သည်။
        
အသံချဲ့စက်ထုတ်လွှင့်မှုကို ရပ်ဆိုင်းလိုက်ခြင်းသည် ကိုရီးယားနှစ်နိုင်ငံဆက်ဆံရေးတွင် ယုံကြည်မှုကို ပြန်လည်တည်ဆောက်ရန်နှင့် ကိုရီးယားကျွန်းဆွယ် ငြိမ်းချမ်းရေးကို မြှင့်တင်ရန် ကြိုးပမ်းမှု၏ တစ်စိတ်တစ်ပိုင်းဖြစ်ကြောင်း တောင်ကိုရီးယား ကာကွယ်ရေးဝန်ကြီးဌာနက ဗုဒ္ဓဟူးနေ့တွင် ပြောကြားခဲ့သည်။
           
၎င်းတို့၏ ခေါင်းဆောင်ပိုင်းနှင့် တတိယမျိုးဆက်ခေါင်းဆောင် ကင်ဂျုံအန်ကို ပြင်ပမှ ဝေဖန်မှုများနှင့်ပတ်သက်၍ လုံးဝအတိမ်းအစောင်းမခံသော မြောက်ကိုရီးယားနိုင်ငံက ဆိုးလ်၏ ယခုခြေလှမ်းအပေါ် လတ်တလောတွင် မှတ်ချက်ပြုခြင်း မရှိသေးပေ။
         
မြောက်ကိုရီးယားသည် ပြီးခဲ့သည့်နှစ် မေလမှ နိုဝင်ဘာလအထိ တောင်ကိုရီးယားဘက်သို့ အိမ်သာသုံးစက္ကူများ၊ အဝတ်စုတ်များ၊ စီးကရက်ဖင်စီခံများနှင့် တိရစ္ဆာန်မစင်များပင် ပါဝင်သော မိုးပျံပူဖောင်း များကိုထောင်နှင့်ချီ၍ စေလွှတ်ခဲ့သည်။ အဆိုပါလုပ်ရပ်သည် တောင်ကိုရီးယားတက်ကြွလှုပ်ရှားသူများက မြောက်ကိုရီးယားဆန့်ကျင် ရေးလက်ကမ်းစာစောင်များအပြင် နာမည်ကျော် တောင်ကိုရီးယားသီချင်းများနှင့် ရုပ်သံဇာတ်လမ်းတွဲများ ထည့်ထားသည့် USB ချောင်းများပါသော မိုးပျံပူဖောင်းများ ကိုလွှတ်တင်ခဲ့မှုကြောင့်ဖြစ်ကြောင်း မြောက်ကိုရီးယားက ပြောကြားခဲ့သည်။

Ref: ဝါရှင်တန်ပို့စ်