ပြည် – တောင်ကုတ်ကားလမ်းမပေါ် တွင် ယမန်နေ့ (ဒီဇင်ဘာ ၂၀ ရက်) က (၆) ဘီးကား နှစ်စီးမှောက်၍ တစ်ဦးသေပြီး နှစ်ဦးဒဏ်ရာရခဲ့ကြောင်း မြန်မာနိုင်ငံလူမှုကယ်ဆယ်ရေးအဖွဲ့ (ပြည်) ထံမှ သိရသည်။
ပဲခူးတိုင်းဒေသကြီး – အနောက်ပိုင်း (ပန်းတောင်းမြို့နယ်)ဥသျှစ်ပင်မြို့ အကျော် (ရခိုင်ရိုးပေါ်) ဆင်လံရွာအနီး တောင်တက်လမ်း ဒုတိယထပ်အကွေ့တွင် (၆)ဘီး ကားနှစ်စီး မှောက်၍ ပထမဆုံးထပ်(အဆင်း) အကွေ့မှ ဒုတိယထပ် အကွေ့သို့ နှစ်စီးလုံး ပြုတ်ကျ၍ တစ်စီးအပေါ် တစ်စီးပိခဲ့သည်။
ထိုသို့ဖြစ်စဉ်ကြောင့် အမျိုးသားနှစ်ဦး မစိုးရိမ်ဒဏ်ရာ ရရှိခဲ့ပြီး အမျိုးသား (၁)ဦးသည် ယာဉ်အောက်တွင် ပိမိခဲ့သည့်အတွက်ပရဟိတပါရမီ (ပြည်)၊ ဂရုဏာသိဒိ လူမှုကူညီရေးအသင်း နယ်မြေခံ အေးသုခလူမှုကူညီရေးအသင်း တို့မှ ရှာဖွေရေးလုပ်ငန်းများပြုလုပ်ခဲ့ရာ ည (၁၁) နာရီအချိန်ခန့်တွင် နံရိုးကျိုး ၊ ဦးခေါင်းအရေပြားလန် ၊ လက်ကျိုး ၊ နားရွက်ပြတ် အစရှိသည့် ထိခိုက်ဒဏ်ရာရ အနေအထားဖြင့်
သေဆုံးသူ အမျိုးသားရုပ်အလောင်းအား ရှာဖွေကယ်ထုတ်ပေးနိုင်ခဲ့သည်။
သက်ဆိုင်ရာနယ်မြေခံ ရဲစခန်းမှ စစ်ဆေးချက်ယူပြီးနောက် နယ်မြေခံ အေးသုခလူမှုကူညီရေးအသင်း မှ နိဗ္ဗာန်ယာဥ်ဖြင့် ဥသျှစ်ပင် ဆေးရုံ (ရင်ခွဲရုံသို့) ဆက်လက်ပို့ဆောင် ကူညီဆောင်ရွက်ပေးခဲ့ကြောင်း သိရသည်။
ဓာတ်ပုံ – မြန်မာနိုင်ငံလူမှုကယ်ဆယ်ရေးအဖွဲ့(ပြည်)
